ភ្នំពេញៈ ជនសង្ស័យម្នាក់ ដែលលួចរ៉ឺម៉ក របស់ជាងជួសជុលម៉ាស៊ីនត្រជាក់បាន ០៣ថ្ងៃ ក៏ត្រូវម្ចាស់រ៉ឺម៉កតាមរកឃើញ និងចាប់ប្រគល់ឲ្យសមត្ថកិច្ចខណ្ឌទួលគោកតែម្តង។

ការឃាត់ខ្លួនជនសង្ស័យជាចោរលួចរ៉ឺម៉កនេះ ធ្វើឡើងកាលពីវេលាម៉ោង ៣ និង៣០នាទីរសៀលថ្ងៃទី០៦ ខែសីហា ឆ្នាំ២០១៦ នៅចំណុចផ្លូវលេខ៥៩៤ ភូមិ៣ ក្រុមទី១៤ សង្កាត់បឹងកក់ទី២ ខណ្ឌទួលគោក។ ជនសង្ស័យឈ្មោះ វន ភក្រ្តា ហៅ ត្រា ភេទប្រុស អាយុ ២៦ឆ្នាំ ជនជាតិខ្មែរ មុខរបរ ពុំពិតប្រាកដ ស្នាក់ នៅផ្ទះជួលគ្មានលេខ ផ្លូវលំ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។

ជនរងគ្រោះឈ្មោះ អន ពិទូ ភេទប្រុស អាយុ ២៩ ឆ្នាំ ជនជាតិខ្មែរ មុខរបរ ជាងជួសជុលម៉ាស៊ីនត្រជាក់ ស្នាក់នៅផ្ទះលេខ១២ ផ្លូវលេខ៥៩៦ ក្រុមទី១៤ ភូមិ ៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ហើយវត្ថុតាងចាប់យកបានពីជនសង្ស័យរួមមាន ម៉ូតូមួយគ្រឿងម៉ាក Citi Plus កូរ៉េ ពណ៌ក្រហម គ្មាន ស្លាកលេខ និងរ៉ឺម៉កកាត់ ដំបូល ០១គ្រឿង បានប្រគល់ឲ្យជនរងគ្រោះវិញហើយ។ ដែកសំប៉ែតសម្រាប់កាច់បំបែកគ្រាប់សោរកម៉ូតូ ចំនួន ០២ ដែលមានដងសោរទីបលេខ 10 និងលេខ8 ។ ដង្កាប់ចំនួន ០២ ( ចុងស្រួច០១ និងដងពណ៌ក្រហម ០១ ), សោរមាត់ចំនួន០២ លេខ10 និងលេខ 13, សោរតាន់រាងអក្សរL ចំនួន ០៤ដើម និងដែកសំរាប់ ឆ្កឹះគ្រាប់សោរ ០១ , ទូណឺវ៉ីស ចំនួន០២ ( ដងពណ៌ ខ្មៅ០១ និងដងពណ៌លឿង ០១), កូនកាំបិតចុងស្រួច មានស្រោមក្រដាស ០១ , ពិល ពណ៌ស ០១ និងដែកគាស់ថ្នាំងអំពៅ ០១ ។

សមត្ថកិច្ចបានបញ្ជាក់ថា កាលវេលាម៉ោង ៧ និង៣០នាទីយប់ ថ្ងៃទី០៣ ខែសីហា ឆ្នាំ២០១៦ ជនរងគ្រោះបានចតម៉ូតូ និងរ៉ឺម៉ក នៅមុខផ្ទះ ហើយបានចេញទៅជួសជុលម៉ាស៊ីនត្រជាក់ឲ្យគេតាមផ្ទះ រហូតដល់ប្រហែល ១០យប់ បានត្រឡប់មកផ្ទះវិញ ស្រាប់តែបាត់ម៉ូតូ និងរ៉ឺម៉ក។ រហូតដល់ថ្ងៃទី០៦ ខែសីហា ឆ្នាំវេលាម៉ោងប្រហែល ៣ និង៣០នាទីរសៀល ជនរងគ្រោះបានប្រទះឃើញជនសង្ស័យ កំពុងប្រើប្រាស់ម៉ូតូ និង រ៉ឺម៉ករបស់ខ្លួននៅចំណុច ផ្លូវលេខ៥៩៤ ក្រុមទី១៤ ភូមិ៣ សង្កាត់បឹងកក់ទី២ ខណ្ឌទួលគោក ក៏បានរាយការណ៍ប្រាប់សមត្ថកិច្ច ចុះទៅឃាត់ខ្លួនជនសង្ស័យ និង ចាប់យកវត្ថុតាងតែម្តង។

បច្ចុប្បន្នជនសង្ស័យ កំពុងឃាត់ខ្លួននៅអធិការដ្ឋាន នគរបាលខណ្ឌទួលគោក ដើម្បីសាកសួរ និងកសាង សំណុំរឿងបញ្ជូនទៅតុលាការ ចាត់ការតាមច្បាប់៕