បន្ទាយមានជ័យ: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា ក្មេងប្រុសអាយុ១៤ឆ្នាំម្នាក់ បានរងរបួសធ្ងន់ ខណ:ពេលដើរដាក់អន្ទាក់សត្វ និងជីកទំពាំងនៅក្បែរព្រំដែនកម្ពុជា-ថៃ ។
ករណីនេះកើតឡើងនៅថ្ងៃទី២៨ ខែកក្កដា ឆ្នាំ២០២០ វេលាម៉ោង១៦និង១៥នាទី ចំណុចចន្លោះបង្គោលសីមាលេខ២៨-២៩ ខាងលិចភូមិដងរ៉ែក ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ។
លោកវរសេនីយ៍ឯក សៅ សារឿន អធិការនគរបាលស្រុកថ្មពួក បានឲ្យដឹងថា ក្មេងប្រុសរងគ្រោះ ឈ្មោះ ឈុំ ខេន អាយុ១៤ឆ្នាំ មានទីលំនៅភូមិដងរ៉ែក ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ។
លោកអធិការបានបញ្ជាក់ថា នៅមុនពេលកើតហេតុ ក្មេងប្រុសរងគ្រោះ បានដើរចូលទៅក្នុងទឹកដីថៃតាមបន្ទាត់ព្រំដែន ត្រង់ចន្លោះបង្គោលសីមាលេខ២៨-២៩ នៅចំណុចខាងលិចភូមិដងរែក ឃុំបន្ទាយឆ្មារ ដើម្បីដាក់អន្ទាក់សត្វនិងដើររកជីកទំពាំង បានជាន់មីនបណ្តាលឲ្យផ្ទុះរងរបួសធ្ងន់ជើងទាំង២និងខ្លួនប្រាណ ។ ក្រោយពីកើតហេតុក្មេងរងគ្រោះត្រូវបានសមត្ថកិច្ចប្រចាំការនៅទីនោះ ជួយដឹកយកទៅសង្គ្រោះ នៅមន្ទីរពេទ្យបង្អែកស្រុកថ្មពួក ។
ជាមួយគ្នានោះដែរ លោកវរសេនីយ៍ឯក សៅ សារឿន អធិការនគរបាលស្រុកថ្មពួក បានអំពាវនាវដល់បងប្អូនប្រជាពលរដ្ឋ សូមប្រុងប្រយ័ត្ន ពិសេសកុំទៅជិតព្រំដែនដើម្បីរុករកអនុផលព្រៃឈើឬក៏ដាក់អន្ទាក់សត្វ ព្រោះជាតំបន់គ្រោះថ្នាក់សំបូរទៅដោយគ្រាប់មីន និងគ្រាប់យុទ្ធភណ្ឌមិនទាន់ផ្ទុះ ដែលអាចបង្ក គ្រោះថ្នាក់ជាយថាហេតុ ហើយឃើញមានស្លាកសញ្ញាគ្រោះថ្នាក់មីន កុំទៅចូលព្រៃដែលមានស្លាកសញ្ញា ហាមឃាត់ឲ្យសោះ ៕
មតិយោបល់