ផ្ទះ ព័ត៌មានជាតិ ជាងជួសជុលម៉ូត...

ជាងជួសជុលម៉ូតូម្នាក់ ជិះម៉ូតូបុករ៉ឺម៉កពេញទំហឹង បណ្តាលឲ្យស្លាប់មួយរំពេច នៅលើដងផ្លូវ

0

កណ្ដាល: យោងតាមផេក ការិយាល័យផ្សព្វផ្សាយតាមបណ្តាញសង្គម បានឲ្យដឹងថា​​ នៅថ្ងៃពុធ ៨រោច ខែស្រាពណ៍ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី១២ ខែសីហា ឆ្នាំ ២០២០ វេលាម៉ោង២៣និង០០នាទី មានករណីគ្រោះថ្នាក់ចរាចរណ៍ផ្លូវគោករវាង ម៉ូតូនិងម៉ូតូសណ្តោងរ៉ឺម៉ក បណ្ដាលឲ្យ ស្លាប់ម្នាក់ ខូចខាតម៉ូតូធ្ងន់១គ្រឿង រ៉ឺម៉កខូចស្រាលលើកំណាត់ផ្លូវជាតិលេខ២១ ចំណុច គីឡូម៉ែត្រលេខ ៥២ ខាងជើងព្រែកចាន់ ( ទី ៦០ ) ប្រហែល ១០០ម៉ែត្រ ស្ថិតនៅក្នុងភូមិពោធិរាម្មា ឃុំព្រែកស្ដី ស្រុកកោះធំ ខេត្តកណ្តាល ។

នៅថ្ងៃខែឆ្នាំ វេលាម៉ោង ខាងលើមាន ម៉ូតូម៉ាក យ៉ាម៉ាហា សេ ១៥០ ពណ៌ស អត់ផ្លាកលេខ អត់កញ្ចក់ បើកបរមានទិសដៅពីត្បូងទៅជើង ( ជ្រៃធំ តាខ្មៅ ) បើកបរដោយឈ្មោះ ភ័ណ្ឌ វិសាល ភេទប្រុស អាយុ១៨ឆ្នាំ មុខរបរជាងជួសជុលម៉ូតូ មានទីលំនៅភូមិព្រែកតាហ៊ីង ឃុំព្រែកថ្មី ស្រុកកោះធំ ខេត្តកណ្តាល អត់ពាក់មួកសុវត្តិភាព ( ស្លាប់នៅនឹងកន្លែងកើតហេតុ ) បានបើកបុកម៉ូតូ សណ្ដោងរ៉ឺម៉ក ម៉ាក ហុងដា វ៉េវ សេ១២៥ ពណ៌ក្រហម + ខ្មៅ ពាក់ផ្លាកលេខ ភ្នំពេញ 1 AZ 0573 ដែលកំពុងឈប់ លើជាយផ្លូវស្របទិស ចរាចរណ៍ ហើយអ្នកបើកបរ ចុះបត់ជើងតូច អ្នកបើកបរមិនទាន់ស្គាល់អត្តសញ្ញាណ គេចខ្លួនមុនពេលសមត្ថកិច្ចទៅដល់ ។

ករណីនេះបង្កឡើងដោយអ្នកបើកបរ ម៉ូតូសណ្តោងរ៉ឺម៉ក ធ្វេសប្រហែស ឈប់លើជាយផ្លូវ ចំណែកអ្នកបើកបរ ម៉ូតូ បើកមានល្បឿនលឿន ខ្វះការប្រុងប្រយ័ត្ន មិនមើលស្ថានភាពផ្លូវខាងមុខ ទើបទៅបុក ចំកន្ទុយរ៉ឺម៉ក ពេញទំហឹង តែងម្ដង ។

ករណីនេះកម្លាំងជំនាញ និង កម្លាំងប៉ុស្តិ៍បានចុះទៅដល់កន្លែងកើតហេតុ ធ្វើការវាស់វែងរួចរាល់ ហើយយកមធ្យោបាយ ដែលពាក់ព័ន្ធមករក្សាទុក បណ្ដោះអាសន្ន នៅអធិការដ្ឋាននគរបាលស្រុកកោះធំ ដើម្បីបន្តចាត់ការតាមនីតិវិធី ៕

មតិយោបល់