ភ្នំពេញៈ កម្លាំងការិយាល័យនគរបាលព្រហ្មទណ្ឌកម្រិតធ្ងន់ សហការជាមួយអធិការដ្ឋាននគរបាលខណ្ឌសែនសុខ បានឃាត់ខ្លួនជនសង្ស័យ២នាក់ ពាក់ព័ន្ធជួញដូរគ្រឿងញៀន និងប្រើប្រាស់អាវុធខុសច្បាប់ នាថ្ងៃទី៧ ខែសីហា ឆ្នាំ២០១៦ នៅចំណុចកែងផ្លូវបេតុង ភូមិសែនសុខ សង្កាត់ឃ្មួញខណ្ឌសែនសុខ។

ជនសង្ស័យទី១ឈ្មោះ គឹម មករា ហៅហង្ស សុវណ្ណរ៉ា ភេទប្រុស អាយុ៣២ឆ្នាំ មានទីលំនៅបច្ចុប្បន្នផ្ទះលេខ12 ផ្លូវ242 ភូមិសែនសុខទី7 សង្កាត់ឃ្មួញ ខណ្ឌសែនសុខ មុខរបរមិនពិតប្រាកដ។ ទី២.ឈ្មោះ ជា ទីនៀង ភេទប្រុស អាយុ២០ឆ្នាំ មានទីលំនៅបច្ចុប្បន្នស្នាក់នៅក្នុងព្រលានយន្តហោះ សង្កាត់កាកាប ខណ្ឌពោធិ៍សែនជ័យ មុខរបរជាងភ្លើង។

ក្រោយពីឃាត់ខ្លួនសមត្ថកិច្ចដកហូតវត្ថុតាងរួមមាន៖ -អាវុធខ្លី១ដើមម៉ាកK-54 ពណ៌ខ្មៅ លេខ 2775 មានគ្រាប់05 -ម៉ូតូ១គ្រឿងម៉ាកហុងដាគុប ពណ៌ទឹកប៉ិច ពាក់ស្លាកលេខ ភ្នំពេញ 1AG-0922 -ម្សៅក្រាមពណ៌សថ្លាចំនួន១កញ្ចប់ និងសម្ភារៈជក់គ្រឿងញៀនមួយចំនួន។

បច្ចុប្បន្នជនសង្ស័យនិងវត្ថុតាង ត្រូវកម្លាំងការិយាល័យកំពុងកសាងសំណុំរឿង បញ្ជូនទៅសាលាដំបូងរាជធានីភ្នំពេញ ដើម្បីចាត់ការទៅតាមផ្លូវច្បាប់៕