កំពង់ឆ្នាំង: នៅថ្ងៃទី១៣ ខែកញ្ញា ឆ្នាំ២០២០ វេលាម៉ោង១៩និង១០នាទី មានករណីគ្រោះថ្នាក់ចរាចរណ៍មួយកើតឡើង រថយន្តបុករះម៉ូតូជាច្រើនគ្រឿង បណ្តាលឲ្យមានអ្នករងគ្រោះចំនួន៦នាក់ ត្រង់ចំណុចផ្លូវលេខ៥៣ ចន្លោះបង្គោលគីឡូម៉ែត្រលេខ ២៦-២៥ ស្ថិតក្នុងភូមិវាលស្បូវ ឃុំតាំងក្រសាំង ស្រុកទឹកផុស ខេត្តកំពង់ឆ្នាំង ។

ករណីគ្រោះថ្នាក់ចរាចរណ៍ខាងលើនេះ មានរថយន្តមួយគ្រឿងម៉ាក កាម៉ារី ពណ៌ក្រហម ពាក់ផ្លាកលេខ ង.៦១៧១ ភព២ បានធ្វើដំណើរតាមផ្លូវកើតហេតុ បណ្តាលឲ្យបុករះម៉ូតូ៣គ្រឿង បណ្តាលឲ្យរងរបួសធ្ងន់ស្រាលមនុស្សចំនួន៦នាក់ ។

ដំណើររឿង៖ នៅមុនពេលកើតហេតុ គេឃើញរថយន្តមួយគ្រឿង និងម៉ូតូ៣គ្រឿង បើកបរក្នុងទិសដៅបញ្រ្ចាសគ្នា ។ លុះមកដល់ចំណុចកើតហេតុ ស្រាប់តែរថយន្តបើកបុកម៉ូតូ៣គ្រឿង
បណ្តាលឲ្យរងរបួសអ្នកបើកបរម៉ូតូ និងអ្នករួមដំណើរចំនួន៦នាក់ ប្រុស៥នាក់ ស្រ្តីម្នាក់ ។ អ្នកបើកបររថយន្តត្រូវបានគេស្គាល់ឈ្មោះ សាយ ឧត្តមជីវ៉ា ភេទប្រុស អាយុ៣៧ឆ្នាំ មានទីលំនៅក្នុងភូមិដំពាក់ពពូល សង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។ ក្រោយពេលកើតហេតុ សមត្ថកិច្ចចាប់បានជនបង្កយកមកពិនិត្យជាតិអាកុលឃើញ ០.៥១ ក្រោយពីពិនិត្យរួច បានប្រគល់ឲ្យទៅជំនាញចរាចរណ៍ យកទៅកាន់ការិយាល័យចរាចរណ៍ផ្លូវគោក ខេត្តកំពង់ឆ្នាំងដើម្បីសួរនាំ ។ ដោយឡែកជនរងគ្រោះទាំង៦នាក់ ត្រូវបានដឹកបញ្ជូនទៅសង្រ្គោះនៅមន្ទីរពេទ្យ ។

ចំណែកវត្ថុតាង សមត្ថកិច្ចជំនាញស្រុក បានដកហូតយកទៅរក្សាទុក បណ្តោះអាសន្ននៅអធិការដ្ឋាននគរបាល ដើម្បីកសាងសំណុំរឿង ចាត់ការបន្តតាមនីតិវិធីច្បាប់៕