កណ្ដាលៈ យោងតាមផេករបស់អគ្គស្នងការដ្ឋាននគរបាលជាតិបានឲ្យដឹងថា
សមត្ថកិច្ចនគរបាលស្រុកអង្គស្នួលដឹកនាំដោយលោកវរសេនីយ៍ឯក មាន សំណាង អធិការនគរបាលស្រុក នៅព្រឹកថ្ងៃទី១៤ ខែតុលា ឆ្នាំ២០២០ នេះ បានចេញអន្តរាគមន៍សម្រួលចរាចរណ៍នៅលើកំណាត់ផ្លូវជាតិលេខ៤ជូនបងប្អូនប្រជាពល រដ្ឋ ខណៈដែលផ្លូវមួយខ្សែនេះកំពង់រងការជន់លិចដោយកន្លែង ។
លោក មាន សំណាង អធិការនគរបាលស្រុកអង្គស្នួលបានឲ្យដឹងថា ៖ ដោយអនុវត្តតាមបទបញ្ជារបស់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល នៅព្រឹកថ្ងៃទី១៤ ខែតុលា ឆ្នាំ២០២០នេះ លោកបានដឹកនាំកម្លាំងក្រោមឱវាទសហការជាមួយសមត្ថកិច្ចពាក់ព័ន្ធ ចេញអន្តរាគមន៍សម្រួលចរាចរណ៍ជូនពុកម៉ែបងប្អូនប្រជាពលរដ្ឋ ឆ្លងកាត់កំណាត់ផ្លូវជាតិលេខ៤ ដែលត្រូវបានជន់លិចដោយកន្លែង ដោយសារជំនន់ទឹកភ្លៀង ។
លោកអធិការបន្តថា ផ្លូវជាតិលេខ៤ដែលទទួលរងការជន់លិចនោះស្ថិតក្នុងភូមិព្រៃរការ ឃុំឆក់ឈេីនាង លិចប្រហែល ៥០០ម៉ែត្រ, ភូមិអង្គស្នួល ឃុំពើក លិចប្រហែល៥០០ ម៉ែត្រ និងភូមិត្រពាងភូមិ ឃុំពើក លិចប្រហែល ៥០០ម៉ែត្រផងដែរ ៕