ភ្នំពេញ: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា យុវជនម្នាក់ត្រូវបានកម្លាំងនគរបាលខណ្ឌដង្កោស្រាវជ្រាវឃាត់ខ្លួន ពាក់ព័ន្ធករណីប្រព្រឹត្តអំពើហិង្សាដោយចេតនាមានស្ថានទម្ងន់ទោស (ប្រើកាំបិតប៉័ងតោកាប់) ប្រព្រឹត្តកាលពីថ្ងៃទី២០ ខែធ្នូ ឆ្នាំ២០២០ វេលាម៉ោង១៩និង០៥នាទី ត្រង់ចំណុច បុរីពិភពថ្មី ផ្លូវលេខ០៨B ស្ថិតនៅភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ ។
ជនរងគ្រោះឈ្មោះ មឿន វិសិទ្ធ ភេទប្រុស អាយុ១៦ឆ្នាំ ជនជាតិខ្មែរ មុខរបរនៅផ្ទះ ទីលំនៅផ្ទះលេខ១៩០ ផ្លូវលេខ០៥ ភូមិក្រាំងស្វាយ សង្កាត់ព្រែកកំពឹស ខណ្ឌដង្កោ រាជធានីភ្នំពេញ ។ ចំណែកជនសង្ស័យឈ្មោះ ណារ៉ែន ភស្តា ភេទប្រុស អាយុ១៧ឆ្នាំ ទីលំនៅភូមិត្នោតជ្រុំ សង្កាត់បឹងទំពុន ខណ្ឌមានជ័យ រាជធានីភ្នំពេញ ។
បន្ទាប់ពីក្រុមគ្រួសារជនរងគ្រោះដាក់ពាក្យបណ្តឹង សមត្ថកិច្ចបានស្រាវជ្រាវរហូតមកដល់ថ្ងៃទី២៥ ខែធ្នូ ឆ្នាំ២០២០ វេលាម៉ោង១៧និង៣០នាទី ឃាត់ខ្លួនបានជនសង្ស័យ ឈ្មោះ ណារ៉ែន ភស្តា ភេទប្រុស អាយុ១៧ឆ្នាំ រួមនឹងម៉ូតូ០១គ្រឿងម៉ាកស្កូពី ពណ៌ខ្មៅ ពាក់ផ្លាកលេខភ្នំពេញ 1IC-0430 មានលេខតួ និងទូរស័ព្ទដៃម៉ាក IPHONE ពណ៌ខ្មៅ ចំនួន០១គ្រឿង ត្រង់ចំណុចខាងមុខផ្ទះជនសង្ស័យ ស្ថិតនៅភូមិត្នោតជ្រុំ សង្កាត់បឹងទំពុន ខណ្ឌមានជ័យ រាជធានីភ្នំពេញ យកមកធ្វើការសាកសួរនៅប៉ុស្តិ៍នគរបាលរដ្ឋបាលដង្កោតាមនីតិវិធីច្បាប់ ។
នៅចំពោះមុខសមត្ថកិច្ច ជនសង្ស័យបានឆ្លើយសារភាព ប្រាប់សមត្ថកិច្ចថា រូបគេ (ជនសង្ស័យ) និងបក្ខពួកពិតជាបានធ្វើសកម្មភាពប្រើកាំបិតប៉័ងតោកាប់ទៅលើជនរងគ្រោះ ប្រាកដមែន ។
ករណីនេះ កម្លាំងជំនាញបានកសាងសំណុំរឿងបញ្ជូនទៅជនសង្ស័យទៅអធិការដ្ឋាននគរបាលខណ្ឌដង្កោ ដើម្បីបន្តតាមនីតិវិធី ៕
មតិយោបល់