ភ្នំពេញ: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា បុរសម្នាក់ជាមុខសញ្ញាប្រើប្រាស់គ្រឿងញៀនបម្រុងយកដាវសាំម៉ូរ៉ៃកាប់ម្តាយបង្កើតនិងប្រពន្ធ ដោយសារជម្លោះតិចតួចក្នុងគ្រួសារ តែត្រូវបានកម្លាំងនគរបាលខណ្ឌប្ញស្សីកែវ ចុះអន្តរាគមន៍ឃាត់ខ្លួន ។
យោងតាមរបាយការណ៍របស់អធិការដ្ឋាននករបាលខណ្ឌប្ញស្សីកែវឱ្យដឹងថា នៅវេលាម៉ោង៩និង៣០នាទីយប់ថ្ងៃទី០៤ ខែមករា ឆ្នាំ២០២១ ត្រង់ចំណុចផ្ទះជួលមួយកន្លែង ផ្លូវបេតុង ក្រុម៣ ភូមិឡកំបោរ សង្កាត់ស្វាយប៉ាក ខណ្ឌប្ញស្សីកែវ រាជធានីភ្នំពេញមានជនសង្ស័យម្នាក់ឈ្មោះ ទេព បូរិន ហៅ ចាម ភេទប្រុស អាយុ៣៣ឆ្នាំ ជនជាតិខ្មែរ ស្នាក់នៅផ្ទះជួល កើតហេតុខាងលើ មុខរបរមិនពិតប្រាកដ (មានសារធាតុញៀន) ។
ខណ:ដែលគ្រួសារនៅក្នុងផ្ទះមានជម្លោះតិចតួច ក៏ស្រាប់តែជនសង្ស័យដែលមានអាកប្បកិរិយាកាចសាហាវដោយគ្រឿងញៀន បានទាញយកដាវសាំម៉ូរ៉ៃដែលខ្លួនបានលាក់ទុកនៅក្នុងផ្ទះយូរហើយនោះ មកគំរាមរកកាប់ម្តាយ និងប្រពន្ធ តែពេលនោះត្រូវបានកម្លាំងនគរបាលខណ្ឌឫស្សីកែវចេញអន្តរាគមន៍ទាន់ពេលវេលា។
ជនសង្ស័យត្រូវបានចាប់បញ្ជូនយកទៅចាត់ការតាមផ្លូវច្បាប់ រងការចោទប្រកាន់ពីបទកាន់កាប់អាវុធដោយខុសច្បាប់(ដាវសាំម៉ូរ៉ៃ) ៕
មតិយោបល់