ផ្ទះ ព័ត៌មានជាតិ របួសធ្ងន់​ស្រ...

របួសធ្ងន់​ស្រាល​ចំនួន​ ៦​នាក់​ ក្នុង​ឧបទ្ទវហេតុ​រថយន្ត​ប៉ះទង្គិច​ជាមួយ​គោ​យន្ត​កន្ត្រៃ​ នៅ​ក្រុង​សិរី​សោភ័ណ​

0

​បន្ទាយ​មាន​ជ័យ:​ យោងតាមផេកអគ្គស្នងការដ្ឋាននគរបាលជាតិបានឲ្យដឹងថា យ៉ាង​ហោច​ណាស់​ក៏​មាន​មនុស្ស​ប្រុស​ ស្រី​ចំនួន​០៦​នាក់​ បាន​រង​របួសធ្ងន់​-​ស្រាល​ ក្នុង​ឧបទ្ទវហេតុ​គ្រោះថ្នាក់​ចរាចរណ៍​រវាង​រថយន្ត​ប៉ះទង្គិច​ជាមួយ​គោ​យន្ត​កន្ត្រៃ​ពីក្រោយ​ ។​

ហេតុការណ៍​គ្រោះថ្នាក់​ចរាចរណ៍​នេះ​បាន​កើតឡើង​នៅ​វេលា​ម៉ោង​១៩​និង​២០​នាទី​ ថ្ងៃ​ទី​១២​ ខែមករា​ ឆ្នាំ​២០២១​ នៅ​លើ​កំណាត់​ផ្លូវជាតិ​លេខ​៥៦A​ ស្ថិត​ចំណុច​ផ្លូវ​ប្រសព្វ​មុខ​ក្លោ​ង​ទ្វារ​វត្ត​ម្កាក់​ ក្នុងភូមិ​ដូន​ឡី​ សង្កាត់​ម្កាក់​ ក្រុង​សិរី​សោភ័ណ​ ខេត្តបន្ទាយមានជ័យ​ ។​

​លោក​វរសេនីយ៍ទោ​ សួន​ នី​ប៉ូ​ នាយ​រង​ការិយាល័យ​ នគរបាល​ចរាចរណ៍​ជើង​គោក​ខេត្ត​ បាន​ឲ្យ​ដឹង​ថា​ នៅ​មុន​ពេល​កើតហេតុ​មាន​រថយន្ត​០១​គ្រឿង​ម៉ាក​ឡុ​ច​ស៊ី​ស​ RX.300​ ពណ៌​ស​ ពាក់​ស្លាក​លេខ​ភ្នំពេញ​ 2U-0799​ អ្នកបើកបរ​មិន​ត្រូវ​បាន​គេ​ស្គាល់​អត្តសញ្ញាណ​(​បន្ទាប់​ពី​កើតហេតុ​រត់គេច​ខ្លួន​បាត់​)​ ចំណែក​គោ​យន្ត​កន្ត្រៃ​មាន​ផ្ទុក​មនុស្ស​ចំនួន​០៦​នាក់​ ។​

​លោកនាយ​ការិយាល័យ​បាន​បញ្ជាក់​ថា​ មុន​ពេល​កើតហេតុ​ ភាគី​រថយន្ត​បាន​ធ្វើ​ដំណើរ​ក្នុង​ទិស​ដៅ​ពី​ជើង​ទៅ​ត្បូង​ក្នុង​ល្បើ​ន​លឿន​ ដល់​កន្លែង​កើតហេតុ​ជា​ចំណុច​ផ្លូវ​ប្រសព្វ​មុខ​ក្លោ​ង​ទ្វារ​ចូល​វត្ត​ម្កាក់​ សង្កាត់​ម្កាក់​ គោ​យន្ត​កន្ត្រៃ​បាន​ប្តូរ​គន្លង​បត់​ឆ្វេង​ដោយ​ខ្វះ​ការ​ប្រុង​ប្រយ័ត្ន​ បណ្តាល​ឲ្យ​រថយន្ត​ជាន់​ហ្វ្រាំង​មិន​ទាន់​បុក​ពេញទំហឹង​ រង​របួស​មនុស្ស​ទាំង​អ្នកបើកបរ​និង​អ្នក​រួម​ដំណើរ​០៦​នាក់​ ក្នុង​នោះ​របួសធ្ងន់​០៣​នាក់​ ស្រី​០១​នាក់​ និង​របួសស្រាល​០៣​នាក់​ ត្រូវ​បាន​បញ្ជូន​ទៅ​សង្គ្រោះ​នៅ​មណ្ឌល​សុខភាព​ម្កាក់​ ។​

​បច្ចុប្បន្ន​ រថយន្ត​និង​គោ​យន្ត​កន្ត្រៃ​ខូចខាត​ធ្ងន់​ទាំង​០២​គ្រឿង​ ត្រូវ​បាន​សមត្ថកិច្ច​យក​មក​រក្សា​ទុក​នៅ​អធិការដ្ឋាន​នគរបាល​ក្រុង​សិរី​សោភ័ណ​ រង់ចាំ​ធ្វើការ​ដោះស្រាយ​តាម​នីតិវិធី​នៅ​ពេល​ក្រោយ​ ៕

មតិយោបល់