ភ្នំពេញៈ ខណៈដែលសំ ប៉ូលីដា ត្រូវបានគេដឹងថាធ្លាក់ខ្លួនដុនដាបទាំងជីវភាព និងមានរបួសពេលខ្លួន អ្នកនាងខាត់ សុឃីម ក៏បានរំលឹកពីប្រវត្តិដើរដេកតាមបា ដែលអ្នកនាងធ្លាប់ប្រឡូកជាមួយមិត្តចាស់រួមមានអ្នកនាងសំ ប៉ូលីដាជាដើមក្នុងពេលទើបនឹងហក់ចូលសិល្បៈដំបូង។ អ្នកនាងបញ្ជាក់ថាមើលឃើញសភាពចុងក្រោយរបស់សំ ប៉ូលីដា ធ្វើឲ្យអ្នកនាងនឹកដល់ប្រវត្តិដេកតាមបាតែម្ដង។

អ្នកនាងនិយាយថាក្នុងអំឡុងឆ្នាំ១៩៩៦ អ្នកនាង និងអ្នកនាងសំ ប៉ូលីដា ព្រមទាំងតារារួមជំនាន់រួមមានអ្នកនាងចេង ចាន់នាង អ្នកនាងជា សុវណ្ណា និងតារារួមជំនាន់ គ្រាន់តែជាអ្នកចម្រៀងយ៉ាងសាមញ្ញនៅក្នុងបានាគព័ន្ធ ឬរង្គសាលនាគព័ន្ធ។ ក្នុងចំណោមអ្នកចម្រៀងទាំងនោះ អ្នកនាងថាមានតែអ្នកនាង និងអ្នកនាងសំ ប៉ូលីដា ដែលអត់មានផ្ទះនៅភ្នំពេញហើយត្រូវបានថៅកែអនុញ្ញាតិឲ្យសម្រាកទាំងយប់ទាំងថ្ងៃនៅកន្លែងធ្វើការ។ អ្នកនាងនិយាយថាស្ថានភាពដេកក្នុងបានាពេលនោះ គឺមិនមានលក្ខណៈសមរម្យនោះទេ ដោយត្រូវដេករួមគ្នាជាមួយអ្នករត់តុ និងក្រុមចុងភៅជាដើមគឺមិនខុសពីសភាពដែលអ្នកនាងសំ ប៉ូលីដា ត្រូវគេឲ្យដាក់ប៉ៅអ៊ីសម្រាកនៅក្នុងប៊ៀហ្គាឌិន ដែលអ្នកនាងកំពុងដេកឈឺនោះឡើយ។

អ្នកនាងនិយាយថា«ខ្ញុំមិននឹកស្មានថាបង សំ ប៉ូលីដា គាត់ធ្លាក់ដល់ដំណាក់កាលនឹងទេ ព្រោះក្នុងចំណោមអ្នករួមអាជីពក្នុងជំនាន់ខ្ញុំទាំងអស់ បងដាគាត់កាលីបជាងគេ បើទោះជាគាត់ និងខ្ញុំត្រូវដេកក្នុងបាអត់ផ្ទះអត់សម្បែងដូចគ្នាក៏ដោយ និយាយរួមខ្ញុំមកពីបាសិត ហើយគាត់មកពីបាត់ដំបង ប៉ុន្តែបងដាគាត់ស្អាតជំនាន់ហ្នឹង ហើយសំណាងណាស់ បើគេបានធីប៥ដុល្លារ គាត់បាន២០ ព្រោះគាត់ស្អាត ហើយភ្ញៀវចូលចិត្តជាងគេ!»។ អ្នកនាងថារលឹកដល់ជីវិតនៅច្រៀងតាមបា និងដេកតាមបា គឺអ្នកនាងមិនដែលស្មានថាអ្នកនាងនឹងមានថ្ងៃនេះ ហើយមិត្តរួមអាជីពផ្សេងទៀត ដូចជាអ្នកនាង សំ ប៉ូលីដា ជាដើម បែរជាធ្លាក់ដល់សភាពនេះឡើយ។ អ្នកនាងនិយាយថា«ម៉ាអ្នកច្រៀងបា និងដើរដេកតាមបាជំនាន់នោះ ខ្ញុំអត់ដែលគិតថាពួកគាត់ដូចជាសំ ប៉ូលីដា ជាដើមធ្លាក់ដល់ប៉ុណ្ណឺងទេ អ៊ីចឹងហើយទើបខ្ញុំខ្លោចចិត្ត ថាហេតុអ្វីបងដាគាត់មានជីវិតបែបហ្នឹង!»។ អ្នកនាងថាបើទោះសំ ប៉ូលីដា ទទួលគ្រោះថ្នាក់ដោយសារប្ដីវាយ ឬគ្រោះថ្នាក់អីក៏ដោយ ប៉ុន្តែអ្នកនាងពិតជាស្ថិតក្នុងសភាពក្រីក្រ និងខ្វះដែលគួរតែមានការយកចិត្តទុកដាក់។

អ្នកនាង ខាត់ សុឃីម បញ្ជាក់ថាក្នុងចំណោមតារាដែលបានប្រឡូកអាជីពសិល្បៈជាមួយអ្នកនាងកាលជំនាន់នៅបា គឺអ្នកនាង សំ ប៉ូលីដា ម្នាក់ប៉ុណ្ណោះ ដែលមានទេពកោសល្យស្រដៀងខ្លួន ទាំងការចេះច្រៀងភ្លេងការ ចេះធ្វើតួយាយផាន់ ទាំងចេះធ្វើតួយក្ខិនី និងកំប្លែង។ អ៊ីចឹងហើយទើបអ្នកនាងចង់ស្រក់ទឹកភ្នែកនៅពេលតារាស្រីរូបនេះ ធ្លាក់ដល់ប្រវត្តិកំសត់ជាថ្មីគឺកំសត់ជាងកាលអ្នកនាងនៅសម្រាកតាមបានោះ៕