ភ្នំពេញៈ នៅវេលាម៉ោង១និង០០នាទីយប់ថ្ងៃទី០៩ ខែមីនា ឆ្នាំ២០២១ មានករណីគ្រោះថ្នាក់ចរាចរណ៍មួយកើតឡើង រថយន្តព្រូស១គ្រឿង បើកបរក្នុងល្បឿនលឿន ជ្រុលបុកបង្គោលថ្ម នៅចិញ្ចើមផ្លូវបាក់អស់៦ដើម បណ្តាលឲ្យធ្លាក់ចូលទឹកប្រឡាយ រងការខូចខាតយ៉ាងដំណំ ស្ថិតតាមបណ្ដោយផ្លូវ៥០ម៉ែត្រ ក្នុងភូមិអន្លង់គងថ្មី សង្កាត់ព្រៃស ខណ្ឌដង្កោ រាជធានីភ្នំពេញ ។

នៅមុនពេលកើតហេតុ គេឃើញបុរសម្នាក់បើកបររថយន្ត តូយ៉ូតាព្រូស១គ្រឿង ពណ៌ក្រហម ពាក់ផ្លាកលេខភ្នំពេញ 2BD-5098 ធ្វើដំណើរទិសដៅពីជើងទៅត្បូង ក្នុងល្បឿនយ៉ាងលឿនដូចហោះ លុះបើកបរមកដល់ត្រង់ចំណុចកើតហេតុ បានរេចង្កូតមកខាងស្ដាំដៃ ជ្រុលទៅបុកបង្គោលថ្ម នៅចិញ្ចើមផ្លូវបាក់អស់៦ដើម ចំណែករថយន្តធ្លាក់ចូលទឹកប្រឡាយ បណ្តាលឲ្យរងការខូចខាតយ៉ាងដំណំ រីឯតៃកុងរថយន្តរងរបួសផងដែរ ។

ក្រោយពេលកើតហេតុ សមត្ថកិច្ចជំនាញចុះធ្វើការវាស់វែង យករថយន្តទៅរក្សាទុក ជាបណ្តោះអាសន្ន នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ទៅតាមនីតិវិធីផ្លូវច្បាប់ ៕