បាត់ដំបង: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា នៅថ្ងៃទី០១ ខែឧសភា ឆ្នាំ២០២១ មានករណីគ្រោះថ្នាក់ចរាចរណ៍២លើក កើតឡើងនៅស្រុកកំរៀង និងស្រុកបវេល បណ្តាលឲ្យមនុស្ស២នាក់ បានស្លាប់បាត់បង់ជីវិតភ្លាមៗ នៅកន្លែងកើតហេតុ ។
គ្រោះថ្នាក់ចរាចរណ៍ទី១ កើតឡើងនៅវេលាម៉ោង១៨និង៤៥នាទី លើផ្លូវលេខ១៥៩C ត្រង់ចំណុចភូមិរាមសេនា ឃុំល្វា ស្រុកបវេល រវ៉ាងម៉ូតូនិងម៉ូតូ បង្កដោយម៉ូតូម៉ាកហុងដា C១២៥ ពណ៌ខ្មៅ ពាក់ផ្លាកលេខ បាត់ដំបង 1J-0444 បើកបរដោយឈ្មោះ ញើង ប៊ុនលី ភេទស្រី អាយុ៦៥ឆ្នាំ នៅភូមិដូនអោក ឃុំល្វា ស្រុកបវេល បានបើកម៉ូតូបត់ឆ្វេង (ប្ដូរទិស) ឆ្លងផ្លូវបណ្ដាលឲ្យបុកម៉ូតូម៉ាកហុងដា C១២៥ ពណ៌ខ្មៅ ពាក់ផ្លាកលេខ បន្ទាយមានជ័យ 1U-5116 បើកបរដោយឈ្មោះ លី សេងឡុង ភេទប្រុស អាយុ១៩ឆ្នាំ នៅភូមិកគោ ឃុំជ្រៃ ស្រុកថ្មគោល (រងរបួសស្រាល) បុកនឹងម៉ូតូបង្កខាងលើស្លាប់ នៅកន្លែងកើតហេតុ ។
សមត្ថកិច្ចបានបញ្ជាក់ឲ្យដឹងថា ម៉ូតូបង្កបើកបរដោយស្ត្រីវ័យ៦៥ឆ្នាំ ប្ដូរទិសឆ្លងផ្លូវមិនប្រុងប្រយ័ត្នទើបបណ្តាលទៅបុកម៉ូតូរបស់យុវជនវ័យ១៩ឆ្នាំ ។ ក្នុងហេតុការណ៍នេះ ស្ត្រីខាងលើបានស្លាប់បាត់បង់ជីវិតភ្លាមៗ នៅកន្លែងកើតហេតុ ។
ករណីទី២ កើតឡើងនៅវេលាម៉ោង១៩និង១៥នាទី ត្រង់ចំណុចផ្លូវវិស្វកម្មក្រាលគ្រួសក្រហម ចេញពីផ្លូវជាតិលេខ៥៧B ភូមិកំប្រង់ ឃុំតាក្រី ឆ្ពោះទៅឃុំបួរ ស្រុកភ្នំព្រឹក ស្ថិតក្រុមទី៧ ភូមិកំប្រង់ ឃុំតាក្រី ស្រុកកំរៀង ខេត្តបាត់ដំបង គ្រោះថ្នាក់ចរាចរណ៍នេះបង្កឡើងដោយរថយន្តស៊ឺមីរ៉ឺម៉កនិងម៉ូតូ ។ ម៉ូតូរងគ្រោះម៉ាកហុងដាឃ្លិច ពណ៌ស ពាក់ផ្លាកលេខ បាត់ដំបង 1AJ-7237 បើកបរដោយឈ្មោះ ខៀវ ម៉ាក ភេទប្រុស អាយុ ១៧ឆ្នាំ រស់នៅភូមិកំប្រង់ ឃុំតាក្រី ស្រុកកំរៀង ខេត្តបាត់ដំបង ( ស្លាប់នៅកន្លែងកើតហេតុ) បានបុកពីក្រោយរ៉ឺម៉ករថយន្ត ម៉ាកហ៊ីយ៉ាន់ដាយ Hyundai ពណ៌ស ពាក់ផ្លាកលេខ កំពង់ចាម 3A-7228 កន្ទុយរ៉ឺម៉កពាក់ផ្លាកលេខ កំពង់ចាម 4A-0420 ។ ក្នុងហេតុការណ៍នេះ អ្នកបើកម៉ូតូដែលជិះទៅបុកពីក្រោយរ៉ឺម៉កនោះបានស្លាប់បាត់បង់ជីវិតនៅកន្លែងកើតហេតុ ចំណែកអ្នកបើកបររថយន្តហ៊ីយ៉ាន់ដាយបានរត់គេចខ្លួនបាត់ ។
ករណីគ្រោះថ្នាក់ចរាចរណ៍ទាំងពីរខាងលើ កម្លាំងជំនាញនៃអធិការដ្ឋាននគរបាលស្រុកកំរៀង និងស្រុកបវេលបានចុះធ្វើការត្រួតពិនិត្យនិងវាស់វែង រួចដកហូតមធ្យោបាយបង្កទាំងអស់យកមករក្សា នៅអធិការដ្ឋាននគរបាលស្រុក ដើម្បីកសាងសំណុំរឿងបញ្ជូនទៅការិយាល័យជំនាញ នៃស្នងការដ្ឋាននគរបាលខេត្ត ។
ចំណែកសាកសពជនរងគ្រោះ ត្រូវបានប្រគល់ជូនទៅឲ្យក្រុមគ្រួសារ ដើម្បីយកទៅធ្វើបុណ្យតាមប្រពៃណី ៕
មតិយោបល់