ផ្ទះ ព័ត៌មានជាតិ បង្ក្រាប​ក្រុ...

បង្ក្រាប​ក្រុមជនសង្ស័យចំនួន​១២​នាក់​ ពាក់ព័ន្ធ​ករណី​ធ្វើសកម្មភាពស្ទាក់​វាយ​ប្លន់​យក​ម៉ូតូ​

0

​កំពង់ចាម: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា​ កម្លាំង​នគរបាល​ព្រហ្មទណ្ឌ​នៃ​ស្នងការដ្ឋាន​នគរបាល​ខេត្តកំពង់ចាម​ បាន​ស្រាវជ្រាវ​បង្ក្រាប​ក្រុម​ជនសង្ស័យ​ ក្នុង​ករណី​លួច​មាន​ស្ថាន​ទម្ងន់ទោស​ (​ស្ទាក់​វាយ​ប្លន់​យក​ម៉ូតូ​)​ នៅ​ថ្ងៃ​ទី​១៩​ ខែឧសភា​ ឆ្នាំ​២០២១​ វេលា​ម៉ោង​១៨​ និង​១៥​ នាទី​ នៅ​ភូមិ​បា​ធា​យ​ ឃុំ​បា​ធា​យ​ ស្រុក​បា​ធា​យ​ ខេត្តកំពង់ចាម​ ។​

​សមត្ថកិច្ច​បាន​ឲ្យ​ដឹង​ថា​ បន្ទាប់​ពី​ទទួល​បាន​ព័ត៌មាន​ខាងលើ​ លោក​ឧត្ដមសេនីយ៍ទោ​ ឯម​ កុសល​ ស្នងការ​នគរបាល​ខេត្តកំពង់ចាម​ បាន​ដាក់​បទបញ្ជា​ដល់​ កម្លាំង​ជំនាញ​របស់​ផែន​ការងារ​នគរបាល​ព្រហ្មទណ្ឌ​ ដឹកនាំ​ដោយ​លោក​ឧត្តមសេនីយ៍ត្រី​ ហេង​ វុ​ទ្ធី​ ស្នងការ​រង​ទទួល​ផែន​ការងារ​នគរបាល​ព្រហ្មទណ្ឌ​ និង​លោក​វរសេនីយ៍ឯក​ ថា​ញ់​ សុខ​វុន​ នាយការិយាល័យ​នគរបាល​ស្រាល​ និង​កម្លាំង​ជំនាញ​របស់​អធិការដ្ឋាន​នគរបាល​ស្រុក​បា​ធា​យ​ ដឹកនាំ​ដោយ​លោក​វរសេនីយ៍ឯក​ សំ​ ណា​ល់​ អធិការ​នគរបាល​ស្រុក​បា​ធា​យ​ សហការ​ជាមួយ​កម្លាំង​ជំនាញ​របស់​ការិយាល័យ​នគរបាល​ព្រហ្មទណ្ឌ​កម្រិត​ធ្ងន់​ នៃ​នាយកដ្ឋាន​នគរបាល​ព្រហ្មទណ្ឌ​ ក្រសួងមហាផ្ទៃ​ ដោយ​ក្នុង​កិច្ច​ប្រតិបត្តិការ​ ក្រោម​ការ​ដឹកនាំ​សម្របសម្រួល​នីតិវិធី​ដោយ​លោក​ ហាក់​ ហ៊ាន់​ ព្រះរាជអាជ្ញា​រង​ នៃ​អយ្យការ​អម​សាលាដំបូង​ខេត្តកំពង់ចាម​ ។​

​ជា​លទ្ធផល​នៃ​ប្រតិបត្តិការ​ខាងលើ​ កម្លាំង​សមត្ថកិច្ច​បាន​ធ្វើការ​ឃាត់ខ្លួន​ជនសង្ស័យ​ចំនួន​១២​នាក់​ ដកហូត​វត្ថុ​តាង​រួម​មាន​៖​ ម៉ូតូ​ជា​មធ្យោបាយ​ជិះ​ធ្វើ​សកម្មភាព​ ចំនួន​០៤​គ្រឿង​ និង​ម៉ូតូ​របស់​ជន​រង​គ្រោះ​ ចំនួន​០១​គ្រឿង​ ។​

​បន្ទាប​ពី​ទទួល​បាន​ឆ្លើយ​សារភាព​ថា​ កន្លង​មក​ពួក​ខ្លួន​ធ្លាប់​ធ្វើ​សកម្មភាព​ដេញ​ស្ទាក់​វាយ​ប្លន់​យក​ម៉ូតូ​ នៅ​ក្នុងភូមិ​សាស្ត្រ​ស្រុក​បា​ធា​យ​ និង​ស្រុក​ជើងព្រៃ​ បាន​ចំនួន​០២​លើក​ គឺ​ ៖

-​លើក​ទី​១​ ៖​ នៅ​ថ្ងៃ​ទី​៨​ ខែឧសភា​ ឆ្នាំ​២០២១​ វេលា​ម៉ោង​២២​ និង​០០​នាទី​ នៅ​ចំណុច​តាម​ផ្លូវ​ក្បែ​រោងចក្រ​ជូ​ហួយ​ ស្ថិត​ក្នុងភូមិ​រវាង​ ឃុំ​ខ្នុរ​ដំបង​ ស្រុក​ជើងព្រៃ​ ខេត្តកំពង់ចាម​ ។​

-​លើក​ទី​២​ ៖​ នៅ​ថ្ងៃ​ទី​១៩​ ខែឧសភា​ ឆ្នាំ​២០២១​ វេលា​ម៉ោង​១៨​ និង​១៥​នាទី​ នៅ​ចំណុច​តាម​ផ្លូវជាតិ​លេខ​៦​ ស្ថិត​នៅ​ក្នុងភូមិ​បា​ធា​យ​ ឃុំ​បា​ធា​យ​ ស្រុក​បា​ធា​យ​ ខេត្តកំពង់ចាម​ ។​

​បច្ចុប្បន្ន​ ជនសង្ស័យ​ទាំង​១២​នាក់​ រួម​នឹង​វត្ថុ​តាង​ខាងលើ​ ត្រូវ​បាន​បញ្ជូន​ទៅ​កាន់​សាលាដំបូង​ខេត្តកំពង់ចាម​ ដើម្បី​ចាត់ការ​តាម​នីតិវិធី​ ៕

មតិយោបល់