ឧត្តរមានជ័យ: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា ស្ថានីយប្រេងឥន្ធន:មួយកន្លែង ជាកម្មសិទ្ធិរបស់ឈ្មោះ ពេជ្រ តុន ស្ថិតក្នុងភូមិថ្នល់កែង ឃុំអន្លង់វែង ស្រុកអន្លង់វែង ខេត្តឧត្តរមានជ័យ រងការឆាបឆេះ បណ្តាលឲ្យមនុស្សរបួសធ្ងន់ចំនួន០២នាក់(ស្រី០១នាក់) ។
ហេតុការណ៍កើតឡើង នៅវេលាម៉ោង១២និង៣០នាទី ថ្ងៃទី០៦ ខែមិថុនា ឆ្នាំ២០២១ បណ្តាលមកពីការឆ្លងចរន្តអគ្គិសនី ក្នុងពេលកំពុងបង្ហូរសាំងចេញពីរថយន្តចូលទៅក្នុងស៊ីទែនស្តុកសាំង ។
ជនរងគ្រោះមានឈ្មោះ សំ កុសល ភេទប្រុស អាយុ២៦ឆ្នាំ រស់នៅភូមិអូរជញ្ជៀន ឃុំ/ស្រុកអន្លង់វែង ខេត្តឧត្តរមានជ័យ មុខរបរ តៃកុងរថយន្តដឹកស៊ាំង ( រងរបួសធ្ងន់ត្រង់ដងខ្លួន ) និងទី២ឈ្មោះ ឈាន ថានុង ភេទស្រី អាយុ១៥ឆ្នាំ រស់នៅភូមិថ្នល់បំបែក ឃុំ/ស្រុកអន្លង់វែង ខេត្តឧត្តរមានជ័យ មុខរបរ កម្មករចាក់សាំង (រងរបួសធ្ងន់ ឆេះពេញខ្លួន) ។
បន្ទាប់ពីកើតហេតុ កម្លាំងអធិការដ្ឋាននគរបាលស្រុកអន្លង់វែង ដឹកនាំរួមដោយលោក វរសេនីយ៍ឯក ស៊ីម វណ្ណ: អធិការនគរបាលស្រុក សហការជាមួយកម្លាំងចម្រុះ បានចុះអន្តរាគមន៍ពន្លត់ភ្លើងបានទាន់ពេលវេលា ដោយប្រើប្រាស់រថយន្តពន្លត់អគ្គិភ័យរបស់អធិការដ្ឋានស្រុកអន្លង់វែងចំនួន០១គ្រឿង បាញ់ទឹកអស់ចំនួន ០៣ រថយន្ត ៕
មតិយោបល់