ភ្នំពេញៈ ជនសង្ស័យចំនួន០៤នាក់ បានបើកម៉ូតូសណ្តោងរ៉ឺម៉កមួយគ្រឿង មកធ្វើសកម្មភាព ចូលទៅលួចដែកក្នុងការដ្ឋាន សំណង់មួយកន្លែង រួចព្យាយាមបើកគេចខ្លួន កាលពីវេលាម៉ោង០២ យប់រំលងអធ្រាត្រឈានចូលថ្ងៃទី០៤ ខែសីហា ឆ្នាំ២០២១ នៅចំណុចមុខវិទ្យាល័យ ឈូកវ៉ា១ ក្នុងសង្កាត់គោករការ ខណ្ឌព្រែកព្នៅ រាជធានីភ្នំពេញ ។

ករណីខាងលើនេះ កម្លាំងសមត្ថកិច្ចប៉ុស្តិ៍គោករកា និងកម្លាំងប្រជាការពារសង្កាត់ កំពុងល្បាតនៅក្នុងមូលដ្ឋាន បានសហការ ដេញប្រភិតចាប់ប្រភីង តែត្រូវបានជនសង្ស័យ យកដែកដែលលួចបានគប់ទៅលើសមត្ថកិច្ច រារាំងមិនឲ្យចាប់ខ្លួនបាន រហូតដល់ចំណុចផ្លូវបេតុង ចូលកន្លែងចាក់សំរាមចាស់ ក្នុងសង្កាត់ស្ទឹងមានជ័យទី២ ខណ្ឌមានជ័យ ទើបសមត្ថកិច្ចឃាត់ខ្លួនបានម្នាក់ និងរ៉ឺម៉កមួយគ្រឿង ចំណែកបក្ខពួក០៣នាក់ផ្សេងទៀត បានរត់គេចខ្លួនបាត់ ។

ក្រោយពីឃាត់ខ្លួនជនសង្ស័យបានហើយ កម្លាំងសមត្ថកិច្ចបានបញ្ជូនជនសង្ស័យ និងវត្ថុតាងទៅប៉ុស្តិ៍នគរបាលរដ្ឋបាលគោករកា ដើម្បីចាត់ការបន្តតាមនីតិវិធីផ្លូវច្បាប់ ៕