ភ្នំពេញ: ករណីគ្រោះថ្នាក់ចរាចរណ៍ ដែលនៅតែខាងជនរងគ្រោះ ជនបង្កគេចបាត់កើតឡើងរវាងរថយន្តមិនចាំម៉ាក បានបុកម៉ូតូ២គ្រឿង បណ្តាលឲ្យរងរបួសស្រ្តី២នាក់ កើតហេតុកាល ពីវេលាម៉ោង២និង០០នាទីរសៀល ថ្ងៃទី៤ ខែសីហា ឆ្នាំ២០២១ ទីតាំងស្ថិតនៅតាមបណ្តោយផ្លូវបេតុង ស្របផ្លូវរថភ្លើង ក្នុងភូមិកាកាប សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មាន នៅមុនពេលកើតហេតុ គេបានឃើញ ម៉ូតូ២គ្រឿងខាងលើ ដែលម្ខាងម៉ាកគុបជ្រុង ពណ៌ទឹកប្រាក់ ពាក់ស្លាកលេខ ភ្នំពេញ 1Q-2818 បើកបរដោយស្រ្តីម្នាក់ និងម៉ូតូមួយគ្រឿងទៀត ម៉ាកនិច ពាក់ស្លាកលេខ ភ្នំពេញ 1FF-3058 បើកបរដោយស្រ្តីម្នាក់ដូចគ្នា ដែលមានទិសដៅពីកើតទៅលិចទាំង២នាក់រហូតមកដល់ចំណុចកើតហេតុ ស្រាប់តែមានរថយន្តមិនចាំម៉ាក និងស្លាកលេខ បើកបរទិសដៅពីលិចទៅកើតបុកម៉ូតូគ្រុបជ្រុង រួចខ្ទាតទៅត្រូវម៉ូតូនិច បណ្តាលឲ្យរងការខូចខាតយ៉ាងដំណំ និងអ្នកបើកបរម៉ូតូរងរបួសបញ្ជូន ទៅសង្រ្គោះទាំង២នាក់ភ្លាមៗផងដែរ ។ ចំណែកជនបង្កបើកគេចខ្លួនបាត់ស្រមោល ។

ក្រោយកើតហេតុ សមត្ថកិច្ចមូលដ្ឋាន និងជំនាញចរាចរណ៍ នៃអធិការដ្ឋាននគរបាលខណ្ឌពោធិ៍សែនជ័យ ចុះធ្វើការវែងយករក្សាទុក ដើម្បីរង់ចាំប្រគល់ជូនម្ចាស់វិញ និងស្វែងរកជនបង្កការដោះស្រាយតាមនីតិវិធី ៕