ភ្នំពេញៈ នៅវេលាម៉ោងប្រមាណ​១១និង១២នាទីព្រឹកថ្ងៃទី១៣ ខែសីហា ឆ្នាំ២០២១ មានករណីហិង្សាមួយកើតឡើង ប្តីប្រពន្ធមួយគូ បានឈ្លោះប្រកែកគ្នា ឪពុកចូលទៅឃាត់ ស្រាប់តែត្រូវនឹងកូនកាំបិតមុត បណ្តាលឲ្យដាច់ខ្យល់ស្លាប់ ខណៈបញ្ជូនទៅកាន់មន្ទីរពេទ្យ ស្ថិតត្រង់ចំណុចផ្ទះល្វែងមួយកន្លែង តាមបណ្តោយផ្លូវប៉េតុង ក្នុងភូមិត្នោតជ្រុំ៤ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ ។

សពជនរងគ្រោះឈ្មោះ ប៊ុន សុវណ្ណា ភេទប្រុស អាយុ ៥៩ឆ្នាំ ។ ជនសង្ស័យទាំងពីរនាក់ ត្រូវជាកូនប្រសារនិងកូនបង្កើតមានឈ្មោះ ប៊ុន សូហ្វែរ ភេទស្រី អាយុ២៨ឆ្នាំ កូនបង្កើតជនរងគ្រោះ និងឈ្មោះ ហេង សៅរស្មី ភេទប្រុស អាយុ៣១ឆ្នាំ (ត្រូវជាកូនប្រសារ) ។

ដំណើររឿងហេតុ៖ នៅមុនពេលកើតហេតុ ប្តីប្រពន្ធទាំងពីរនាក់ខាងលើនេះ បានឈ្លោះប្រកែកគ្នា រហូតកើតជាហិង្សា ជេរនិងវាយតប់គ្នា ។ ខណៈនោះឪពុកបានឮក៏ដើរចូលទៅឃាត់ កុំអោយឈ្លោះប្រកែកគ្នា ក៏ស្រាប់តែត្រូវនឹងកូនកាំបិតសាំងគីម បណ្តាលឲ្យមុតជាច្រើនជាកន្លែងរងរបួសធ្ងន់ និងហូរឈាមស្រោចពេញខ្លួន ។ ភ្លាមៗនោះប្តីប្រពន្ធទាំងពីរនាក់ បានដឹកជនរងគ្រោះ ជាឪពុកទៅកាន់មន្ទីរពេទ្យដើម្បីសង្គ្រោះ ។ ប៉ុន្តែបានដាច់ខ្យល់ស្លាប់បាត់ទៅហើយ និងដឹកសពត្រឡប់មកផ្ទះវិញ រាយការណ៍ជូន សមត្ថកិច្ច ។

ក្រោយពេលកើតហេតុ កម្លាំងសមត្ថកិច្ចចុះទៅធ្វើកោសល្យវិច្ច័យសាកសព រួចប្រគល់ទៅឲ្យក្រុមគ្រួសារយកធ្វើបុណ្យតាមប្រពៃណី។ ចំណែកជនសង្ស័យប្តីប្រពន្ធទាំងពីរនាក់ខាងលើនោះ ត្រូវឃាត់ខ្លួនកសាងសំណុំរឿងដើម្បីបញ្ជូនទៅចាត់ការបន្តតាមនីតិវិធីផ្លូវច្បាប់ ៕