ព្រះសីហនុៈ នៅវេលាម៉ោង ៦និង៣០នាទីព្រឹកថ្ងៃទី២៤ ខែសីហា ឆ្នាំ២០២១ ចន្លោះគីឡូម៉ែត្រ២០៨-២០៩ ស្ថិតក្នុងភូមិថ្មធំ ឃុំរាម ស្រុកព្រៃនប់ ខេត្តព្រះសីហនុ មានករណីគ្រោះថ្នាក់ចរាចរណ៍រវាងរថយន្តបុកអ្នកថ្មើរជើងកំពុងដើរឆ្លងផ្លូវ។

រថយន្តបង្កម៉ាក សាំយ៉ុង ពណ៌ស ពាក់ស្លាកលេខ ព្រះសីហនុ 2A-4950 ធ្វើដំណើរពីភ្នំពេញ ឆ្ពោះទៅ ខេត្តព្រះសីហនុ លុះមកដល់ចំណុចកើតហេតុខាងលើ បានបុកបុរសម្នាក់កំពុងដើរឆ្លងផ្លូវ ឈ្មោះ ហាស អ៊ិត ភេទប្រុស អាយុ ៨០ឆ្នាំ ទីលំនៅឯភ្នំពេញ មកលេងផ្ទះកូន ក្នុងភូមិរាម ឃុំរាម ស្រុកព្រៃនប់ ខេត្តព្រះសីហនុ បណ្ដាលឲ្យស្លាប់នៅនឹងកន្លែងកើតហេតុ រីឯអ្នកបើកបររថយន្តរត់គេចខ្លួនបាត់។

ក្រោយពីកើតហេតុសមត្ថកិច្ច ចុះដល់ទីតាំងវាស់យករថយន្តបង្ក ទៅរក្សាទុកនៅអធិការដ្ឋាននគរបាលស្រុកព្រៃនប់ ដើម្បីរង់ចាំដោះស្រាយតាមនីតិវិធី ចំពោះសាកសពជនរងគ្រោះ ត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕