កំពង់ឆ្នាំងៈ ប្រជាពលរដ្ឋក្នុងភូមិ បានប្រទះឃើញ សាកសពនារីម្នាក់ ស្លាប់អណ្តែតទឹក កាលពីវេលាម៉ោង៦ និង៣០នាទីថ្ងៃទី១៧ សីហា ឆ្នាំ២០១៦ ស្ថិតក្នុងភូមិក្បាលការឡង់ ឃុំពាមឆ្កោក ស្រុកជលគីរី ខេត្តកំពង់ឆ្នាំង ។

សមត្ថកិច្ច មូលដ្ឋានដែលចុះដល់ កន្លែងកើតហេតុ បានឲ្យដឹងថា ស្ដ្រីរងគ្រោះនេះ មានឈ្មោះ ឃន សាត អាយុ២៩ឆ្នាំ មានឪពុកឈ្មោះ វណ្ណ ខុន អាយុ៥៣ឆ្នាំ ម្តាយឈ្មោះ នូ សុន អាយុ៥២ឆ្នាំ រស់នៅ ក្នុងភូមិឃុំខាងលើ ។

សមត្ថកិច្ច បានបន្ដថា ស្ត្រីរងគ្រោះខាងលើ មានសតិមិនប្រក្រតី ខណៈដែលម្តាយ និងឪពុកស្តីបន្ទោសម្តងៗ កើតមានការខឹងសម្បា និងចេះផឹកស្រាផងដែរ កន្លងមកស្ត្រីរងគ្រោះ តែងតែដើរបេះកញ្ឆែត ត្រកួនដើរលក់នៅ ក្នុងភូមិហើយស្ត្រីរងគ្រោះធ្លាក់ទឹក បណ្តាលឲ្យស្លាប់នោះគ្មាន នណាម្នាក់បានដឹង និងឃើញនោះឡើយ ។ លុះដល់ព្រឹកថ្ងៃ ខាងលើ ប្រទះឃើញ សាកសពអណ្តែតទឹក នៅដីទួលខាងមុខផ្ទះ ឈ្មោះ ថេង ហើយបាន រាយការណ៍ ជូនសមត្ថកិច្ចនិងអាជ្ញាធរ មូលដ្ឋានចុះធ្វើការពិនិត្យ សាកសពឃើញថា ស្ត្រីរងគ្រោះពិតជាបានស្លាប់ ដោយសារខ្យល់គ ទើបបណ្តាលឲ្យធ្លាក់ទឹកស្លាប់ខ្លួនឯង ។ ក្រោយការពិនិត្យសាកសពរួច ត្រូវបានប្រគល់ឲ្យសាច់ញាតិ បងប្អូនយកទៅធ្វើបុណ្យតាមប្រពៃណី៕