-

ឃាត់ខ្លួនមុខសញ្ញាជាមេខ្យល់ចំនួន០២នាក់ ដែលនាំប្រជាពលរដ្ឋឆ្លងដែនដោយខុសច្បាប់

បាត់ដំបង: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា កាលពីថ្ងៃទី០៧ ខែតុលា ឆ្នាំ២០២១ អនុវត្តតាមយោបល់ដឹកនាំ របស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរ បាលខេត្តបាត់ដំបង លោកវរសេនីយ៍ទោ ទឹម វិឆ័យ អធិការនបាលស្រុកសំពៅលូន ដឹកនាំកម្លាំងសហការជាមួយ កម្លាំងនគរបាលវរ:សេនាតូច ការពារព្រំដែនគោកលេខ៨១៧ កម្លាំងផ្នែកសឹករងស្រុកសំពៅលូន និងកម្លាំងវរ:សេនាតូច៥៣៣ ប្រចាំការតាមបណ្ដោយមាត់អូរព្រំដែន កម្ពុជា-ថៃ បង្ក្រាបករណីនាំចេញដោយមិនស្របច្បាប់ សម្រាប់នាំឆ្លងដែន (ចូលទៅប្រទេសថៃ) ចំនួន០១ករណី ឃាត់ខ្លួនជនសង្ស័យចំនួន ០២នាក់។

ក្នុងកិច្ចប្រតិបត្តិការនេះ ជនសង្ស័យជាមេខ្យល់ក្នុងករណីនាំចេញ ដោយមិនស្របច្បាប់សម្រាប់នាំឆ្លងដែន (ចូលទៅប្រទេសថៃ) ១.ឈ្មោះ ចាម តឹក ភេទប្រុស អាយុ ៣៨ឆ្នាំ មានទីលំនៅភូមិស្រឡៅជ្រុំ ឃុំសិរីមានជ័យ ស្រុកសំពៅលូន ខេត្តបាត់ដំបង និង២.ឈ្មោះ នី វណ្ណ: ហៅ ណាក់ ភេទប្រុស អាយុ៥០ឆ្នាំ មានទីលំនៅភូមិស្រឡៅជ្រុំ ឃុំសិរីមានជ័យ ស្រុកសំពៅលូន ខេត្តបាត់ដំបង ។

សូមជម្រាបជូនថា ករណីឃាត់ខ្លួនមុខសញ្ញាជាមេខ្យល់ទាំងពីរនាក់នេះ គឺបន្ទាប់ពីពួកគេបានធ្វើសកម្មភាព នាំប្រជាពលរដ្ឋលួចឆ្លងដែន ដោយខុសច្បាប់ចូលទៅក្នុងប្រទេសថៃ នាចំណុចមាត់អូរព្រំដែនកម្ពុជា-ថៃ ជាប់ភូមិសាស្ត្រភូមិស្រឡៅជ្រុំ ឃុំសិរីមានជ័យ ស្រុកសំពៅលូន ខេត្តបាត់ដំបង ចំនួន០៨នាក់ កាលពីយប់ថ្ងៃទី០៦ ខែកញ្ញា ឆ្នាំ២០២១ ។ ឆ្លងតាមរយ:ការស្រាវជ្រាវទើបសមត្ថកិច្ចកំណត់មុខសញ្ញាបាន និងឈានដល់ការឃាត់ខ្លួនតែម្តង ។

តាមចម្លើយសារភាព របស់ជនសង្ស័យខាងលើ សមត្ថកិច្ចកំណត់បានមុខសញ្ញាជាមេខ្យល់មួយចំនួនផ្សេងទៀត ដែលកំពុងគេចខ្លួន ហើយសមត្ថកិច្ចនឹងចាត់វិធានការ តាមនីតិវិធីនៅពេលក្រោយ ។ នៅពេលនេះ សមត្ថកិច្ចនគរបាលស្រុកសំពៅលូន បានរៀបចំសំណុំរឿង បញ្ជូនមកការិយាល័យជំនាញ ដើម្បីចាត់ការបន្តតាមនីតិវិធីច្បាប់ ៕

មតិយោបល់