-

ឥទ្ធិពលគ្រឿងញៀន! កូនប្រុសម្នាក់ខឹងសុំលុយម្តាយមិនបាន យកកាំបិតនិងញញួរមកគំរាមសម្លាប់

កណ្តាល: យោងតាមផេក ការិយាល័យផ្សព្វផ្សាយតាមបណ្តាញសង្គម បានឲ្យដឹងថា ថ្ងៃស្រុក ០២កើត ខែអស្សុជ ឆ្នាំឆ្លូវ ត្រីស័ក ពុទ្ធសករាជ២៥៦៥ ត្រូវនឹងថ្ងៃទី០៨ ខែតុលា ឆ្នាំ២០២១ វេលាម៉ោង​០១ និង០០នាទី រំលងអធ្រាត្រ មានករណី គំរាមសម្លាប់ម្តាយបង្កើត ចំណុចផ្ទះរងគ្រោះភូមិ​​ព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្ដាល ។

ជនរងគ្រោះ​ (ម្តាយបង្កើត) ឈ្មោះ​ ឡេះ ម៉ារី ភេទ​ស្រី អាយុ​៥២ឆ្នាំ ខ្មែរឥស្លាម ទីលំនៅភូមិ​ព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរលក់ខោអាវ ។ ចំណែកជនសង្ស័យ (កូនបង្កើត) ឈ្មោះ​ លី សាគី ភេទប្រុស​ អាយុ​៣៣ឆ្នាំ ទីលំនៅភូមិ​ព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរ​មិនពិតប្រាកដ (ឃាត់​ខ្លួន​) ។

វត្ថុតាងចាប់យក៖ -កាំបិតមុខពីរដងឈើចំនួន១ប្រវែង២០ស.ម ។ -កាំបិតចុងស្រួចដងឈើចំនួន១ប្រវែង៣០ស.ម ។
-ញញួរដែកដងដែកចំនួន១ប្រវែង៦០ស.ម ។

នៅវេលាកើតហេតុខាងលើ ពេលជនរងគ្រោះជាម្តាយ កំពុងតែសម្រាកនៅក្នុងផ្ទះ ស្រាប់តែជនសង្ស័យត្រូវជាកូន ដែលជាមនុស្សញៀនថ្នាំ បានសុំលុយពីជនរងគ្រោះចំនួនមួយម៉ឺនរៀល បន្ទាប់មកក៏សុំពីរម៉ឺនរៀលទៀត តែជនរងគ្រោះពុំមានលុយឲ្យ ពេលនោះជនសង្ស័យខឹងបានយកកាំចុងស្រួច និងញញួរមកកាន់និយាយគំរាមកាប់សម្លាប់ គំរាមវាយបំផ្លិចបំផ្លាញទ្រព្យសម្បត្តិ និងផ្ទះចោល ហើយកន្លងមកធ្លាប់បានធ្វើសកម្មភាពយកកាំបិត ញញួរ គំរាមរកកាប់ និងវាយម្តាយជាច្រើនលើកច្រើនសារឿងសុំលុយទៅទិញថ្នាំញៀនជក់ មិនបានដូចបំណងខ្លួន ដោយមានការភ័យខ្លាច ទ្រាំនិងទង្វើដដែលៗរបស់កូនមិនបាន ទើបប្តឹងសមត្ថកិច្ច ឲ្យជួយអន្តរាគមន៍ឃាត់ខ្លួនជនសង្ស័យ រួមទាំងវត្ថុតាង បញ្ជូនមកកាន់អធិការដ្ឋាននគរបាលក្រងតាខ្មៅ ដើម្បីចាត់ការតាមនីតិវិធ ៕

មតិយោបល់