កំពង់ស្ពឺ: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា បុរសម្នាក់ឈ្មោះ នួន ផានុ អាយុ២៤ឆ្នាំ រស់នៅភូមិ ត្រពាំងក្រឡឹង ឃុំ ភ្នំតូច ស្រុកឧដុង្គ ខេត្តកំពង់ស្ពឺ ជាអ្នកបើកបរ និងជាម្ចាស់រថយន្ដបែនដឹកដី ម៉ាក HINO ពណ៌ស បែនខ្មៅ កាលពីថ្ងៃទី០៩ ខែធ្នូ ឆ្នាំ២០២១ ខ្លួនបានបើកគេចពីគោលដៅត្រួតពិនិត្យរបស់សមត្ថកិច្ចនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ស្ពឺ លើកំណាត់ផ្លូវជាតិលេខ៤១ ចន្លោះគីឡូម៉ែត្រលេខ១១-១២ ស្ថិតនៅឃុំសែនដី ស្រុកសំរោងទង ខេត្តកំពង់ស្ពឺ ។
បុរសខាងលើបានព្យាយាមបើករថយន្ដគេចរហូតដល់ម្ដុំផ្សាអង្គមេត្រី រួចបត់ស្ដាំទៅផ្លូវ១៣០ ឆ្ពោះទៅផ្លូវជាតិលេខ៣ បំណងគេចពីការត្រួតពិនិត្យច្បាប់ ដោយថារថយន្ដរបស់ខ្លួនមិនមានឯកសារ និងខ្លួនមិនមានប័ណ្ណបើកបរ ពិសេសរថយន្ដគ្មាន អាវរងារ…។
នៅថៃ្ងទី១១ ខែធ្នូ ឆ្នាំ២០២១នេះ បុរសខាងលើ រួមជាមួយឪពុកបានចូលខ្លួនមកសុំការអនុវត្ដបំពេញកាតព្វកិច្ចជាពលរដ្ឋល្អ ក្នុងការទទួលការផាកពិន័យគ្រប់យ៉ាងតាមច្បាប់កំណត់ និងសំណូមពរដល់បងប្អូនអ្នកបើកបរទាំងអស់ មេត្ដាចូលរួមអនុវត្ដច្បាប់ចរាចរណ៍ផ្លូវគោកទាំងអស់គ្នា និងកុំព្យាយាមគេចវេសពីច្បាប់ នាំឲ្យប៉ះពាល់សណ្ដាប់ធ្នាប់សង្គម ពិសេសបង្កភាពចលាចលជ្រួលច្របល់ដល់មហាជន និងអ្នកនិយមលេងបណ្ដាញសង្គម យល់ច្រឡំថាសមត្ថកិច្ចអនុវត្ដខុស ឬគាបសង្កត់ពលរដ្ឋ ការពិតជាកំហុសរបស់អ្នកបើកបរឈ្មោះ នួន ផានុ ៕
មតិយោបល់