តាកែវ: យោងតាមផេក អគ្គ.ការពារអ្នកប្រើប្រាស់កិច្ចការប្រកួតប្រជែង និងបង្រ្កាបការក្លែងបន្លំ បានឲ្យដឹងថា នាថ្ងៃទី០៤ ខែមករា ឆ្នាំ២០២២ មន្រ្តីជំនាញ ក.ប.ប. សាខាខេត្តតាកែវ សហការជាមួយមន្រ្តីនៃនាយកដ្ឋានមន្ទីរពិសោធន៍ រួមជាមួយរថយន្តពិសោធន៍ចល័តផ្នែកម្ហូបអាហារ និងសាខាខេត្តប៉ៃលិនបានចុះត្រួតពិនិត្យនូវផ្ទះស្ដុក និងចែកចាយការ៉េមមួយកន្លែង ស្ថិតនៅក្នងស្រុកគីរីវង់ ខេត្តតាកែវ និងផ្ទះលក់ទំនិញមួយចំនួនស្ថិតក្នុងផ្សារប៉ាហ៊ី ខេត្តប៉ៃលិន ។

យោងតាមលទ្ធផលនៃការចុះត្រួតពិនិត្យឃើញថា មានភាពអនុលោមលើផលិតផលការ៉េម តែគ្មានច្បាប់អនុញ្ញាត ក្នុងការប្រកបអាជីវកម្មផ្សេងៗ និងបានណែនាំឱ្យម្ចាស់អាជីវកម្ម ធ្វើឯកសារប្រកបអាជីវកម្ម ឱ្យបានត្រឹមត្រូវស្របច្បាប់ និងបានដកហូតទំនិញ មិនមានភាពអនុលោមចំនួន ១៣៣.៥គីឡូក្រាម និងបានធ្វើការពិន័យទៅតាមនីតិវីធីផងដែរ ៕