ភ្នំពេញៈ បុរសម្នាក់សង្ស័យស្រវឹងស្រា បើករថយន្តស៊េរីទំនើបមួយគ្រឿង បោះពួយយ៉ាងលឿន បានជ្រុលទៅបុករថយន្តមួយគ្រឿងទៀត ពីក្រោយពេញទំហឹង បណ្ដាលឲ្យរថយន្តស៊េរីទំនើប វិលមួយជុំហោះរំលងសួនច្បារចែកផ្លូវ បណ្ដាលឲ្យមានមនុស្សរងរបួសធ្ងន់និងស្រាល៤នាក់ ត្រូវបានបញ្ជូនទៅសង្គ្រោះភ្លាមៗ ហេតុការណ៍គ្រោះថ្នាក់ចរាចរណ៍នេះ កើតឡើងកាលវេលាម៉ោង១១និង៤០នាទីយប់ថ្ងៃទី១៦ ខែកុម្ភៈ ឆ្នាំ២០២២ ស្ថិតតាមបណ្ដោយផ្លូវផ្លូវវិមាន ឈ្នះ ឈ្នះ ចំណុចជិតរណ្ដៅដីតាកៅ ក្នុងសង្កាត់កោករកា ខណ្ឌព្រែកព្នៅ រាជធានីភ្នំពេញ ។

យោងតាមប្រភពពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញបុរសម្នាក់ សង្ស័យស្រវឹងស្រា បើករថយន្តម៉ាក HILUX SRV VCO ពណ៌ទឹកប្រាក់ ពាក់ស្លាកលេខភ្នំពេញ 2BK 3455 ធ្វើដំណើរទិសដៅពីលិចទៅកើតក្នុងល្បឿនលឿន ខណៈមកដល់ចំណុចកើតហេតុខាងលើ បានជ្រុលទៅបុករថយន្តម៉ាក CRV ពណ៌ខ្មៅ ពាក់ស្លាកលេខភ្នំពេញ 2L 1534 កំពុងធ្វើដំណើរស្របគ្នា នៅខាងមុខចំពីក្រោយពេញទំហឹង បណ្ដាលឲ្យរថយន្តបង្កវិលមួយជុំ ហោះឡើងសួនច្បារចែកទ្រូងផ្លូវទៅម្ខាង បណ្ដាលឲ្យមានមនុស្សខាងរថយន្តរងគ្រោះ រងរបួសធ្ងន់ស្រាល៤នាក់ ត្រូវបានបញ្ជូនទៅសង្គ្រោះ ។ ចំណែករថយន្តទាំងពីរគ្រឿង រងការខូចខាតយ៉ាងដំណំ ។ ក្រោយកើតហេតុសមត្ថកិច្ចមូលដ្ឋាន សហការជាមួយសមត្ថកិច្ចជំនាញចរាចរណ៍ក្រុង វាស់វែងរថយន្តបង្កនិងរថយន្តរងគ្រោះទៅរក្សាទុក ដើម្បីរង់ចាំដោះស្រាយគ្នាបន្តទៀតនៅពេលក្រោយ ៕