កណ្តាលៈ យោងតាមផេក ការិយាល័យផ្សព្វផ្សាយតាមបណ្តាញសង្គម បានឲ្យដឹងថា នៅថ្ងៃទី១៨ ខែកុម្ភៈ ឆ្នាំ២០២២ វេលាម៉ោង ១០ និង ៣០នាទី ករណីអំពើលួច (កាច់កម៉ូតូ) នៅចំណុចភូមិត្រពាំងឈូក ឃុំព្រែកគយ ស្រុកស្អាង ខេត្តកណ្ដាល ។
ជនរងគ្រោះឈ្មោះ រ៉ា យស់ ភេទប្រុស អាយុ៣៨ឆ្នាំ ជនជាតិខ្មែរ មុខរបរកម្មករ មានទីលំនៅភូមិត្រពាំងឈូក ឃុំព្រែកគយ ស្រុកស្អាង ខេត្តកណ្ដាល ។ ជនសង្ស័យ(ឃាត់ខ្លួន)ឈ្មោះ ហេង ឡុង ភេទប្រុស អាយុ៥៩ឆ្នាំ ជនជាតិខ្មែរ មុខរបរមិនពិតប្រាកដ ស្រុកកំណើតភូមិរុន ឃុំបឹងខ្យាង ស្រុកកណ្ដាលស្ទឹង ខេត្តកណ្ដាល បច្ចុប្បន្នស្នាក់នៅផ្ទះជួល ក្រុងតាខ្មៅ ។

វត្ថុតាងចាប់យក៖
១. ម៉ូតូ ០១គ្រឿង ម៉ាកហ្សូមមឺរ ពណ៌ផ្កាឈូក ពាក់ផ្លាកលេខ ភ្នំពេញ1FF. 4366 (ជារបស់ជនរងគ្រោះ)
២. សោទីបលេខ៨ កែច្នៃប្រើសម្រាប់កាច់បំបែកសោកម៉ូតូ (ជារបស់ជនសង្ស័យប្រើធ្វើសកម្មភាព) ។

នៅថ្ងៃទីខែឆ្នាំវេលាម៉ោងកើតហេតុខាងលើ ជនរងគ្រោះបានទុកម៉ូតូរបស់ខ្លួននៅខាងមុខផ្ទះ រួចបានចូលទៅក្នុងផ្ទះ ។ ខណៈពេលនោះជនសង្ស័យ បានធ្វើសកម្មភាពកាច់កម៉ូតូរបស់ជនរងគ្រោះ រួចព្យាយាមជិះគេចខ្លួនទៅទិសខាងជើង (ជិះពីស្អាងទៅតាខ្មៅ) ភ្លាមៗនោះជនរងគ្រោះ ក៏បានមករាយការណ៍ និង ដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលព្រែកគយ ឲ្យជួយអន្តរាគមន៍ ។

ក្រោយពេលទទួលបានពាក្យបណ្ដឹងពីជនរងគ្រោះភ្លាម កម្លាំងសមត្ថកិច្ចនគរបាលប៉ុស្តិ៍ព្រែកគយ និងកម្លាំងផ្នែកនគរបាលយុត្តិធម៌ស្រុកស្អាង សហការជាមួយកម្លាំងសមត្ថកិច្ចនគរបាលអធិការក្រុងតាខ្មៅ បានធ្វើការឃាត់ខ្លួនជនសង្ស័យរួមទាំងវត្ថុតាង បាននៅចំណុចស្តុបព្រែកសំរោង ក្រុងតាខ្មៅរួចបាននាំខ្លួនជនសង្ស័យ មកអធិការដ្ឋាននគរបាលក្រុងតាខ្មៅ ដើម្បីធ្វើការសាកសួរ ។

នៅចំពោះមុខសមត្ថកិច្ចនគរបាល ជនសង្ស័យបានឆ្លើយសារភាពថា ខ្លួនពិតជាបានលួចកាច់កម៉ូតូរបស់ជនរងគ្រោះពិតប្រាកដមែន ។
បច្ចុប្បន្នជនសង្ស័យ ត្រូវបានឃាត់ខ្លួនបញ្ជូនមកអធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធី ៕