បន្ទាយមានជ័យ: យោងតាមផេករបស់ការិយាល័យផ្សព្វផ្សាយតាមបណ្តាញសង្គម បានឲ្យដឹងថា ជនសង្ស័យម្នាក់ក្នុងចំណោមបក្ខពួក០២នាក់ ធ្វើសកម្មភាពលួចម៉ូតូត្រូវបានប្រជាពលរដ្ឋនិងកម្លាំងប្រជាការពារឃាត់ខ្លួនជាក់ស្តែងប្រគល់ឲ្យកម្លាំងនគរបាលស្រុកថ្មពួក ចាត់ការតាមនិតិវិធីច្បាប់។ ការឃាត់ខ្លួននេះបានធ្វើឡើងនៅវេលាម៉ោង០១រំលងអាធ្រាតឈានចូលថ្ងៃព្រហស្បតិ៍ ៧ រោច ខែផល្គុន ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី២៤ ខែមីនា ឆ្នាំ២០២២ នៅភូមិកណ្តោល ឃុំគោករមៀត ស្រុកថ្មពួក ខេត្តបន្ទាយមានជ័យ ។

នគរបាលស្រុកថ្មពួកបានឲ្យដឹងថា ៖ ម៉ូតូម៉ាកហុងដាវេវ ពណ៌ខៀវ ស៊េរីឆ្នាំ២០១៩ គ្មានផ្លាកលេខ មានម្ចាស់ឈ្មោះ រី ណើម ភេទប្រុស អាយុ ៤១ឆ្នាំ ជាប្ដី និងប្រពន្ធឈ្មោះ ព្រឹល ធៀប អាយុ៤២ ឆ្នាំ រស់នៅភូមិកណ្ដាល ឃុំគោករមៀត ស្រុកថ្មពួក ខេត្តបន្ទាយមានជ័យ ។

នគរបាលបានបញ្ជាក់ថា ៖ មុនពេលកើតហេតុម្ចាស់ម៉ូតូឈ្មោះ ព្រឹល ធៀប ជាប្រពន្ធបានទុកម៉ូតូ នៅក្រោមផ្ទះ ចំណែកឈ្មោះ រី ណើម ជាប្តី ជាប់រវល់ទៅដេកនៅឯស្រែ ។ នៅវេលាម៉ោងប្រមាណជា១២យប់ ចោរបានធ្វើសកម្មភាពផ្តាច់ខ្សែកុងតាក់ លួចម៉ូតូនៅក្រោមផ្ទះជិ:ចេញមកចម្ងាយពីភូមិប្រមាណជា ១,០០០ម៉ែត្រ ម៉ូតូធ្លាក់ច្រវាក់ ក្រុមជនសង្ស័យបាននាំគ្នាអូសម៉ូតូ ពេលនោះជួបក្មេងត្រឡប់ពីដើលេង ជនសង្ស័យបានឲ្យជួយដាក់ច្រវាក់ម៉ូតូ ប៉ុន្តែដោយស្គាល់ម៉ូតូនោះ តែមិនស្គាល់មនុស្ស ពួកក្មេងទាំងនោះស្រែកឆោឡោ ផ្អើលដល់កម្លាំងប្រជាការពារនាំគ្នាដេញចាប់ប្រផាប់ប្រភីងឃាត់ខ្លួនបាន០១នាក់ប្រគល់ឲ្យនគរបាលប៉ុស្តិ៍រដ្ឋបាលឃុំគោករមៀត ។

នគរបាលបានបញ្ជាក់ថា ៖ ជនសង្ស័យដែលឃាត់ខ្លួនបាន ឈ្មោះ មី កាន ភេទប្រុស អាយុ ២៨ ឆ្នាំ រស់នៅភូមិវត្តចាស់ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ។ នៅចំពោះមុខសមត្ថកិច្ច ជននេះបានសារភាពថា ខ្លួននិងបក្ខពួកម្នាក់ទៀតឈ្មោះ លី លៀប ភេទប្រុស អាយុ១៧ឆ្នាំ រស់នៅភូមិជាមួយគ្នា ដែលរត់គេចខ្លួននោះ ដោយលឺដំណឹងថាវត្តកណ្តោលស្ថិតនៅភូមិកណ្តោល ឃុំគោករមៀត ស្រុកថ្មពួកនោះជិតធ្វើពិធីបញ្ចុះសីម៉ា ពួកគេទាំង០២នាក់ក៏មកស្នាក់នៅរងចាំនៅវត្តកណ្ដោល ហើយក៏ធ្វើសកម្មភាពលួចម៉ូតូនេះតែម្តង ។

នគរបាលស្រុកថ្មពួកបានបញ្ជាក់ថា ៖ ដោយផ្អែកលើចម្លើយសារភាព របស់ជនសង្ស័យនិងការបង្រ្កាបជាក់ស្តែង ឈ្មោះ មី កាន នគរបាលជំនាញព្រហ្មទណ្ឌនៃអធិការដ្ឋាននគរបាលស្រុកថ្មពួក បានរៀបចំសំណុំរឿងបញ្ជូនទៅស្នងការដ្ឋាននគរបាលខេត្តចាត់ការបន្ត។ ចំណែកម៉ូតូប្រគល់ជូនម្ចាស់ដើមវិញ ចំពោះបក្ខពួកគេម្នាក់កំពុងស្រាវជ្រាវរកចាប់ខ្លួន ៕