ព័ត៌មានជាតិ

ករណីឆ្លង​ចរន្ត​ពី​ឆ្នាំង​សាក​ទូរស័ព្ទ​ ដាក់នៅលើពូក បង្ក​ជា​អគ្គិភ័យឆេះ​ផ្ទះពលរដ្ឋ​១​ខ្នង​ ​

​សៀមរាប:​ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា នៅ​ថ្ងៃ​ទី​៣​ ខែមេសា​ ឆ្នាំ​២០២២​ នៅ​វេលា​ម៉ោង​០៣​និង​៥០​នាទី​ទៀប​ភ្លឺ​ មាន​ករណី​អគ្គិភ័យ​ឆាបឆេះ​ផ្ទះ​ប្រជាពលរដ្ឋ​អស់​មួយ​កន្លែង​ ដែល​បណ្តាល​មក​ពី​ ឆ្លង​ចរន្តអគ្គិសនី​ ពី​ឆ្នាំង​សាក​ទូរស័ព្ទ​ដាក់​លើ​ពូក​ បង្ក​ជា​អគ្គិភ័យ​ ។​

​លោក​វរសេនីយ៍ឯក​ ឌុ​ត​ ខុន​ ស្នងការ​រង​ទទួល​ការិយាល័យ​បង្ការ​ពន្លត់អគ្គិភ័យ​ និង​ស​ង្រោះ​ បាន​បញ្ជាក់​ថា​​ ឆ្លង​ចរន្តអគ្គិសនី​ពី​ឆ្នាំង​សាក​ទូរស័ព្ទ​ដាក់​លើ​ពូក​ បង្ក​ជា​អគ្គិភ័យ​ឆាបឆេះ​ផ្ទះ​ប្រជាពលរដ្ឋ​ឈ្មោះ​ ហួង​ ព្រហ្ម​ស៊ី​ថា​ ភេទ​ប្រុស​ អាយុ​៦១​ឆ្នាំ​ មុខរបរ​នៅផ្ទះ​ ស្ថិត​នៅ​ចំណុច​ក្រោយ ​ស្ថិត​នៅ​ក្រុម​ទី​៩​ ភូមិ​បន្ទាយ​ចាស់​ សង្កាត់​ស្ល​ក្រាម​ ក្រុង​/​ខេត្តសៀមរាប​ បណ្តាល​ឲ្យ​ខូចខាត​ទាំងស្រុង​ ១០០%​ រួម​មាន​៖​ ផ្ទះ​ទំហំ​ ៨​ម​ x​ ១២​ម​ មាន​ចំនួន​ ០៦​ បន្ទប់​ ស្នាក់​ចំនួន​ ០៥​ គ្រួសារ​ (​ជួល​បន្ទប់​ចំនួន​ ០៣​ គ្រួសារ​)​ ផ្ទះ​ធ្វើ​អំពី​ឈើ​លើ​ថ្ម​ក្រោម​ ប្រក់​ស័ង្កសី​,​ ផ្ទះ​១​ខ្នង​ ខូចខាត​ទាំងស្រុង​ ៨​ម​x១២​ម​ ផ្ទះ​ឈើ​លើ​ ថ្ម​ក្រោម​,​ ទ្រព្យសម្បត្តិ​ របស់​ម្ចាស់ផ្ទះ​ និង​ អ្នក​ជួល​ផ្ទះ​ ។​

​ហេតុការណ៍​នេះ​បណ្តាល​ឲ្យ​មាន​រង​របួស​ដល់​កូន​ម្ចាស់ផ្ទះ​ចំនួន​០១​នាក់​ ឈ្មោះ​ ព្រហ្ម​ វ​ឌ្ឍ​នា​ ភេទ​ប្រុស​ អាយុ​ ២៦​ឆ្នាំ​ មុខរបរ​ លក់​គ្រឿងបន្លាស់​ទូរស័ព្ទ​ដៃ​ ស្នាក់​នៅ​បន្ទប់​ខាងលើ​ម្នាក់ឯង​ បណ្ដាល​ឲ្យ​របួស​ដៃ​ទាំង​សងខាង​ និង​មុខ​ត្រង់​ចង្កា​ បាន​បញ្ជូន​ទៅ​ព្យាបាល​នៅ​មន្ទីរពេទ្យ​បង្អែក​ខេត្តសៀមរាប​ ។​

ក្នុង​ការងារ​អន្តរាគមន៍​ និង​សង្គ្រោះ​ កម្លាំង​សមត្ថកិច្ច​បាន​ប្រើប្រាស់​រថយន្ត​ពន្លត់អគ្គិភ័យ​ចំនួន​០៣​ គ្រឿង​ ប្រើប្រាស់​ទឹក​អស់​០៣​ ឡាន​ រួម​មាន​៖​ ឡានទឹក​ស្នងការដ្ឋាន​នគរបាល​ខេត្ត​០១​គ្រឿង​,​ ឡានទឹក​អធិការដ្ឋាន​នគរបាល​ក្រុង​០១​គ្រឿង​,​ ឡានទឹក​អាជ្ញាធរ​អប្សរា​ ០១​ គ្រឿង​។​

រហូត​ដល់​វេលា​ម៉ោង​០៤​និង​៣០​នាទី​ទៀប​ភ្លឺ​ ថ្ងៃខែ​ឆ្នាំ​ដដែល​ ទើប​អគ្គិភ័យ​បាន​រលត់​ទៅ​វិញ​ទាំងស្រុង ​៕


មតិយោបល់