ព័ត៌មានជាតិ

សមត្ថកិច្ចឃាត់ខ្លួនជនសង្ស័យម្នាក់​ ​ករណីប្រើ​កណ្តៀវ​កាប់​​ជន​រង​គ្រោះ បណ្តាលឲ្យរងរបួសធ្ងន់ដេរ១៥ថ្នេរ​

​ភ្នំពេញ:​ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា បុរស​ម្នាក់​ត្រូវ​បាន​សមត្ថកិច្ច​នគរបាល​ខណ្ឌដង្កោ​បង្ក្រាប​ឃាត់ខ្លួន​ ពាក់ព័ន្ធ​ករណី​ហិង្សា​ដោយ​ចេតនា​មាន​ស្ថាន​ទម្ងន់ទោស ​(​ប្រើ​កណ្តៀវ​កាប់​លើ​ជន​រង​គ្រោះ​) ​កាលពី​ថ្ងៃ​ទី​២៥​ ខែមេសា​ ឆ្នាំ​២០២២​ វេលា​ម៉ោង​២២​និង​៣០​នាទី​ ត្រង់​ចំណុច​មុខ​ផ្ទះ​របស់​ឈ្មោះ​ អាត់​ ឈឿ​ន​ ស្ថិត​នៅ​ភូមិ​ប្រការ​ សង្កាត់​ព្រៃ​ស​ ខណ្ឌដង្កោ​ រាជធានី​ភ្នំពេញ​ ។​

​ជន​រង​គ្រោះ​ឈ្មោះ​ ប៊ែ​ល​ អាត​ ភេទ​ប្រុស​ អាយុ​៤០​ឆ្នាំ​ មុខរបរ​មន្ត្រីរាជការ​ជាប់កិច្ចសន្យា​ (​ការិយាល័យ​ចរាចរណ៍​ផ្លូវគោក​ រាជធានី​ភ្នំពេញ​)​ ទីលំនៅ​ភូមិ​ប្រការ​ សង្កាត់​ព្រៃ​ស​ ខណ្ឌដង្កោ​ រាជធានី​ភ្នំពេញ​ ។​ ចំណែក​ជន​ដៃដល់​ឈ្មោះ​ សារី​ សា​រឿ​ន​ ភេទ​ប្រុស​ អាយុ​៥០​ឆ្នាំ​ ជនជាតិ​ខ្មែរ​ មុខរបរ​កសិករ​ ទីលំនៅ​ភូមិ​ប្រការ​ សង្កាត់​ព្រៃ​ស​ ខណ្ឌដង្កោ​ រាជធានី​ភ្នំពេញ​ ។​

វត្ថុ​តាង​ចាប់​យក​៖​ កណ្តៀវ​ដង​ឈើ​ប្រវែង​៤៥​សង់ទីម៉ែត្រ​ចំនួន​០១​ ។​

​សមត្ថកិច្ច​បាន​ឲ្យ​ដឹង​ថា​ នៅ​វេលា​កើតហេតុ​ ជន​រង​គ្រោះ​ឈ្មោះ​ ប៊ែ​ល​ អាត​ ភេទ​ប្រុស​ អាយុ​៤០​ឆ្នាំ​ កំពុង​តែ​អង្គុយ​ផឹកស៊ី​ជាមួយ​ឈ្មោះ​ អាត់​ ឈឿ​ន​ ភេទ​ប្រុស​ អាយុ​៦៧​ឆ្នាំ​ មាន​គ្នា​ចំនួន​០២​នាក់​ នៅ​លើ​គ្រែ​ខាង​មុខ​ផ្ទះ​របស់​ឈ្មោះ​ អាត់​ ឈឿ​ន​ ស្ថិត​នៅ​ភូមិ​ប្រការ​ សង្កាត់​ព្រៃ​ស​ ខាងលើ​ ស្រាប់តែ​ជនសង្ស័យ​ឈ្មោះ​ សារី​ សា​រឿ​ន​ ភេទ​ប្រុស​ អាយុ​៥០​ឆ្នាំ​ បាន​ជិះ​ម៉ូតូ​ម៉ាក​ហុងដា​សេ​១២៥​ ពណ៌​ខ្មៅ​ ស៊េរី​ឆ្នាំ​២០១៧​ មិន​ចាំ​ផ្លា​ក​លេខ​ មក​ឈប់​នៅ​ក្រោម​ដើម​ស្វាយ​ខាង​មុខ​ផ្ទះ​របស់​ឈ្មោះ​ អាត់​ ឈឿ​ន​ ដែល​មាន​ចម្ងាយ​០៣​ម៉ែត្រ​ពី​គ្រែ​ផឹកស៊ី​ ។​ ហើយ​ឈ្មោះ​ អាត់​ ឈឿ​ន​ បាន​ក្រោក​ពី​កន្លែង​ផឹកស៊ី​ដើរទៅ​បត់ជើងតូច​ ពេល​ជនសង្ស័យ​បម្រុង​ដើរ​ចូល​ទៅ​កន្លែង​ផឹកស៊ី​ ស្រាប់តែ​ជន​រង​គ្រោះ​បាន​និយាយ​ទៅ​កាន់​ជនសង្ស័យ​ថា​ អាណា​ហៅ​អ្ហែង​មក​ អា​ឆ្កែ​ ហើយ​ជនសង្ស័យ​ក៏​បាន​ឆ្លើយ​ថា​ ម្ចាស់ផ្ទះ​ហៅ​អញ​ បាន​អញ​មក​ រួច​ជន​រង​គ្រោះ​ក៏​បាន​ក្រោក​ពីលើ​គ្រែ​ ស្ទុះ​សំដៅ​ទៅ​រក​ជនសង្ស័យ​ ។​ ឃើញ​ដូចនេះ​ជនសង្ស័យ​ក៏​បាន​យក​កណ្តៀវ​សម្រាប់​ច្រូតស្មៅ​ដែល​នៅ​ជាប់​ទូក​ម៉ូតូ​ កាប់​ទៅ​លើ​ជន​រង​គ្រោះ​ ត្រូវ​ចំ​គល់​ក​ ខាងក្រោយ​របួស​ធ្ងន់ធ្ងរ​ រួច​ជនសង្ស័យ​ក៏​បាន​បើក​ម៉ូតូ​គេចខ្លួន​បាត់​ ។​

​ប្រភព​បន្ត​ថា​ ក្រោយ​កើតហេតុ​ សាច់ញាតិ​ និង​ក្រុម​គ្រួសារ​របស់​ជន​រង​គ្រោះ​ ដឹក​យក​ទៅ​ព្យាបាល​នៅ​មន្ទីរពេទ្យ​លោកសង្ឃ​ដេរ​ចំនួន​១៥​ថ្នេរ​ រួច​ឈ្មោះ​ ប៊ែ​ល​ តុលា​ ភេទ​ស្រី​ អាយុ​៣០​ឆ្នាំ​ (​ត្រូវជា​ប្អូនស្រី​បង្កើត​របស់​ជន​រង​គ្រោះ​)​ បាន​មក​រាយការណ៍​ប្រាប់​សមត្ថកិច្ច​ និង​ដាក់​ពាក្យបណ្តឹង​នៅ​ប៉ុស្តិ៍​នគរបាល​រដ្ឋបាល​ព្រៃ​ស​ ដើម្បី​ឱ្យ​សមត្ថកិច្ច​ជួយ​ស្រាវជ្រាវ​ឃាត់ខ្លួន​ជនសង្ស័យ​ យក​មក​ធ្វើការ​សាកសួរ​ ដើម្បី​ចាត់ការ​តាម​ផ្លូវច្បាប់​ ។​

​សមត្ថកិច្ច​បន្ត​ទៀត​ថា​ លុះដល់​ថ្ងៃ​ទី​២៦​ ខែមេសា​ ឆ្នាំ​ ២០២២​ វេលា​ម៉ោង​១០​និង​៣០​នាទី​ សមត្ថកិច្ច​បាន​ធ្វើការ​ស្រាវជ្រាវ​ឃាត់ខ្លួន​ជនសង្ស័យ​បាន​ ត្រង់​ចំណុច​ផ្ទះ​របស់​ជនសង្ស័យ​ ស្ថិត​នៅ​ភូមិ​ប្រការ​ សង្កាត់​ព្រៃ​ស​ ខណ្ឌដង្កោ​ រាជធានី​ភ្នំពេញ​ យក​មក​ធ្វើការ​សាកសួរ​នៅ​ប៉ុស្តិ៍​នគរបាល​រដ្ឋបាល​ព្រៃ​ស​តាម​នីតិវិធី​ច្បាប់​។​

ក្រោយ​ពី​ធ្វើការ​សាកសួរ​ជនសង្ស័យ​បាន​ឆ្លើយ​សារភាព​ប្រាប់​សមត្ថកិច្ច​ថា​ រូបគេ​(​ជនសង្ស័យ​)​ ពិតជា​បាន​ធ្វើ​សកម្មភាព​ប្រើ​កណ្តៀវ​កាប់​ទៅ​លើ​ជន​រង​គ្រោះ​ប្រាកដ​មែន​ ។​

​បច្ចុប្បន្ន​ ជនសង្ស័យ​ត្រូវ​បាន​សមត្ថកិច្ច​កសាង​សំណុំរឿង​អនុវត្ត​តាម​នីតិវិធី​ ៕

មតិយោបល់