ពោធិ៍សាត់ៈ យោងតាមផេក ស្នងការដ្ឋាននគរបាលខេត្តពោធិ៍សាត់ បានឲ្យដឹងថា នៅថ្ងៃព្រហស្បតិ៍ ទី២៨ ខែមេសា ឆ្នាំ២០២២ វេលាម៉ោង១៦និង៣០ នាទី នៅការ៉ាស់សាំង PTT ស្ថិតនៅសង្កាត់ចោមចៅ រាជធានីភ្នំពេញ មានករណីលួចម៉ូតូ០១គ្រឿង ម៉ាក KAWAZAKI Z1000R Edition ពណ៌ខ្មៅ-ត្រួយចេក ផលិតនៅឆ្នាំ២០២០ ស្លាកលេខ ភ្នំពេញ 1JD-9955 រួចជិះគេចខ្លួនបាត់ ដោយជនរងគ្រោះជាម្ចាស់ម៉ូតូឈ្មោះ អ៊ន រតនៈសិលា ភេទប្រុស អាយុ ២៦ ឆ្នាំ ក៏បានមកដាក់ពាក្យបណ្ដឹង នៅប៉ុស្តិ៍នគរបាលរដ្ឋបាលចោមចៅទី៣ ។

ក្រោយមកជនរងគ្រោះក៏បានទទួលតម្រុយថា ជនសង្ស័យជិះគេចខ្លួនមកកាន់ខេត្តពោធិ៍សាត់ បន្ទាប់មកជនរងគ្រោះ ក៏បានមកដាក់ពាក្យបណ្ដឹង នៅអធិការដ្ឋាននគរបាលក្រុងពោធិ៍សាត់ ដើម្បីអោយជួយអន្តរាគមន៍ ដើម្បីស្វែងរកជនសង្ស័យ និងម៉ូតូដែលមានភិនភាគខាងលើ ។

ក្រោយពីបានទទួលពាក្យបណ្ដឹងរួច លោកវរសេនីយ៍ទោ កែវ សារិ អធិការនគរបាលក្រុងពោធិ៍សាត់ ក៏បានដឹកនាំកម្លាំងពួនស្ទាក់រង់ចាំឃ្លាំមើលភិនភាគម៉ូតូខាងលើ នៅតាមដងផ្លូវជាតិលេខ០៥ ។ លុះវេលាម៉ោង ១៩និង១៣នាទី មកដល់ចំណុចខាងកើតរង្វង់មូលផ្តិល ចម្ងាយប្រហែល៥០០ម៉ែត្រ ក៏បានប្រទះម៉ូតូដែលមានភិនភាគខាងលើ ជិះទិសដៅពីកើតទៅលិច កម្លាំងក៏បានសុំអោយជនសង្ស័យឈប់ម៉ូតូ ប៉ុន្តែជនសង្ស័យក៏បានជិះម៉ូតូបកទៅក្រោយ ដើម្បីគេចខ្លួន តែក៏ត្រូវបានកម្លាំងសមត្ថកិច្ចឃាត់ខ្លួនបាន នៅលើដងផ្លូវជាតិលេខ៥ ស្ថិតនៅភូមិព្រៃឧម៉ាល់ សង្កាត់រលាប ក្រុងពោធិ៍សាត់ ខេត្តពោធិ៍សាត់ ។ ជនសង្ស័យមានឈ្មោះ លន់ ធារិទ្ធ ហៅ ធិ អាយុ ៣១ ឆ្នាំ ភេទប្រុស រស់នៅទីលំនៅមិនពិតប្រាកដ រាធានីភ្នំពេញ ។

បច្ចុប្បន្នជនសង្ស័យ រួមទាំងវត្ថុតាងត្រូវបានឃុំខ្លួន និងរក្សាទុកបណ្ដោះអាសន្ន នៅអធិការដ្ឋាននគរបាលក្រុងពោធិ៍សាត់ ៕