ព្រះសីហនុ: យោងតាមផេក ការិយាល័យផ្សព្វផ្សាយតាមបណ្តាញសង្គម បានឲ្យដឹងថា នៅថ្ងៃទី១០ ខែឧសភា ឆ្នាំ២០២២ វេលាម៉ោង១៧និង៣០នាទី នៅចំណុចភូមិជើងគោ ឃុំជើងគោ ស្រុកព្រៃនប់ ខេត្តព្រះសីហនុ មានករណីហិង្សាដោយចេតនាមានស្ថានទម្ងន់ទោស ០១កើតឡើង បង្កដោយជនសង្ស័យម្នាក់ឈ្មោះ យ៉ែម ចិន្តា ភេទប្រុស អាយុ ៤៣ ឆ្នាំ មុខរបរ កម្មករដុតធ្យូង មានទីលំនៅចំណុចកើតហេតុខាងលើ បានធ្វើសកម្មភាពវាយទៅលើជនរងគ្រោះឈ្មោះ វុន វ៉ាន់ ភេទស្រី អាយុ ៣៦ ឆ្នាំ (ត្រូវជាប្រពន្ធរបស់ខ្លួន) មុខរបរមេផ្ទះ មានទីលំនៅជាមួយគ្នា បណ្តាលឲ្យរងរបួសធ្ងន់រលូតកូនក្នុងផ្ទៃ និងបានស្លាប់នៅថ្ងៃ១១ ខែឧសភា ឆ្នាំ២០២២ វេលាម៉ោង១៥និង០០នាទី ក្រោយពេលបញ្ជូនទៅដល់មន្ទីរចម្ការចេកខេត្តព្រះសីហនុ ក្រោយពេលធ្វើសកម្មភាព រួចជនសង្ស័យបានរត់គេចខ្លួនបាត់តែម្តង ។
ករណីនេះក្រោយពេលកើតហេតុ កម្លាំងមិនបានទទួលព័ត៌មានទេ ដោយសារគ្មានអ្នកផ្តល់ព័ត៌មាន ព្រោះពេលកើតហេតុភ្លាមៗកូនៗរបស់ជនរងគ្រោះ បានដឹកយកជនរងគ្រោះមកមណ្ឌលសុខភាពឃុំជើងគោ ហើយពេទ្យប្រចាំការបានឃើញជនរងគ្រោះ មានសភាពធ្ងន់ធ្ងរក៏បានហៅរថយន្តសង្គ្រាះ របស់មណ្ឌលសុខភាពវាលរេញមកដឹកទៅមន្ទីរពេទ្យចម្ការចេកខេត្តព្រះសីហនុតែម្តង ដោយពុំបានផ្តល់ព័ត៌មានដល់សមត្ថកិច្ចឡើយ ។
បន្ទាប់ពីទទួលបានព័ត៌មាននេះភ្លាម លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានចាត់ឲ្យ កម្លាំងនៃអធិការដ្ឋាននគរបាលស្រុកព្រៃនប់ បានធ្វើការស្រាវជ្រាវយ៉ាងយកចិត្តទុកដាក់ ដោយបានសហការជាមួយការិយាល័យព្រហ្មទណ្ឌខេត្តព្រះសីហនុ កម្លាំងនាយកដ្ឋានព្រហ្មទណ្ឌ និងនគរបាលខេត្តកំពុងស្ពឺ ធ្វើការស្ទាក់ឃាត់ខ្លួនជនសង្ស័យខាងលើបាន នៅចំណុចលើដងផ្លូវជាតិលេខ៤ ត្រង់ភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ នាវេលាម៉ោង១៧ និង ០៥ ថ្ងៃទី១២ ខែឧសភា ឆ្នាំ២០២២ ខណ:ពេលដែលជនសង្ស័យកំពុងជិះរថយន្តក្រុង ដើម្បីគេចខ្លួនទៅភ្នំពេញ ។
បច្ចុប្បន្នជនសង្ស័យកំពុងដឹកយកមកអធិការដ្ឋាននគរបាលស្រុកព្រៃនប់ ដើម្បីបំពេញនីតិវិធី និងចាត់ការតាមផ្លូវច្បាប់ ៕
មតិយោបល់