ភ្នំពេញ: ករណីគ្រោះថ្នាក់ចរាចរណ៍ មួយដែលរថយន្តព្រូល វាក់អើហ្រ្វាំងមិនទាន់ បួងចង្កូតគេចមិនផុត ជ្រុលទៅបុកកាងរថយន្តឃ្លប់ដឹកទំនិញ ដែលបើកនៅខាងមុខរួចជាន់ហ្រ្វាំងឈប់ភ្លាមៗ បណ្តាលឲ្យរថយន្តព្រូស ខូចខាតផ្នែកខាងមុខយ៉ាងដំណំ ។

ហេតុការណ៍ខាងលើ បង្កការភ្ញាក់ផ្អើល កាលពីវេលាម៉ោង៧និង៣៥នាទីព្រឹក ថ្ងៃទី១ ខែមិថុនា ឆ្នាំ២០២២ ទីតាំងនៅតាមបណ្តោយផ្លូវជាតិលេខ៤ ក្នុងភូមិព្រៃបឹង សង្កាត់កន្ទោក ខណ្ឌកំបូល រាជធានីភ្នំពេញ ។

តាមប្រភពព័ត៌មាន នៅកន្លែងកើតហេតុបានឲ្យដឹងថា ដំបូងគេបានឃើញរថយន្តទាំង២ ធ្វើដំណើរស្របទិសដៅគ្នាពីលិចទៅកើត ដែលរថយន្តនៅខាងមុខ ប្រភេទឃ្លប់ដឹកទំនិញ ពាក់ស្លាកលេខ ភ្នំពេញ 3F-1068 ខណ:ពេលកំពុងបើកបរភ្លាមនោះ សង្ស័យមានរថយន្តនៅខាងមុខមួយគ្រឿងទៀត បន្ថយល្បឿនទើបរថយន្តឃ្លប់ដឹកទំនិញខាងលើ ជាន់ហ្រ្វាំងឈប់ភ្លាមៗ ស្របពេលនោះរថយន្តព្រូស ពាក់ស្លាកលេខ ភ្នំពេញ 2BP-2804 មកពីក្រោយវាក់អើហ្រ្វាំងមិនជាប់ បួងចង្កូតគេចដែរតែមុនផុត បណ្តាលឲ្យជ្រុលទៅបុកកាងរថយន្តឃ្លប់ដឹកទំនិញ បណ្តាលឲ្យរងការខូចខាតខ្លួនឯង ផ្នែកខាងមុខយ៉ាងដំណំ ។

ក្រោយកើតហេតុសមត្ថកិច្ចមូលដ្ឋាន បានចុះដល់ទីតាំងកន្លែងកើតហេតុ និងឲ្យភាគីទាំងសងខាងធ្វើការសម្របសម្រួលគ្នាមួយជំហានសិន បើមិនត្រូវគ្នានិងរាយការណ៍ទៅផ្នែកជំនាញចរាចរណ៍ នៃអធិការដ្ឋាននគរបាលខណ្ឌកំបូល ចុះធ្វើការវាស់វែងយកទៅរក្សាទុក ៕