ពោធិ៍សាត់: យោងតាមផេក ផ្សព្វផ្សាយអប់រំ ក្រសួងមហាផ្ទៃ បានឲ្យដឹងថា កាលពីថ្ងៃអង្គារ ១៤កើត ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១២ ខែកក្ដដា ឆ្នាំ២០២២ វេលាម៉ោង១៨និង១៥នាទី មានករណីគ្រោះថ្នាក់ធម្មជាតិជំនន់ទឹកភ្លៀង ទឹកហូរកាត់ផ្លូវហូរកួចយកមនុស្ស និងម៉ូតូពេលកំពុងធ្វើដំណើរឆ្លងកាត់ បណ្ដាលឲ្យធ្លាក់ចូលក្នុងស្ទឹងស្លាប់ចំនួន០៣នាក់ ស្រី០២នាក់ នៅកំណាត់ផ្លូវជាតិលេខ៥៥ ចន្លោះគីឡូម៉ែត្រលេខ ១៥៥–១៥៦ ចំណុចស្ទឹងកាច់ ភូមិឯកភាព ឃុំថ្មដា ស្រុកវាលវែង ខេត្តពោធិ៍សាត់ ។
លោកវរសេនីយ៍ឯក ធាង ឡេង អធិការនគរបាលស្រុកវាលវែង បានឲ្យដឹងថានៅថ្ងៃទី១៤ ខែកក្ដដា ឆ្នាំ២០២២វេលាម៉ោង១២និង០០នាទីថ្ងៃ សមត្ថកិច្ចបានទទួលព័ត៌មានពីប្រជាពលរដ្ឋថា មានករណីមនុស្សស្លាប់ដោយសារលង់ទឹក ភ្លាមនោះសមត្ថកិច្ចក៏បានចុះដល់ចំណុចកើតហេតុ បានប្រទះឃើញសាកសពឪពុកនិងកូនស្រី សពត្រូវបានសមត្ថកិច្ចស្គាល់អត្តសញ្ញាណ ។
ទី១–ឈ្មោះ ជា សុខគឿន ភេទប្រុស អាយុ៣៩ឆ្នាំ
២–ឈ្មោះ ចាន់ ភក្តី ភេទស្រី អាយុ ៣៥ឆ្នាំ (ត្រូវជាប្រពន្ធមានផ្ទៃពោះ០៧ខែ) រកសពមិនទាន់ឃើញ
៣–ឈ្មោះ លី ចាន់ថា ហៅឆៀងម៉ៃ ភេទស្រី អាយុ០៣ឆ្នាំ (ត្រូវជាកូន) សាកសពខាងលើ មានទីលំនៅភូមិឈើទាល ឃុំត្នោតជុំ ស្រុកក្រគរ ខេត្តពោធិ៍សាត់ និងម៉ូតូម៉ាក Dream C125 ពណ៌ខ្មៅ ផលិតឆ្នាំ២០១៨ ពាក់ស្លាកលេខពោធិ៍សាត់1I-7548។
លោកអធិការបានបន្តទៀតថា បច្ចុប្បន្នសមត្ថកិច្ចបានប្រគល់សព ដែលរកឃើញទៅឲ្យក្រុមគ្រួសារសាច់ញាតិយកទៅធ្វើបុណ្យតាមប្រពៃណី ចំពោះសាកសពដែលមិនទាន់រកឃើញ កម្លាំងនគរបាលសហការជាមួយកម្លាំងយោធា និងកម្លាំងកងរាជអាវុធហត្ថស្រុក កំពុងស្វែងរកបន្ត ៕
មតិយោបល់