បន្ទាយមានជ័យៈ យោងតាមផេករបស់ផ្សព្វផ្សាយអប់រំ ក្រសួងមហាផ្ទៃ បានឲ្យដឹងថា នៅថ្ងៃសៅរ៍ ៣ រោច ខែអាសាឍ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី១៦ ខែកក្កដា ឆ្នាំ២០២២ នគរបាលស្រុកថ្មពួក បានបញ្ជូនខ្លួនជនសង្ស័យប្រុស ស្រី ចំនួន ០២នាក់ ទៅស្នងការដ្ឋាននគរបាលខេត្តបន្ទាយមានជ័យ ដើម្បីចាត់ការបន្តតាមនិតិវិធី បន្ទាប់ពីឃាត់ខ្លួនជាបន្តបន្ទាប់និងស្រាវជ្រាវរកឃើញនូវសារធាតុញៀនខុសច្បាប់ ។
លោកវរសេនីយ៍ទោ ឈឿន គឹមឈុន អធិការនគរបាល ស្រុកថ្មពួក បានឲ្យដឹងថា ៖ នៅវេលាម៉ោង១០និង៣០នាទីយប់ថ្ងៃទី១៤ ខែកក្កដា ឆ្នាំ២០២២ កម្លាំងនគរបាលប៉ុស្តិ៍រដ្ឋបាលឃុំគំរូ បានចុះការពារកម្មវិធី ប្រគុំតន្ត្រីខនសឺត នៅចំណុចផ្សារធំគំរូថ្មី ស្ថិតក្នុងភូមិសាស្ត្រភូមិផ្សារថ្មី ឃុំគំរូ ស្រុកថ្មពួក ខេត្តបន្ទាយមានជ័យ បានឃាត់ខ្លួនជនសង្ស័យ០១នាក់ ជាមុខសញ្ញាចែកចាយគ្រឿងញៀន(មុខសញ្ញាចាស់ធ្លាប់ជាប់ពន្ធនាគារ) ឈ្មោះ ខឿន ញី (ខ្ញី) ភេទប្រុស អាយុ២៨ឆ្នាំ រស់នៅភូមិផ្សារថ្មី ឃុំគំរូ ស្រុកថ្មពួក ដោយឆែកឆេររកឃើញម្ស៉ៅក្រាមសថ្លា(សង្ស័យថ្នាំញៀន)ចំនួន០៣ថង់តូច និងថ្នាំញៀនប្រភេទគ្រាប់ពណ៌ក្រហម១ជ្រុងដាក់ក្នុងកាបូបក្រវ៉ាត់ចង្កេះ ដែលជនសង្ស័យបានក្រវែងបោះចោលនៅក្បែរខ្លួន វត្ថុតាងដកហូតបានមានម៉ូតូ០១គ្រឿង , ទូរស័ព្ទដៃ0១គ្រឿង, បំពង់ប៊ឺត២កំណាត់, ដែកកេះចំនួន០១, អំពូលភ្លើងកែឆ្នៃចំនួន១ ដែលដាក់ក្នុងកាបូបក្រវាត់ចង្កេះនោះ ។ ជនសង្ស័យក្រោយពីឃាត់ខ្លួននិងធ្វើតេស្តទឹកនោមរកសារធាតុញៀនគឺវិជ្ជមាន។
លោកអធិការបានបន្តថា ៖ ក្រោយពីឃាត់ខ្លួននិងធ្វើការសាកសួរ កម្លាំងជំនាញសហការជាមួយកម្លាំងប៉ុស្តិ៍នគរបាលឃុំគោករមៀត នៅវេលាម៉ោង១១ព្រឹក ថ្ងៃទី១៥ ខែកក្កដា ឆ្នាំ២០២២ បានឃាត់ខ្លួនជនសង្ស័យ០១នាក់ទៀត ឈ្មោះ អន ចិន្ដា (ហ៊ុប) ភេទស្រី អាយុ 40ឆ្នាំ រស់នៅភូមិបន្ទាយមានរឹទ្ធិ ឃុំគោករមៀត ស្រុកថ្មពួក បានដកហូតវត្ថុតាង ម្ស៉ៅក្រាមសថ្លាចំនួន១ថង់តូច និង ថ្នាំញៀនប្រភេទគ្រាប់ពណ៌ក្រហមមានអស្សរអង់គ្លេសWYចំនួន១៥គ្រាប់។
លោកវរសេនីយ៍ទោ ឈឿន គឺមឈុន បានបញ្ជាក់ថា ៖ ចំពោះលទ្ធផល ដែលកងកម្លាំងនគរបាលស្រុកថ្មពួកអនុវត្តសម្រេចបាននេះ ដោយអនុវត្តតាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងមានការសម្របសម្រួលនិតិវិធីដោយឯកឧត្តមព្រះរាជអាជ្ញាអមសាលាដំបូងខេត្តបន្ទាយមានជ័យ៕
![](https://i0.wp.com/cdn.pnm.news/2022/07/postnews.com.kh.2022-07-16_20-11-20.jpg?resize=640%2C497&ssl=1)
![](https://i0.wp.com/cdn.pnm.news/2022/07/postnews.com.kh.2022-07-16_20-11-28.jpg?resize=640%2C424&ssl=1)
![](https://i0.wp.com/cdn.pnm.news/2022/07/postnews.com.kh.2022-07-16_20-11-35.jpg?resize=640%2C816&ssl=1)
![](https://i0.wp.com/cdn.pnm.news/2022/07/postnews.com.kh.2022-07-16_20-11-40.jpg?resize=640%2C717&ssl=1)
មតិយោបល់