ភ្នំពេញ: នាវេលាម៉ោង១២និង៤០នាទីយប់រំលងអធ្រាត្រឈានចូលថ្ងៃទី២៨ ខែធ្នូ ឆ្នាំ២០២២ យុវតីម្នាក់ជិះម៉ូតូ១គ្រឿង ត្រូវជនសង្ស័យ២នាក់ ជិះម៉ូតូធ្វើសកម្មភាពឆក់កាបូបបានសម្រេច បណ្តាលឲ្យដួលរងរបួសជាទម្ងន់ ទីតាំងនៅទល់មុខវិទ្យាស្ថានស្រាវជ្រាវព្រៃឈើ ស្ថិតតាមបណ្ដោយផ្លូវហាណូយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
ហេតុការណ៍៖ នៅមុនពេលកើតហេតុ គេឃើញនារីវ័យក្មេងម្នាក់ បានជិះម៉ូតូ១គ្រឿងម៉ាក ZOOMER-X ពណ៌ប្រផេះ ពាក់ស្លាកលេខ ភ្នំពេញ 1FY-9504 ធ្វើដំណើរតាមបណ្ដោយផ្លូវហាណូយ មានទិសដៅពីត្បូងទៅជើង ពេលមកដល់ត្រង់ចំណុចកើតហេតុ ផ្លូវមានសភាពស្ងាត់ ស្រាប់តែលេចមុខជនសង្ស័យ២នាក់ ជិះម៉ូតូ១គ្រឿង ម៉ាកហុងដាឌ្រីម ជិះតាមពីក្រោយនារីរងគ្រោះ បានធ្វើសកម្មភាពឆក់កាបូបជនរងគ្រោះបានសម្រេច បណ្តាលឲ្យជនរងគ្រោះដួលរងរបួសធ្ងន់ ចំណែកជនសង្ស័យបានបន្ថែមល្បឿន ជិះគេចខ្លួនបាត់ស្រមោល ។
នៅក្រោយពេលកើតហេតុ សាច់ញាតិជនរងគ្រោះបានបើករថយន្តមកដឹក និងយកម៉ូតូចេញទៅបាត់ ដោយមិនបានទៅដាក់ពាក្យបណ្ដឹងដល់សមត្ថកិច្ចនោះទេ ៕
មតិយោបល់