ភ្នំពេញ: មានការភ្ញាក់ផ្អើលមួយបានកើតឡើង កាលពីវេលាម៉ោង៦ល្ងាចថ្ងៃទី១១ ខែឧសភា ឆ្នាំ២០១៧ នៅក្នុងភូមិចម្ការឪឡឹក សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ បន្ទាប់ពីមានស្រ្តីម្នាក់ ដេកស្លាប់នៅក្នុងបន្ទប់ទឹកក្នុងផ្ទះរបស់ខ្លួន ដែលគេមានការសង្ស័យថា ស្លាប់ដោយអំពើឃាតកម្ម ប្លន់សម្លាប់យកទូដែក ក្នុងខណ:ដែលស្រ្តីរងគ្រោះខាងលើ កំពុងស្ថិតនៅក្នុងផ្ទះតែម្នាក់ឯង ហើយអ្នកដែលប្រទះឃើញសាកសពនោះគឺជាកូនបង្កើតរបស់ជនរងគ្រោះ ក្រោយពេលដែលគេត្រឡប់មកពី សាលារៀនវិញ។

ស្រ្តីរងគ្រោះខាងលើនោះត្រូវបានគេស្គាល់ឈ្មោះ ទូច ម៉ារី អាយុ៣៣ឆ្នាំ មានកូនចំនួន៤ ហើយគាត់ទើបតែ សម្រាលកូនស្រីពៅទើបតែបានរយ:ពេល២ខែប៉ុណ្ណោះ ហើយសព្វថ្ងៃស្នាក់នៅ ផ្ទះលេខ I -13 ក្រុមទី៨ ភូមិចម្ការឪឡឹក សង្កាត់កាកាប និងមានស្រុកកំណើតនៅក្នុងឃុំកោះធំ ស្រុកកោះធំ ខេត្តកណ្ដាល។

តាមប្រភពព័ត៌មានបានឲ្យដឹងថា មុនពេលកើតហេតុ ស្រ្តីរងគ្រោះបាននៅផ្ទះតែម្នាក់ឯងជាមួយកូនស្រី អាយុ២ខែនោះប៉ុណ្ណោះ ដោយសារតែកូនធំៗបានទៅរៀន ចំណែកបុរសជាប្ដីបានទៅរកទិញបន្លែ នៅឯស្រុក ស្អាង ខេត្តកណ្ដាល យកទៅលក់នៅផ្សារនាគមាស រាជធានីភ្នំពេញ។ ខណ:នោះមិនមាននរណាម្នាក់បាន ដឹងថាគាត់មានរឿងអ្វីនោះទេ រហូតដល់ពេលកើតហេតុ ក្រោយពេលត្រឡប់ពីសាលារៀនទៅដល់ផ្ទះ កូនរបស់គាត់បានប្រទះឃើញសាកសពម្ដាយដេកស្លាប់បាត់ទៅហើយ ទើបស្រែកប្រាប់អ្នកជិតខាងឲ្យទៅ មើលបង្កឲ្យមានការភ្ញាក់ផ្អើលតែម្ដង។

ប្រភពដដែលបានបន្តទៀតថា ខណ:នោះនគរបាលបានចុះទៅពិនិត្យមើល ហើយមុនដំបូងបានសន្និដ្ឋានថា ជនរងគ្រោះដើររអិលដួលបោកក្បាលស្លាប់ ប៉ុន្តែក្រោយមកបានសង្ស័យថា ស្លាប់ដោយអំពើឃាតកម្មប្លន់ សម្លាប់យកទូរដែកវិញ ព្រោះក្រោយពេលសាច់ញាតិរបស់សាកសពទៅដល់ ឡើងទៅមើលកន្លែងទុកទូដែកនៅជាន់ឡៅតឿ បាត់មិនឃើញទូដែក ហើយខលសួរទៅបុរសជាប្ដីប្រាប់ថា មានទូដែកមែន ពេលនេះនគរបាលកំពុងធ្វើការស្រាវជ្រាវរកការពិតហើយ៕