-

ករណីរថយន្តពីរ​គ្រឿងបុក​គ្នាពេញទំហឹង​ ផ្តាច់យកជីវិតមនុស្សម្នាក់ និងម្នាក់ទៀតរងរបួសធ្ងន់

​បន្ទាយ​មាន​ជ័យ:​ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា​ មនុស្ស​ម្នាក់​បាន​ស្លាប់​ និង​ម្នាក់​ទៀត​រង​របួសស្រាល​ក្នុង​ហេតុការណ៍​គ្រោះថ្នាក់​ចរាចរណ៍​ កើតឡើង​នៅ​វេលា​ម៉ោង​១០​និង​១០​នាទី​យប់​ថ្ងៃ​ទី​២៩​ ខែធ្នូ​ ឆ្នាំ​២០២២​ លើ​កំណាត់​ផ្លូវជាតិ​លេខ​៦ (​ក្រៅ​ទីប្រជុំជន​)​ ត្រង់​ចំណុច​ចន្លោះ​បង្គោលគីឡូម៉ែត្រ​លេខ ​៣៨៤-៣៨៥​ ស្ថិត​នៅ​ភូមិ​រហាល​ ឃុំ​រហាល​ ស្រុក​ព្រះនេត្រព្រះ​ ខេត្តបន្ទាយមានជ័យ​ បង្ក​ដោយ​រថយន្ត​២​គ្រឿង​ប៉ះទង្គិច​គ្នា​ ។​

​អធិការ​នគរបាល​ ស្រុក​ព្រះនេត្រព្រះ​ លោក​វរសេនីយ៍ទោ​ ទេព​ រ​ដ្ឋា​ បាន​ឲ្យ​ដឹង​ថា​ គ្រោះថ្នាក់​ចរាចរណ៍​នេះ​គឺ​រថយន្ត​បុក​ជាមួយ​រថយន្ត​ក្នុង​ទិស​ដៅ​ផ្ទុយ​គ្នា​ ។​ ដំបូង​មាន​រថយន្ត​មួយ​គ្រឿង​ម៉ាក​HIGHLANDER​ ព​ណ៌​ទឹកប្រាក់​ ពាក់​ស្លាក​លេខ​ភ្នំពេញ​ 2AC-2780​ បើកបរ​ដោយ​ឈ្មោះ​ សើ​ សៀង​ ភេទ​ប្រុស​ អាយុ​២៤​ឆ្នាំ​ រស់នៅ​ភូមិ​ទ្រ​លោក​ខាងត្បូង​ ឃុំ​ភ្នំ​លៀប​ ស្រុក​ព្រះនេត្រព្រះ​ ខេត្តបន្ទាយមានជ័យ​ និង​អ្នក​រួម​ដំណើរ​០១​នាក់​ឈ្មោះ​ សើ​ សៀង​ហួ​ ភេទ​ប្រុស​ អាយុ​២៦​ឆ្នាំ​ រស់នៅ​ភូមិ​ឃុំ​ជាមួយ​គ្នា​ ។​ ពេល​មក​ដល់​ចំណុច​កើតហេតុ​ខាងលើ​ បាន​រេ​ចង្កូត​ទៅ​ខាងឆ្វេង​ដៃ​ជ្រុល​បុក​ជាមួយ​រថយន្ត​ម៉ាក​ HYUNDAI​ ពណ៌​ស​ ខៀវ​ក្បាល​ ពាក់​ស្លាក​លេខ​ត្បូងឃ្មុំ​ 3A-4194​ និង​មាន​សណ្តោង​រ៉ឺ​ម៉ក​ពាក់​ស្លាក​លេខ​ត្បូងឃ្មុំ​ 4A-0135 ​អ្នកបើកបរ​ (​ក្តាប់​អត្តសញ្ញាណ​មិន​បាន​)​ ។​

​លោក​អធិការ​បាន​បញ្ជាក់​ថា​ ក្នុង​ករណី​គ្រោះថ្នាក់​នេះ​បណ្តាល​ឲ្យ​មនុស្ស​ស្លាប់​០១​នាក់​ នៅ​កន្លែង​កើតហេតុ​(​អ្នក​រួម​ដំណើរ​រថយន្ត​Highlander)​ និង​របួសស្រាល​០១​នាក់​ (​អ្នកបើកបរ​រថយន្ត​highlander)​ ។​ ក្នុង​នោះ​រថយន្ត​ HIGHLANDER​ ខូចខាត​ធ្ងន់​ផ្នែក​ខាង​មុខ​ រថយន្ត​ម៉ាក​ HYUNDAI​ ខូចខាត​ធ្ងន់​ផ្នែក​ខាង​មុខ​ ។​

​ក្រោយ​កើតហេតុ​ សមត្ថកិច្ច​បាន​ចុះ​វាស់វែង​ធ្វើ​កំណត់ហេតុ​ រួច​នាំ​យក​មធ្យោបាយ​ទាំង​២​គ្រឿង​ទៅ​រក្សា​ទុក ​នៅ​អធិការដ្ឋាន​ រង់ចាំ​ធ្វើការ​ដោះស្រាយ​នៅ​ពេល​ក្រោយ​ ។​ ចំណែក​សព​ជន​រង​គ្រោះ ​ប្រគល់​ជូន​ក្រុម​គ្រួសារ​យក​ទៅ​ចាត់ចែង​ធ្វើបុណ្យ​តាម​ប្រពៃណី​ ៕

មតិយោបល់