ខេត្ដកណ្ដាល : យោងតាមផេក អគ្គស្នងការដ្ឋាននគរបាលជាតិ ក្រុមក្មេងស្ទាវ៣នាក់ប្រដាប់ដោយដាវនិងកាំបិត នាំគ្នាជិះម៉ូតូបម្រុងទៅកាប់គេ តែមិនទាន់បានធ្វើសកម្មភាពផង ត្រូវនគរបាលស្រុកកណ្ដាលស្ទឹងឃាត់ខ្លួនធ្វើការសួរនាំ ។
ករណីចាប់ខ្លួននេះ ធ្វើឡើងនៅថ្ងៃទី១១ ខែកុម្ភ: ឆ្នាំ ២០២៣ វេលាម៉ោង០១និង២០នាទីព្រឹក ចំណុចភូមិចំបក់ត្រប់ ឃុំព្រែករកា ស្រុកកណ្ដាលស្ទឹង ខេត្តកណ្ដាល ។
មន្ត្រីនគរបាលស្រុកកណ្ដាលស្ទឹងបានឲ្យដឹងថា ជនសង្ស័យ០៣នាក់៖ ១.ឈ្មោះ ស ណារិទ្ធ ហៅ ចិន ភេទ ប្រុស អាយុ១៧ឆ្នាំ រស់នៅភូមិ ឃ្លាំងសម្បត្តិ ឃុំ ពត់ស ស្រុកបាទី ខេត្តតាកែវ មុខរបរ កម្មករសំណង់។ ២.ឈ្មោះ សុង គឹមរី ហៅ ចយភេទ ប្រុស អាយុ ១៧ ឆ្នាំ រស់នៅភូមិ ឃ្លាំងសម្បត្តិ ឃុំ ពត់ស ស្រុក បាទី ខេត្ត តាកែវ មុខរបរ មិនពិតប្រាកដ និង៣.ឈ្មោះ ហេង សក្កា ភេទ ប្រុស អាយុ១៨ឆ្នាំ រស់នៅភូមិ ឃ្លាំងសម្បត្តិ ឃុំពត់ស ស្រុកបាទី ខេត្តតាកែវ មុខរបរ ដឹកជញ្ជូនអីវ៉ាន់ ។
វត្ថុតាងចាប់យករួមមាន ៖ ម៉ូតូ ០១ គ្រឿងម៉ាក់ Honda Dream C125 ពណ៌ខ្មៅ ស៊េរីឆ្នាំ ២០១៤ ពាក់ស្លាកលេខតាកែវ 1C 2813 ដាវដងឫស្សី ផ្លែដែក ប្រវែង៦៥សង្ទីម៉ែត្រ កាំបិតប៉័ងតោ ០១ ទូរស័ព្ទដៃ២គ្រឿង ។
បច្ចុប្បន្ន ជនសង្ស័យទាំង០៣នាក់ខាងលើ រួមទាំងវត្ថុតាង កម្លាំងជំនាញបានបញ្ជូនមកកាន់អធិការដ្ឋាននគរបាលស្រុកកណ្ដាល ដើម្បីកសាងសំណុំរឿងអនុវត្តបន្តតាមនីតិវិធី ៕
មតិយោបល់