ធនាគារមេយប៊ែងទើបតែចេញរបាយការណ៍ស្តីពីប្រាក់ចំណេញក្រោយដកពន្ធ និង ម្ចាស់ ភាគហ៊ុនអប្បភាគ (PATAMI) ចំនួន 1,35 ពាន់លានរីងហ្គីត សម្រាប់រយ:ពេលបីខែបញ្ចប់ត្រឹម ថ្ងៃទី31 ខែមីនា ឆ្នាំ2012 កើនឡើង 17.9% ដោយរាប់ចាប់ពី 1.14 ពាន់លានរីងហ្គីតក្នុងខែមីនា ឆ្នាំ2011។
ប្រាក់ចំណេញមុនដកពន្ធរបស់សម្ព័ន្ធធនាគារក្នុងពេលនេះកើនបាន 20.2% ដោយទឹកប្រាក់កើនដល់ទៅ 1.89 ពាន់លានរីងហ្គីត។
លោកតាន់ស្រ៊ី មេហ្កាត ហ្សាហារ៉ូឌីនមេហ្កាត មហាម៉ាត់ នរ ប្រធានក្រុមប្រឹក្សាភិបាលនៃធនាគារមេយប៊ែង បានមានប្រសាសន៍ថា «ខ្ញុំរីករាយដែលធនាគារមេយប៊ែងបន្តការខិតខំដើម្បីបង្ហាញនូវការប្តេជ្ញាដ៏រឹងមាំ ទោះបីស្ថិតនៅក្នុងបរិយាកាសសេដ្ឋកិច្ចពិភពលោកពោរពេញដោយការប្រកួតប្រជែងក៏ដោយ។ ការកើនឡើងខ្លាំងនៃប្រាក់ចំណេញនៅពេលនេះ គឺជាការឆ្លុះបញ្ចាំងនូវភាពរឹងមាំដែលយើងខិតខំកសាងរយ:ពេលពីរបីឆ្នាំកន្លងមកនេះ មិនតែប៉ុណ្ណោះយើងថែមទាំងបានពង្រីកវិសាលភាពក្នុងតំបន់ទៀតផង។ បច្ចុប្បន្នយើងផ្តោតការយកចិត្តទុកដាក់ទាំងស្រុងលើការជំរុញប្រតិបត្តិការថ្នាក់តំបន់ និងធានាឲ្យបាននូវភាពរឹងមាំដើម្បីផ្តល់ជូនគុណតម្លៃកាន់តែល្អប្រសើរដល់ម្ចាស់ភាគហ៊ុនទាំងឡាយរបស់យើង»។
ក្នុងផ្នែកពាណិជ្ជកម្ម មានការសម្រេចបាននូវសមិទ្ធិផលសំខាន់ៗជាច្រើនដូចជា៖
– ប្រាក់ចំណេញមុនដកពន្ធកើនបាន 46.4% ទឹកប្រាក់ឡើងដល់ 928 លានរីងហ្គីត ដោយសារ មានការកើនឡើង នៅផែ្នកសារជីវកម្មខ្នាតធំសាកលរបស់ធនាគារ (408លានរីងហ្គីត) ធនាគារ សាជីវកម្ម (404 លានរីងហ្គីត) និង ធនាគារវិនិយោគ (116លានរីងហ្គីត)។
– ប្រាក់ចំណេញមុនដកពន្ធចំនួន 463 លានរីងហ្គីតពីធនាគារអន្តរជាតិ ឡើងរហូតដល់ 41.2% ពីមួយឆ្នាំដំបូង។
– ប្រាក់ចំណេញមុនដកពន្ធសម្រាប់អាជីវកម្ម Insurance & Takaful កើនឡើង 22.4% ដោយ ទឹកប្រាក់កើនដល់ 100 លានរីងហ្គីត។
– ប្រាក់ចំណេញមុនដកពន្ធ និង មុនវិភាគទានសប្បុរសធម៌របស់ធនាគារ Group Islamic មាន ការស្ទុះឡើងខ្លាំងដល់ 74.8% រហូតដល់កើនទឹកប្រាក់ 352.9 លានរីងហ្គីត។
លោក ដាទុ អាប់ដុល វ៉ាហ៊ីដ អូម៉ា ប្រធាន និង នាយកប្រតិបត្តិនៃធនាគារមេយប៊ែង បានបង្ហាញនូវចំណាប់អារម្មណ៍ថា «យើងមានកម្លាំងចិត្តខ្ពស់ពេលឃើញមានការរីកចម្រើនជាបន្តបន្ទាប់នៅគ្រប់បណ្តាញ ព្រោះនេះជាការបញ្ជាក់ថា នឹងមានឱកាសថ្មីៗជាច្រើនទៀតដើម្បីទ្រទ្រង់ដល់ស្មារតីអភិវឌ្ឍរបស់យើង។ យើងរក្សាការយកចិត្តទុកដាក់លើការបង្កើនភាពទទួលខុសត្រូវ និង ប្រាក់ចំណេញ ហើយយើងជឿជាក់ថាទីផ្សារដ៏ទូលំទូលាយរបស់យើង នឹងផ្តល់ដល់យើងនូវលទ្ធភាពកាត់បន្ថយផលវិបាកនៃការធ្លាក់ចុះនៃសេដ្ឋកិច្ចពិភពលោក»។
មតិយោបល់