ភ្លក់រសជាតិ នំអន្សមជ្រូក ជាមួយដំណឹងទាំងអស់គ្នា

p style=”text-align: center;”>

នំ និងបង្អែមរបស់ខ្មែរ ត្រូវបានគេទទួលស្គាល់ថា មានរសជាតិឆ្ងាញ់ពិសារ ជាពិសេសគឺនំអន្សមជ្រូក។

នំអន្សមជ្រូក គឺជានំដែលប្រជាជនខ្មែរនិយមធ្វើតាំងពីបុរាណមកម្ល៉េះ។ តាមទំនៀមទម្លាប់ គេច្រើនធ្វើនំអន្សមជ្រូកនៅពេល បុណ្យភ្ជុំបិណ្ឌ បុណ្យចូលឆ្នាំខ្មែរ និងក្នុងពិធីរៀបអាពាហ៍ពិពាហ៍របស់ប្រជាជនកម្ពុជា … សព្វថ្ងៃ នំនេះត្រូវគេធ្វើអាជីវកម្មនៅលើទីផ្សារ។

គ្រឿងផ្សំ

គ្រឿងផ្សំសម្រាប់មនុស្សបរិភោគចំនួន១០នាក់៖

អង្ករដំណើប១គីឡូក្រាម
ដូងទុំមួយ
ខ្លាញ់ជ្រូក(ដុំ) ៣០០ក្រាម
សណ្ដែកបាយ ៣០០ក្រាម
អំបិល ១ស្លាបព្រាបាយ
ម្សៅស៊ុប ១ភាគ២ស្លាបព្រាកាផែ
ម្រេច ១ភាគ២ ស្លាបព្រាកាផែ
ស្ករស ១ស្លាបព្រាបាយ
ខ្ទឹមស ៤ ឬ៥កំពឹស
សណ្ដែកដី ១០០ក្រាម (អាចមិនដាក់ក៏បាន តាមចំណូលចិត្ត)
បង្គា ១០០ក្រាម (អាចមិនដាក់ក៏បាន តាមចំណូលចិត្ត)
សាច់ក្រក ២គូ (អាចមិនដាក់ក៏បាន តាមចំណូលចិត្ត)
ស្លឹកចេក ១០ធាង
ខ្សែចង (ខ្សែចេក ក្រចៅ ឬខ្សែនីឡុងក៏បាន)។

វិធីធ្វើ

អង្ករអុំ ឬរើសឲ្យស្អាត យកទៅលាងឲ្យស្អាតដាក់ត្រាំទឹកពីរ ឬបីម៉ោង។
សណ្ដែកបាយកិនឲ្យបែកជាពីរ អុំឲ្យស្អាតកម្ទេចកំទី ដាក់ត្រាំទឹកក្ដៅឧណ្ហៗ ឬទឹកត្រជាក់ចំនួន៣ ឬ៤ម៉ោង។
ស្រង់អង្ករដាក់សម្រស់ឲ្យអស់ទឹកល្អ។
ដូងទុំកោស (កុំឲ្យដោយលលាដ៏ខ្មៅ) ពូតយកក្បាលខ្ទិះយកទៅដាក់រម្ងាស់ឲ្យឡើងខាប់ ដាក់អង្ករចូល កូរ ឬយកសាច់ដូងដែលកោសហើយទៅច្របល់ លាយជាមួយអង្ករ អំបិល ស្ករ ម្សៅស៊ុបបន្តិច (ធ្វើតាមវិធីណាមួយក៏បាន)។
សណ្ដែកបាយលាងយកសម្បកចេញឲ្យអស់ ដាក់សម្រស់ទុកមួយអន្លើសិន។
ខ្លាញ់ជ្រូកលាងទឹកឲ្យស្អាត រួចហាន់ជាចង្វាមូលប៉ុនមេដៃប្រវែង១៥ ឬ១៨សង់ទីម៉ែត (តាមចំនូលចិត្ត)។
បុកម្រេច ខ្ទឹមសឲ្យម៉ដ្ឋ ទើបដាក់ខ្លាញ់ជ្រូក ម្រេច ខ្ទឹមស អំបិល ម្សៅស៊ុបប្រឡាក់ច្របល់ឲ្យសព្វ ទុកមួយអន្លើសិន។
សណ្ដែកដីត្រាំទឹកឲ្យរីកសម្បក លាងជម្រះឲ្យស្អាត។
សាច់ក្រក លាងទឹកហាន់បញ្ឆិតស្ដើងៗ។
បង្គា លាងទឹកឲ្យស្អាត។
ចំណាំ ចំពោះសណ្ដែកដី សាច់ក្រក បង្គា បើអ្នកចង់ដាក់វា ត្រូវយកទៅច្របល់លាយក្នុងអង្ករឲ្យបានសព្វ។
ស្លឹកចេក ដាក់ហាលថ្ងៃឲ្យស្រពាប់បន្តិច ទើបយកមកហែកជាបន្ទះធំៗល្មមតាមចំណូលចិត្ត និងតាមទំហំនំដែលចង់បាន រួចជូតឲ្យស្អាត។
ខ្សែត្រូវច្រៀកតូចល្មមចង ហើយជ្រលក់ទឹកឲ្យទន់ (បើជាខ្សែចេក)។

របៀបវេចនំ

យកសំភារៈដែលបានផ្សំរួចមកដាក់ជិតខ្លួន។
ដាក់ស្លឹកចេក២ ឬ៣បន្ទះត្រួតលើគ្នា ហើយដួសអង្ករ ៣ឬ៤ស្លាបព្រាបាយដាក់ចំកណ្ដាលស្លឹក ហើយវាចឲ្យស្ដើង ឬក្រាស់តាមចំណូលចិត្ត។
ដួសសណ្ដែកបាយ៣ស្លាបព្រាបាយ ដាក់លើអង្ករវាចឲ្យបន្តិច ទើបដាក់ស្នូល(ខ្លាញ់ជ្រូក) ១ដុំពីលើសណ្ដែក។
លើកទ្រស្លឹកចេកឡើង ប្រមូលអង្ករក្ដោបឲ្យចូលគ្នា រុំឲ្យណែន យកខ្សែចងចំពាក់កណ្ដាលកុំឲ្យរបូត។ លើកបញ្ឈរហើយគោះផ្នែកខាងក្បាលនំឲ្យអង្ករធ្លាក់ចុះក្រោម (យកធាងចេក១កំណាត់បុកឲ្យណែន) ទើបបត់ស្លឹកចេក កាច់ក្បាលនំតាមបំនិនជា៣ជ្រុង ឬ៤ជ្រុងតាមចិត្តស្រឡាញ់។ រួចម្ខាង ទើបត្រឡប់នំបត់ក្បាលម្ខាងទៀតធ្វើដូចពីមុន ទុកមួយអន្លើ ធ្វើរបៀបនេះរហូតអស់អង្ករ សណ្ដែក និងស្នូល។

របៀបចង

គេត្រូវចងក្បាលនំទាំងសងខាងឲ្យតឹង បន្ទាប់មកគេចងជាកង់ៗ មានចន្លោះប្រវែងស្មើៗគ្នា កន្ទុយចំណងដែលនៅសល់ត្រូវចងក្រងបញ្ចូលគ្នាទើបស្អាតល្អ។
យកកម្ទេចស្លឹកចេកដែលនៅសល់ ទ្រាប់បាតឆ្នាំង រួចចាក់ទឹកប្រហែល១ភាគ៣នៃឆ្នាំង ដាក់ដាំឲ្យក្ដៅ ទើបដាក់នំតម្រៀបឲ្យអស់ យកកម្ទេចស្លឹកគ្របពីលើ រួចចាក់ទឹកថែមឲ្យលិចនំ រួចដុតភ្លើងឲ្យឆេះជាប់ល្អរហូត។ រយៈពេលស្ងោរ ពី៥ម៉ោងឡើងទៅ អាស្រ័យលើនំឆ្អិន សាច់អង្កររលាយសាច់មួយ។

គួរបញ្ជាក់ផងដែរថា កាលពីខែ សីហា កន្លងទៅនេះ សាលារាជធានីភ្នំពេញបានរៀបចំពិពណ៌នំ និងបង្អែមខ្មែរ ឆ្នាំ ២០១២ នៅមុខ សួនជិតវត្តឧណ្ណាលោម ដែលនៅក្នុងនោះមាននំ និងបង្អែមខ្មែរ សរុបទាំងអស់ចំនួន ៩៨ មុខ៖

១. នំបង់ខ្លាញ់ (១២): នំឃ្មោះ, នំសំបុកចាប, នំចង្កឹះ, នំពោតចៀន, នំក្រុប, នំក្រូច, នំពងអន្សម, នំជើងឆ្នាំង, នំកន្ទ្រំ, នំចេកឆាប, នំត្រាវចៀន និងនំកង។
២. នំវេចខ្ចប់ (៤០) : នំអន្សមជ្រូក, នំអន្សមចេក, នំសែសយ, នំស្លឹកស្រស់, នំអាកោរត្នោត, នំអកោរខ្ទឹះ, នំតៃឡៃ, នំអាម៉ុកខ្នុរ, នំចាក់ច័ន្ទ, នំចាក់ច័ន្ទសណ្តែកខៀវ, នំចាក់ច័ន្ទសណ្តែកក្រហម, នំកូរ, នំសណ្តែកកូរ, នំបាក់កែង, នំក្រឡជី, នំក្រឡាន, នំល្ពៅ, នំចេកបុក, នំទ្រាបបាយស, នំទ្រាបបាយខ្មៅ, នំផ្លែអាយ, នំត្រាវកូរ, នំលំអងចេក, នំទ្រាបធូរ៉េន, នំពពាយ, នំម្សៅជ្រែ, នំអាកោរ-ស្នូលសណ្តែក, នំអន្សមខ្នុរ, នំអន្សមដូង, នំគម, នំបត់, នំស្រួយ, នំបាញ់អ៊ូ(ស្នូលផ្អែម), នំស្លឹកចាកកោះកុង, នំស្លឹកចាក(កំពត), ទ្រាបខ្មៅស្នូលត្រាវ, តាប៉ែខ្មៅ, តាប៉ែស, នំកន្ទោងស្វាយស្នូលដូង, នំកូរពោត, នំបំពង់ចំហុយ។
៣- នំក្រៀម (៤) : នំថងមួន, នំដង្កូវ, នំត្រចៀកជ្រូក, នំខ្ញី។
៤- បង្អែម (១៦) : លតស្វិត(ម្សៅជ្រែ), លតអង្ករ, ចាហួយទឹក, បបរត្នោត, បបរដូងខ្ចី, បបរសណ្តែកខៀវ, បបរសណ្តែកក្រហម, បបរសណ្តែកសរ, ចាហួយ-ពងមាន់, ចាហួយធូរ៉េន, ចាហួយខ្ទឹះដូង, បាញ់បែវ, សង្យាល្ពៅ, បាយដំណើបធូរ៉េន, ត្រសក់ស្រូវ, គ្រាប់ត្នោត។
៥- ដំណាប់ (១០) : ដំណាប់កន្ទួត, ដំណាប់ពុទ្រា, ដំណាប់គ្រាប់ឈូក, ដំណាប់អំពិល, ដំណាប់ត្រាវ, ដំណាប់ចេក, ដំណាប់ស្វាយ, ដំណាប់ធូរ៉េន, ដំណាប់ម្នាស់។
៦- ទឹកផ្លែឈើ (១២) : ទឹកម្នាស់, ទឹកអំពិល, ទឹកត្របែក, ទឹកដូង, ទឹកសណ្តែក, ទឹកស្វាយទុំ, ទឹកក្រូច, ទឹកការ៉ុត, ទឹកត្នោត, ទឹកល្ហុង, ទឹកប្រទាលកន្ទុយក្រពើ, ទឹកព្នៅ។
៧- កាហេ្វ (១) : កាហេ្វមណ្ឌលគីរី, ទឹកឃ្មុំ។
៨- ការ៉េម (១) : ការ៉េមផ្លែឈើខ្មែរគ្រប់មុខ។
៩- ម្ហូបដែលមានពាក្យនំ (២) : នំបញ្ចុក, នំគ្រក់៕