ក្រុមហ៊ុនទូរស័ព្ទដៃហ្វាំងឡង់ Nokia បានយល់ព្រមលើកិច្ចព្រមព្រៀង ប្រកាសប៉ាតង់ថ្មីមួយ ជាមួយ ក្រុមហ៊ុន Reseach In Motion (RIM)។
យោងតាមទីភ្នាក់ងារព័ត៌មាន Reuters បានឲ្យដឹងថា ក្រុមហ៊ុនទាំងពីរ បានដោះស្រាយបញ្ហាប្តឹងផ្តល់ ដែលទាក់ទងនឹងការប្រកាសប៉ាតង់ ហើយក្រុមហ៊ុនហ្វាំងឡង់ នឹងដកពាក្យ បណ្តឹងចោទ ប្រកាន់ RIM ស្តីពីការប្រើប្រាស់ប៉ាតង់របស់ Nokia ដោយមិនបានសុំការអនុញ្ញាត នៅសហរដ្ឋអាមេរិក ចក្រភពអង់គ្លេស និងកាណាដា។
លោក Paul Melin នាយកផ្នែកកម្មសិទ្ធិបញ្ញា របស់ក្រុមហ៊ុន Nokia បានមានប្រសាសន៍ថា «យើងមាន សេចក្តីសោមនស្សរីករាយ ដោយបានដោះស្រាយជម្លោះ ប៉ាតង់ជាមួយ RIM និងបានឈាន មកដល់កិច្ចព្រមព្រៀងថ្មីមួយ។ កិច្ចព្រមព្រៀងថ្មីនេះ បង្ហាញឲ្យឃើញអំពីភាពនាំមុខគេ ផ្នែកប៉ាតង់របស់ Nokia នៅក្នុងឧស្សាហកម្ម ទូរស័ព្ទចល័ត និងអនុញ្ញាតឲ្យយើងផ្តោតចំណុច យកចិត្តទុក ដាក់បានកាន់តែប្រសើរឡើង ទៅលើឱកាស នៃការគ្រប់គ្រងប្រកាសប៉ាតង់ នៅក្នុងទីផ្សារ ទូរគមនាគមន៍»។
Nokia បានវិនិយោគទុនទឹកប្រាក់ប្រមាណ ៤៥.០០០ លានអឺរ៉ូ ទៅលើការស្រាវជ្រាវ អភិវឌ្ឍន៍ និងការបង្កើតផលប័ត្រ កម្មសិទ្ធិបញ្ញា ដ៏ទូលំទូលាយ និងរឹងមាំជាងគេ បំផុតនៅក្នុងឧស្សាហកម្ម ទូរស័ព្ទចល័ត ជាមួយនឹងប្រកាសប៉ាតង់ ប្រមាណ ១០.០០០៕
មតិយោបល់