ព្រឹកថ្ងៃទី២៣ ខែ មករា ឆ្នាំ២០១៣ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណ:រដ្ឋមន្រ្តីតំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែនបានអញ្ជើញជាអធិបតីក្នុងពិធីប្រគល់ប័ណ្ណកម្មសិទ្ធដីធ្លីជូនដល់ប្រជាពលរដ្ឋចំនួន ៧៤៥ គ្រួសារ ស្ថិតនៅភូមិតាលាក់ខាងជើង ឃុំគុស ស្រុកត្រាំកក់ខេត្តតាកេវ។
ដោយមានវត្តមានការចូលរួមពីឯកឧត្តមរដ្ឋមន្រ្តី រដ្ឋលេខាធិការនៃរាជរដ្ឋាភិបាលដែលជាក្រុមការងារមូលដ្ឋានប្រចាំខេត្តតាកែវផងឯកឧត្តម បណ្ឌិត សុខ អាន បានចាត់ទុកការចែកប័ណ្ណកម្មសិទ្ធជូនប្រជាពលរដ្ឋដែលធ្វើឡើងក្នុងសកម្មភាពថ្មីនៃនយោបាយចាស់គឺបានឆ្លុះបញ្ជាំងឱ្យឃើញពីការយកចិត្តទុកដាក់ខ្ពស់របស់រាជរដ្ឋាភិបាលក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែននាយករដ្ឋមន្រ្តីនៃព្រះរាជាណាចក្រ កម្ពុជា ក្នុងការធានាកម្មសិទ្ធដីធ្លីស្របច្បាប់របស់ប្រជាពលរដ្ឋសំដៅលើកម្ពស់ជីវភាព សុខមាលភាព និង ការកាត់បន្ថយភាពក្រីក្រ ព្រមទាំងការរួមចំណែកដល់ការពង្រឹងយុត្តិធម៌ និង ស្ថេរភាពសង្គម។
ឯកឧត្តម បណ្ឌិត សុខ អាន បានមានប្រសាសន៍ថា រាជរដ្ឋាភិបាលបាននិងកំពុងអនុវត្តន៍គោលនយោបាយ និង យុទ្ធសាស្រ្តដ៏សមស្របសម្រាប់អភិវឌ្ឍ សមត្ថភាពរបស់ប្រជាកសិករ និង អភិវឌ្ឍវិស័យកសិកម្មដោយផ្តោតការយកចិត្តទុកដាក់ចំពោះការកសាងប្រព័ន្ធធារាសាស្រ្ត និង ការផ្តល់សេវាគាំទ្រនានា ព្រមទាំងគោលនយោបាយអភិវឌ្ឍជនបទ សំដៅបង្កើតឱកាសឱ្យកាន់តែប្រសើរជូនប្រជាពលរដ្ឋ ក្នុងការបង្កើនចំណូលប្រចាំគ្រួសារ។ដូច្នេះ ការផ្តល់កម្មសិទ្ធដីធ្លីនេះពិតជាបានរួមចំណែកជម្រុញ និង លើកទឹកចិត្តឱ្យបងប្អូនប្រជាពលរដ្ឋខិតខំបង្កើន នូវផលិតភាព ក៏ដូចជាការវិនិយោគនៅក្នុងវិស័យកសិកម្មកាន់តែខ្លាំងឡើងថែមទៀត។ ម្យ៉ាងទៀតការដោះស្រាយការកាន់កាប់ដីធ្លីរបស់ប្រជាពលរដ្ឋឱ្យបានច្បាស់លាស់ក៏ជាកត្តាធ្វើឱ្យការកាន់កាប់ដីរបស់ក្រុមហ៊ុន វិនីយោគបានច្បាស់លាស់ផងដែរ។
ឯកឧត្តម បណ្ឌិត សុខ អាន បានបញ្ជាក់ថា “នេះជានយោបាយឈ្នះឈ្នះលើវិស័យដីធ្លីរបស់រាជរដ្ឋាភិបាលសំដៅផ្តល់ដីសម្បទានដីសេដ្ឋកិច្ចដល់ក្រុម ហ៊ុន សម្រាប់ការវិនិយោគ និង ផ្តល់ផលប្រយោជន៍ពិតប្រាកដដល់ប្រជាពលរដ្ឋរស់នៅក្នុងតំបន់វិនីយោគ”។
ជាមួយនឹងការរម្លឹកអំពីកម្មសិទ្ធដីធ្លីត្រូវបានលុបបំបាត់ចោលដោយរបបប៉ុលពតឯកឧត្តម បណ្ឌិត សុខ អាន បានមានប្រសាសន៍ឱ្យដឹងថាចាប់តាំងពីឆ្នាំ១៩៧៩ រហូតមកដល់បច្ចុប្បន្ន រដ្ឋាភិបាលបានអនុវត្តគោលនយោបាយដីធ្លីចំនួន ៤វគ្គ។ វគ្គទី១ ក្នុងទសវត្សរ៍ឆ្នាំ១៩៨០ រដ្ឋាភិបាលបានយកចិត្តទុកដាក់លើកម្មសិទ្ធដីធ្លី ដោយចេញលិខិតស្នាមរដ្ឋបាល និង ប័ណ្ណភោគ:ជូនប្រជាពលរដ្ឋ។ វគ្គទី២ នៅចន្លោះពីឆ្នាំ១៩៩១-១៩៩៣ គឺការផ្តល់ដីធ្លីជូនដល់ប្រជាពលរដ្ឋជនភៀសខ្លួនដែលធ្វើមាតុភូមិនិវត្តន៍។ វគ្គទី៣ នៅចុងឆ្នាំ១៩៩៨គឺផ្តល់ដីធ្លីជូនបងប្អូនប្រជាពលរដ្ឋអតីតខ្មែរក្រហម ដែលបានធ្វើសមាហរណកម្មជាមួយរាជរដ្ឋាភិបាល ។វគ្គទី៤ គឺអនុវត្តគោលនយោបាយចាស់សកម្មភាពថ្មី ចាប់ពីឆ្នាំ២០១២ មកដោយមានការចូលរួមពីក្មួយៗយុវជនស្ម័គ្រចិត្កសម្តេចតេជោ ហ៊ុន សែន។រាជរដ្ឋាភិបាលបានបើកយុទ្ធនាការចុះវាស់វែងដីធ្លីប្រមាណ ១លាន៨សែន ហិតាគឺប្រមាណ៧០ ម៉ឺនក្បាលដីសម្រាប់ចែកជូណប្រជាពលរដ្ឋប្រមាណ៤៧ ម៉ឺនគ្រួសារដោយមានការចូលរួមពីមន្រ្តីជំនាញបច្ចេកទេស និង ក្មួយៗវីរ:យុវជនស្ម័គ្រចិត្តសរុបជាង ៣ពាន់នាក់។
ឯកឧត្តម បណ្ឌិត សុខ អាន បានបញ្ជាក់ថាយុទ្ធនាការអនុវត្តគោលនយោបាយចាស់សកម្មភាពថ្មីលើវិស័យដីធ្លីនេះគឺជាជំហានថ្មីមួយទៀតនៃការកែទម្រង់ដីធ្លីដ៏ស៊ីជម្រៅតាមរយ:ការធ្វើប្រទានកម្មដីជូនប្រជាពលរដ្ឋជាកម្មសិទ្ធពេញលេញដើម្បីដោះស្រាយស្ថានភាពពីការកាន់កាប់ដីធ្លីមិនច្បាស់លាស់ឬមិនស្របច្បាប់ឱ្យទៅជាការកាន់កាប់ដីធ្លីដោយមានមូលដ្ឋានច្បាប់រឹងមាំមានលក្ខណ:ច្បាស់លាស់ និង មានសុវត្ថភាព។
ឯកឧត្តម ស្រី បេន អភិបាលនៃគណ:អភិបាលខេត្តតាកែវ បានមានប្រសាន៍ថា ក្នុងការអនុវត្តគោលនយោបាយចាស់សកម្មភាពថ្មីលើវិស័យដីធ្លីដែលជាអនុសាសន៍ដាក់ចេញដោយសម្តេចតេជោនាយករដ្ឋមន្រ្តីមកដល់ពេលនេះខេត្តតាកែវ ទទួលបានវីរ:យុវជនស្ម័គ្រចិត្តសម្តេចតេជោ ចំនួនពីរវគ្គមានបីក្រុម ចុះវាស់វែងដីធ្លីជូនប្រជាពលរដ្ឋក្នុងភូមិសាស្រ្តស្រុកត្រាំកក់ និង ស្រុក គីរីវង្ស។ជាលទ្ធផលសម្រេចបានប្រកាសកំណត់តំបន់វិនិច្ឆ័យចំនួន១៥ឃុំ បំពេញស លាក ប័ត្រព័ត៌មានបានចំនួន៨៣១៩ ក្បាល់ដីបញ្ចូលសម្រង់បញ្ជីឈ្មោះម្ចាស់ដីបានចំនួន ៦៦ ៩៥ គ្រួសារ។ ចំនួនគ្រួសារក្រោយពេលផ្ទៀងផ្ទាត់មាន ៣៧៥៤ គ្រួសារ។ កំណត់ព្រំ និង វាស់ វែងដី នីមួយៗគិតជាក្បាលដីបាន៧៨០៥ ក្បាលដី។ក្បាលដីដែលបានគូររួចមាន៦២៧៩ ក្បាល ដី។ ទំហំក្បាលដីដែលបានគូររួចគិតជាហិតាមានចំនួន៣២៣០ហិកតា បំពេញទម្រង់ បែបប ទបាន ចំនួន៧៧៥៧ក្បាល់ដី ។បានបិទផ្សាយរយ:ពេល ៣០ ថ្ងៃបានចំនួន៣គោល ដៅ៖ គោលដៅទី១នៅឃុំតាអូ ស្រុកគីរីវង្ស ៤០៣ ក្បាលដីស្មើ និង ៩០.៩១ ហិកតាត្រូវជា ៣០១ គ្រួសារ បានចែកជូនប្រជាពលរដ្ឋកាលពីថ្ងៃទី២២ ខែតុលា ឆ្នាំ២០១២ក្រោមអធិបតី ភាពឯកឧត្តម បណ្ឌិត សុខ អាន។ គោលដៅទី២ នៅឃុំត្រាំកក់ ស្រុកត្រាំកក់ មានទិន្ន័យ ១១៥៣ ក្បាលដីស្មីនិង ៦៥៤.៨៦ ហិកតា ក្នុងនោះដីឯកជន ១១៤៩ ក្បាលដី ដីសាធារ ណ:៤ក្បាល់ដី(ត្រពាំងរួមភូមិ) ត្រូវជា ៦៩៣ គ្រួសារចែកជូនប្រជាពលរដ្ឋកាលពីថ្ងៃ៣០ ធ្នូ ឆ្នាំ២០១២ ដោយសម្តេចតេជោ ហ៊ុន សែន នាយករដ្ឋមន្រ្តី។ គោលដៅទី៣ នៅឃុំគុសស្រុក ត្រាំកក់ចំនួន ១៣៤០ ក្បាល់ដីស្មើនិង៦៥១.២១ ហិកតាសម្រាប់ចែកជូនប្រជាពលរដ្ឋ៧៤៥ គ្រួសារនាថ្ងៃទី២២ ខែមករា ឆ្នាំ២០១៣ ក្រោមអធិបតីភាពឯកឧត្តម បណ្ឌិត សុខ អាន។
សូមបញ្ជាក់ថា នៅក្នុងទឹកដីខេត្តតាកែវមានផ្ទៃដីសរុបចំនួន ១១៧០១ ហិកតា សម្រាប់វាស់វែងជូនប្រជាពលរដ្ឋចំនួន៦៩៧៩គ្រួសារដោយមានមន្ត្រីជំនាញបច្ចេកទេសចូលរួម១១ នាក់ និង យុវជនស្ម័គ្រចិត្កចំនួន៣៦ នាក់៕
ប្រភព៖ ទីស្រ្តីការគណ:រដ្ឋមន្ត្រី
មតិយោបល់