Tablet នៅលើទីផ្សារនាពេលបច្ចុប្បន្ន មានច្រើនទំហំ ច្រើនពណ៌ តម្លៃខុសគ្នា កម្មវិធីខុសគ្នា ប៉ុន្តែទាំងនេះ មិនគ្រប់គ្រាន់សម្រាប់ Eurostar នោះទេ។
Eurostar ជាក្រុមហ៊ុនរបស់អេមីរ៉ាប់អារ៉ាប់រួមមួយ ដែលថ្មីៗនេះ បានឲ្យដឹងថា គេនឹងបានបង្កើត Tablet សម្រាប់ផ្ដោតសំខាន់តែលើស្ត្រី ដែលមានឈ្មោះថា ePad Femme។
ePad Femme មានទម្រង់ដូចគ្នាទៅនឹង Tablet តម្លៃថោកនៅលើទីផ្សារនាពេលបច្ចុប្បន្ន ដែលមានអេក្រង់ទំហំ ៨អ៊ីង RAM ទំហំ 1GB និងប្រើប្រាស់ប្រព័ន្ធដំណើរការ Android 4.0 ប៉ុន្តែអ្វីដែលពិសេសនោះគឺថា កម្មវិធីដែលមាននៅលើ Tablet មួយនេះគឺសុទ្ធសឹងតែជាកម្មវិធីសម្រាប់ស្ត្រីក្នុងការប្រើប្រាស់ទាំងអស់។
លោក Mani Nair ប្រធានទីផ្សារក្រុមហ៊ុន Eurostar បានប្រាប់សារព័ត៌មាន ABC News ថា អតិថិជនរបស់ខ្លួនអាចធ្វើការទាញយកកម្មវិធីបន្ថែមនៅលើ Google Play បាន ដោយគ្រាន់តែថា កម្មវិធីដែលភ្ជាប់មកជាមួយសុទ្ធសឹងជាកម្មវិធីសម្រាប់ស្ត្រី។
បើតាមការឲ្យដឹងពីក្រុមហ៊ុន ePad Femme នឹងចេញលក់ក្នុងតម្លៃ ១៧០ដុល្លារអាមេរិក ដែលនឹងមានលក់នៅក្នុងទីផ្សារអាស៊ីបូព៌ា និងអាស៊ី ហើយប្រហែលជាមិនលក់នៅសហរដ្ឋអាមេរិកនោះទេ៕
មតិយោបល់