អង្គការសុខភាពពិភពលោក (WHO) បានឲ្យដឹងថា នៅពេលនេះ មិនទាន់មានភស្ដុតាងណាមួយបញ្ជាក់ថា ជំងឺគ្រុនផ្ដាសាយបក្សី ដែលបានសម្លាប់បុរសជនជាតិចិន ចំនួន ២នាក់ អាចឆ្លងពីមនុស្ស ទៅមនុស្សទេ។
យោងតាមទីភ្នាក់ងារព័ត៌មាន Reuters បានឲ្យដឹងថា បុរសទាំង ២នាក់នោះ មានម្នាក់វ័យ ៨៧ឆ្នាំ និងម្នាក់ទៀតអាយុ ២៧ឆ្នាំ ជាប្រជាជនដែលរស់នៅក្នុងទីក្រុងសៀងហៃ អ្នកទាំង២នេះ បានធ្លាក់ខ្លួនឈឺតាំងពីចុងខែកុម្ភៈមកម្ល៉េះ ហើយក៏មានស្ដ្រីម្នាក់មកពីខេត្តអានហួយ ក៏កើតមានជំងឺផ្ដាសាយបក្សីផងដែរកាលពីដើមខែមីនា ប៉ុន្តែនៅពេលនេះមិនទាន់ស្លាប់ទេគឺកំពុងស្ថិតនៅក្នុងស្ថានភាពធ្ងន់ធ្ងរ និងគ្រោះថ្នាក់បំផុត។
តំណាងអង្គការសុខភាពពិភពលោកប្រចាំប្រទេសចិន លោក វេជ្ជបណ្ឌិត ម៉ៃឃើល អូលែរី បានថ្លែងថា ករណីទាំងបីខាងលើ ជាករណីដាច់ឡែកពីគ្នា ហើយនៅពេលនេះ យើងនៅមិនទាន់មានភស្ដុតាងបញ្ជាក់ថា ឆ្លងពីមនុស្ស ទៅមនុស្សផងដែរ។
អ្នកទិញបសុបក្សីនៅផ្សារមួយកន្លែងក្នុងទីក្រុងសៀងហៃ កើងមានក្ដីបារម្ភកាលពីថ្ងៃចន្ទ កន្លងទៅនេះថា ករណីខាងលើត្រូវបានគេឲ្យដឹង នៅក្រោយពីស្លាប់ ប៉ុន្មានសប្បាយ ហើយពួកគាត់សង្ឃឹមថា រដ្ឋាភិបាលចិន នឹងរាយការណ៍លម្អិតករណីថ្មីៗ ឲ្យបានឆាប់រហ័ស និងលឿងជាងនេះ៕
ព័ត៌មានជាតិ
មតិយោបល់