សហព័ន្ធអាជ្ញាធរដឹកជញ្ជូនសហរដ្ឋអាមេរិក កំពុងតែធ្វើការស៊ើបអង្កេតលើដំណាក់កាលដំបូងក្នុងករណីធ្លាក់យន្តហោះ Asiana Airlines Boeing 777 កាលពីថ្ងៃសៅរ៍កន្លងទៅ នៅឯអាកាសយាន្តដ្ឋាន សាន់ហ្វ្រានស៊ីស្កូ។
ប្រធានក្រុមប្រឹក្សាភិបាលសុវត្ថិភាពដឹកជញ្ជូនជាតិ (NTSB) អ្នកស្រី Deborah Herman បានថ្លែងថា អ្នកស៊ើបអង្កេតបានធ្វើការស៊ើបសួរទៅលើអ្នកបើកយន្តហោះពាក់ព័ន្ធនឹងករណីធ្លាក់យន្តហោះនេះ កាលពីថ្ងៃអាទិត្យ ហើយលទ្ធផលដែលទទួលបាននឹងបង្ហាញជួននៅពេលឆាប់ៗនេះ។
“ការពិតណាស់ វាជារឿងសំខាន់ក្នុងការផ្គុំបញ្ជូលគ្នានូវបំណែកផ្សេងរបស់យន្តហោះដែលបានធ្លាក់ ដើម្បីស្វែងរកមូលហេតុនៃការធ្លាក់ ប៉ុន្តែនៅពេលនេះ យើងនៅមិនទាន់បានរកឃើញនោះទេ ហើយបើសិនជារកឃើញវាជាការល្អក្នុងការការពារសម្រាប់ពេលអនាគត”។ នេះជាសម្ដីរបស់អ្នកស្រី Herman បានថ្លែងទៅកាន់សារព័ត៌មាន CNN។
អ្នកស្រីបានបន្ថែមទៀតថា ការស៊ើបអង្កេតនឹងត្រូវធ្វើឡើងជាច្រើនដំណាក់កាល ដើម្បីសរុបព័ត៌មានជារួមមួយ ដោយក្នុងនោះត្រូវប្រមូលទិន្នន័យមកពីប្រព័ន្ធរ៉ាដា ព័ត៌មាននៃការហោះហើរ និងទិន្នន័យរបស់អ្នកធ្វើដំណើរ។ សម្រាប់ប្រអប់ខ្មៅនៃយន្តហោះដែលបានធ្លាក់នោះ ត្រូវបានបញ្ជូនទៅកាន់ទីភ្នាក់ងារសហព័ន្ធមន្ទីរពិសោធន៍នៅវ៉ាស៊ីនតោនឌីស៊ី។
គួរបញ្ជាក់ផងដែរថា នៅក្នុងហេតុការណ៍ធ្លាក់យន្តហោះនេះ បានបណ្ដាលឲ្យជនជាតិចិនពីរនាក់បានស្លាប់ និង១៨០នាក់ផ្សេងទៀតរងរបួស៕
មតិយោបល់