នៅពេលដែលសួរខ្លួនឯង ជានរណាហេតុអ្វីបានក្លាយជាមនុស្សដែលលង់នឹងក្តីស្នេហា យ៉ាងនេះ ? មិនដឹងថាស្នេហា ជាមោបាំង មិនឲ្យឃើញអ្វីៗគ្រប់បែបយ៉ាង មិនស្គាល់អ្វីថាល្អ នឹងអ្វីថា អាក្រក់ ដែលនាំឲ្យខ្លួនធ្លាក់ទៅរកចំណុចមួយ ដែលខ្លួមមិននឹកស្មានឡើយ ។ ខណ:ដែលមករៀនលើទឹកដី ភ្នំពេញ ដែលធ្វើដំណើរចេញពីខេត្តកំពង់ឆ្នាំង ដោយតាំងចិត្តមុតមាំ ចំពោះការសិក្សា ហើយក៏ជាមនុស្សមិនចង់ស្គាល់ពាក្យថា ស្នេហា ហើយមិនចង់ឲ្យវាមកជំពាក់ជំពិននៅវ័យនេះដែរ ។
ឃុន សុទ្ធា ជាឈ្មោះ មនុស្សស្រីម្នាក់ដែល កំពុងសិក្សានៅសាកលវិទ្យាល័យមួយកន្លែង នៅទីក្រុង ភ្នំពេញ ដោយស្គាល់គេហទំព័រ ដំណឹង តាមរយ:ហ្វេសប៊ុក និងពួកម៉ាកប្រាប់ថា ទំព័រនេះក៏មានដោះស្រាយវិបត្តិស្នេហា និងអាចផ្ញើរសារលិខិត ពីវិបត្តិដែលកប់ជ្រៅនៅក្នុងដួងចិត្តជាយូរណាស់មកហើយ ជីកកកាយ ឲ្យស្អុយដូចជាអាថ៌ក្រៀម ។ទន្ទឹមនឹងនេះ ក៏ជាពេលវេលា ដែលនាង ខ្ញុំ ឈ្មោះ ឃុន សុទ្ធា មានរឿងរ៉ាវដ៏ជូរចត់ មកប្រឡាក់បៀកនឹងរាងកាយរបស់ខ្ញុំ សឹងថា រកពុទ្ធោមិនចំជាពុទ្ធោ ងាកឆ្វេង មិនចំងាកឆ្វេង ងាកស្តាំមិនចំជាងាកស្តាំ ឡេឡឺ ដូចទូករសាត់គ្មានត្រើយ។
បុរសម្នាក់ដែលមានឈ្មោះ សម្បត្តិ ជាមនុស្សដែលរៀននៅថ្នាក់របស់ខ្ញុំក្នុង មហាវិទ្យាល័យគណនេយ្យ ហើយក៏ជាមនុស្សម្នាក់ ក្នុងគ្រាស្នេហាដំបូងរបស់ខ្ញុំ គេជាមនុស្សល្អគ្រប់យ៉ាងសម្រាប់ខ្ញុំ ដោយយកចិត្តទុកដាក់នេះ យកចិត្តទុកដាក់នោះ រាល់ពេលដែលនាងខ្ញុំមានធុរ:ម្តងៗ ។ ភាពយកអសាររបស់គេ បានប្រែក្លាយដួងចិត្តដ៏រឹងមាំរបស់ខ្ញុំ ឲ្យទន់ជ្រាយរលាយដូចក្រមួនត្រូវថ្ងៃ មិនដឹងថា ស្រលាញ់គេតាំងពីពេលណា តែមិនហាននិយាយស្តីឡើយ ព្រោះថាខ្លួនជាមនុស្សស្រី ។
នៅថ្ងៃ បញ្ចប់ការសិក្សា ឆ្នាំទី ២ មិត្តភក្តិក្នុងសាកលវិទ្យាល័យទាំងអស់បាន ណាត់គ្នាទៅ ញ៉ាំអីៗជុំគ្នា ដោយមានផឹកស៊ី រាំរែកបន្តិចបន្តួច ពេលនោះសម្បត្តិបានហៅខ្ញុំខ្សឹមរឿងមួយ តើមិត្តអ្នកអានដឹងថាគេនិយាយអ្វីដែរទេ? នោះគឺជាសំឡេងដែលចេញពីបបូរមាត់ដ៏ស្តើងរបស់គេ” បងស្រលាញ់អូន អូនយល់ព្រមទុកបងក្នុងបេះដូងដែរឬទេ?” ។ ពាក្យនេះបានធ្វើឲ្យបេះដូងខ្ញុំញាប់ញ័រ ព្រោះថាតាំងពីពេលស្គាល់គ្នាមកគេមិនដែលសារភាពថាស្រលាញ់ខ្ញុំនោះទេ ទោះបីជាបង្ហាញកាយវិការល្អៗតែវាគ្រាន់តែជាកាយវិការ ។ នៅពេលដែលឭពាក្យនេះខ្ញុំឈរទ្រឹងស្តូក គេក៏សួរថា ម៉េចមិនឆ្លើយថា យល់ព្រម? ឬបងនេះមិនសមឲ្យអូន យកចិត្តបង ? រំពេចជាមួយនឹងគ្នានោះ ខ្ញុំក៏ផ្លោតសម្តីឡើងថា “នរណាថាមិនយល់ព្រម គ្រាន់តែគេសូមសប្បាយចិត្តបន្តិចមិនបានទេ ឬ ?” ខ្ញុំនិយាយបែបរាងឈ្លើយ ព្រោះថានេះជាទំលាប់ចាស់របស់ខ្ញុំហើយ ។
បិទបើកៗស្នេហារបស់យើងបាន ឈានចូល ក្បាល ៣ ឆ្នាំ តែអ្វីៗហាក់មិនទាន់ប្រែប្រួលទាំងអស់ ដោយនឹងកលស្នូក ហើយក៏ជាពេលវេលាដែលយើងរៀនចប់ ដូចគ្នា តែគេបានប្រែក្លាយជាមនុស្សស្រលាញ់ទាំងអស់ ស្មោះទាំងអស់ ដោយមានស្រលាញ់ជាច្រើននៅជុំជិតគេ ។ ពេលនោះខ្ញុំបានតាមទាន់គេអង្គុយញ៉ាំអី ជាមួយនឹងស្រីផ្សេងនៅផ្សារទំនើប ដោយកាយវិការផ្អែមល្អែមរកគ្នា ។ ក្រោយមកខ្ញុំក៏បានសួរ ខណ:ដែលពួកយើងនៅតែ ២ នាក់ គេដោះសារថាជាមិត្ភភក្តិ ម្តងហើយម្តងទៀត និងសុំចិត្តខ្ញុំកុំខឹងតែផ្តាស់ ដោយលួងលោមនេះ លោងលោមនោះ ខ្ញុំក៏បាក់ចិត្តស្តូក ជឿគេម្តងទៀត។ ជាម្តងជាពីរដងនៅ ដដែល ដល់មានពេលខ្លះ ខ្ញុំតាមទាន់គេប្រព្រឹត្តិល្បែងស្នេហាលើគ្រែ ជាមួយនឹងស្ត្រីដែលគេបណ្តើរថា ជាមិត្តភក្តិទាំងអស់នោះ ។ តាំងតែពីឃើញសភាពនោះ ខ្ញុំបានតាំងចិត្តភឹង មិនទន់ជ្រាយគេអង្វរទៀតទេ តែបែរនៅតែជាមនុស្សទន់ជ្រាយ ព្រោះគេបានស្បថស្បែថា មិនប្រព្រឹត្តិដូចនោះទេ។
ស្នេហារបស់ពួកយើង ជាស្នេហា មិនដោយប្រពៃណី ដោយខុសប្រពៃណីទាំងស្រុង ដោយរួមរស់នៅជាមួយនឹងគ្នា ដោយម្តាយទាំងសងខាងមិនបានដឹងឡើយ ។ យូរៗទៅ ខ្ញុំក៏ចាប់ផ្តើមមានអាការ:ក្អួតចង្អោរ ដោយមិនអាចទៅធ្វើការបាន និងដេកនៅតែផ្ទះ ជួលគេក្នុងទីក្រុងភ្នំពេញ ។ ពេលទៅពិនិត្យទើបដឹងថាខ្ញុំមានផ្ទៃពោះ ២ ខែ ទៅហើយ ។រឿងនេះ ខ្ញុំបានយកទៅប្រាប់គេតែ គេធ្វើជាសើចសប្បាយហាក់ដូចជាអរ តែធាតុពិត ២ ទៅ ៣ ថ្ងៃក្រោយមកគេបានបោះបង់ខ្ញុំចោល ដោយទុកឲ្យខ្ញុំនៅម្នាក់ឯងជាមួយនឹងទារក ២ ខែ ក្នុងផ្ទៃ ដែលខុសប្រពៃណី ដោយគ្នាមិនដឹងអីនោះ។ មិនដឹងថា ផ្ទះគេនៅឯណា ព្រោះថា តាំងពីពេលស្គាល់គ្នាមក ត្រឹមដឹងថា នៅភ្នំពេញ និងស្រុកកំណើតនៅ កំពង់ស្ពឺ តែមិនដែលដឹងអសយដ្ឋានឲ្យច្បាស់ឡើយ។
ភាពភ្លាំងភ្លាត់របស់ខ្ញុំ បានផ្តល់មេរៀនយ៉ាងកក់ក្តៅជាទីបំផុត ក្នុងមួយជីវិតនេះ ដោយមានអារម្មណ៍ថាខ្មាស់គេ ក្លាយខ្លួនជាម្តាយគេដោយគ្មានប្តី ខ្ញុំក៏សម្រេចិត្តយកទារកនោះចេញ ដោយសាងជីវិតសារជាថ្មី ។ សូមបងប្អូននារីទាំងអស់កុំធ្វើដូចនាងខ្ញុំ ដោយមិនស្គាល់ផ្ទះគេច្បាស់លាស់ ហានស្រលាញ់គេ ជាពិសេសបណ្តែតបណ្តោយខ្លួនឲ្យក្លាយជាមនុស្សដែលសង្គមស្អប់ខ្ពើម និងធ្វើខុសគន្លងប្រពៃណី បើសិនជាជៀសបានសូមជៀស ដើម្បីអនាគត់ ។ ពីនាងខ្ញុំ សុទ្ធា នារីដែលរងវិបត្តិស្នេហា ៕
//i1272.photobucket.com/albums/y389/domneng/Decore/53158-sad-wallpapers-free-sad-hd-wallpapers-sad-desktop-wallpapers-sad_zps122df2e4.jpg
មតិយោបល់