ក្រុមមន្ត្រីចិនបាននិយាយនៅថ្ងៃអង្គារ ម្សិលមិញនេះថា រដ្ឋាភិបាលចិនកំពុងហាមក្រុមមន្ត្រីទាំងអស់ពីការយកលុយរដ្ឋទៅទិញនំ ដើម្បីធ្វើជាអំណោយ និងដើម្បីសែនព្រះខែក្នុងអំឡុងពេលបុណ្យសែនព្រះខែ ដែលនឹងប្រារពឡើងនៅខែក្រោយ។
បំរាមនេះគឺជាផ្នែកមួយនៃកិច្ចខំប្រឹងប្រែងរបស់ប្រធានាធិបតីចិន លោក ស៊ី ជីនភីង ដើម្បីប្រយុទ្ធប្រឆាំងអំពើពុករលួយនិងដើម្បីស្តារការជឿជាក់និងការស្មោះត្រង់ឡើងវិញនៅក្នុងបក្សកុម្មុយនីស្តចិនដែលកំពុងកាន់អំណាចនេះ។
យោងតាមទីភ្នាក់ងារព័ត៌មាន Reuters សេចក្តីថ្លែងការណ៍របស់រដ្ឋាភិបាលចិន បាននិយាយថា បើសិនជាមានករណីរំលោភលើបម្រាមនេះ នឹងត្រូវបានដាក់ទណ្ឌកម្ម។ព្រមជាមួយគ្នានេះផងដែរ ក៏បានហាម ពីការប្រើប្រាស់លុយរដ្ឋដើម្បីចំណាយលើកម្មវិធីជប់លៀងអាហារថ្លៃៗ និងការសម្តែងសិល្បៈធំៗនៅក្នុងអំឡុងពេលបុណ្យសែនព្រះខែ។
លោកប្រធានាធិបតីចិន បានចាត់ទុកការប្រយុទ្ធប្រឆាំងអំពើពុករលួយជា អាទិភាព ហើយក្នុងរយៈពេលពីរបីខែកន្លងទៅថ្មីៗនេះ មន្ត្រីជាន់ខ្ពស់ចិនច្រើននាក់ ត្រូវបានបណ្តេញចេញពីការងារ ដោយសារតែប្រព្រឹត្តអំពើពុករលួយ។
គួរបញ្ជាក់ផងដែរ លោកជាំង ជីមីន ត្រូវបានបណ្តេញចេញពីតំណែងពីបទសង្ស័យរំលោភវិន័យធ្ងន់ធ្ងរ នេះបើតាមការប្រកាសរបស់ទីភ្នាក់ងារសារព័ត៌មានស៊ីនហួរ៕
មតិយោបល់