ក្រសួងសុខាភិបាលនៃព្រះរាជាណាចក្រកម្ពុជា កាលពីថ្ងៃទី ៤ បានប្រកាសអំពីការឆ្លងមេរោគផ្តាសាយបក្សី H5N1 ឲ្យសាធារណ:ជនជ្រាបអំពីបញ្ហាមួយនេះ ដោយថ្មីៗនេះ
កុមារាអាយុ ១៥ ឆ្នាំ ម្នាក់ទៀត រស់នៅភូមិទី១១ សង្កាត់ទួលសង្កែ ខណ្ឌ ឫស្សីកែវ រាជធានីភ្នំពេញ ត្រូវបានគ្រូពេទ្យ បញ្ជាក់ថា ឆ្លងមេរោគផ្ដាសាយបក្សី H5N1 ដែលនេះជាករណីទី១៨ហើយ នៃការឆ្លងជំងឺ មួយនេះ ក្នុងឆ្នាំ២០១៣ និងជាករណីទី៣៩ ដែលកើតឡើងនៅក្នុងប្រទេសកម្ពុជា។ នេះបើយោងតាមសេចក្ដីប្រកាសព័ត៌មានរួមគ្នា រវាងក្រសួងសុខាភិបាល និងអង្គការ សុខភាពពិភពលោក នៅថ្ងៃទី០៤ ខែកញ្ញា ឆ្នាំ២០១៣ នេះ ។
រោគសញ្ញាដំបូងនៃការឆ្លងមេរោគផ្តាសាយបក្សីនេះ កុមារារងគ្រោះបានចាប់ ផ្ដើមឈឺកាលពីថ្ងៃទី១៦ ខែសីហា ឆ្នាំ២០១៣ ដោយមានសភាពគ្រុនក្ដៅ ហើយឪពុក- ម្ដាយ បានស្វែងរកការព្យាបាលនៅគ្លីនិក ឯកជនមួយ។ រហូតមកទល់នឹងថ្ងៃទី២៦ ខែសីហា ដោយសារតែស្ថានភាពរបស់កុមារារងគ្រោះកាន់ តែធ្ងន់ធ្ងរ ដោយមានគ្រុនក្ដៅ ក្អក រាគ កណ្ដាស សន្លឹម និងហត់ កុមារាត្រូវបាន បញ្ជូនទៅកាន់មន្ទីរពេទ្យ គន្ធបុបា្ជ រាជធានី ភ្នំពេញ ទទួលបានការព្យាបាលពីក្រុមគ្រូ ពេទ្យនៅទីនោះ ហើយរហូតមកដល់ពេល នេះក្រុមគ្រូពេទ្យ កំពុងតាមដានយ៉ាងយក ចិត្ដទុកដាក់ ចំពោះស្ថានភាពជំងឺកុមារារងគ្រោះ ។
លោករដ្ឋមន្ដ្រី ក្រសួងសុខាភិបាល ម៉ម ប៊ុនហេង បានបញ្ជាក់នៅក្នុងសេចក្ដីប្រកាស ព័ត៌មាននេះថា “ជំងឺផ្ដាសាយបក្សី H5N1 នៅតែបន្ដគំរាមកំហែង ដល់សុខភាពប្រជាពលរដ្ឋកម្ពុជា និងកើតមានច្រើនលើកុមារ ដែលជាអ្នកមានភាពងាយរងគ្រោះច្រើន ដែលជាចំណុចហានិភ័យខ្ពស់បំផុត ។ នេះជាករណីផ្ដាសាយបក្សីទី១៨ ដែលកើតមានលើមនុស្សក្នុងដើមឆ្នាំនេះ ។លោកបានបន្តទៀតថា ឪពុក-ម្ដាយ និងអ្នកថែកុមារទាំងអស់ ត្រូវថែទាំកុមារ ជាពិសេស ដើម្បីធានាថា កុមារមិនមែនជាមួយបសុបក្សី ឬកន្លែងមានប្រឡាក់ដោយលាមក ពោលគឺអ្វីដែលជាកាកសំណល់បក្សីនោះទេ ។ម្យ៉ាងវិញទៀត ឪពុក- ម្ដាយ និងអ្នកថែទាំកុមារទាំងអស់ ត្រូវ ប្រាកដថា កុមារលាងដៃជាមួយសាប៊ូបន្ទាប់ ពីប៉ះជាមួយបសុបក្សី ។ ប្រសិនបើពួកគេមានដង្ហើមញាប់ ឬពិបាកដកដង្ហើមត្រូវនាំកុមារ ទៅរកការព្យាបាលជាបន្ទាន់នៅគ្រឹះ ស្ថានសុខាភិបាលដែលនៅជិតផ្ទះរបស់ លោកអ្នកបំផុត និងបញ្ជាក់ពីរឿងរ៉ាវដែលកុមារធ្លាប់ប៉ះបក្សី។
បើតាមសេចក្ដីប្រកាសព័ត៌មានខាងលើ នេះ ក្នុងចំណោមករណីឆ្លងជំងឺផ្ដាសាយបក្សី ទាំង ៣៩ករណី នៅកម្ពុជា ក្នុងនោះ ២៨ករណី កើតទៅលើកុមារក្រោមអាយុ ១៥ ឆ្នាំ ហើយ២២ករណីក្នុងចំណោម ៣៩ករណីជានារី ។ ដោយឡែកករណីទាំង១៨ ដែលកើតមានឡើង នៅក្នុងឆ្នាំ២០១៣ នេះ មានតែ៨ករណីប៉ុណ្ណោះ នៅមានជីវិត ។
បញ្ជាក់ផងដែរថា កាលពីថ្ងៃទី ២១ ខែ សីហា ឆ្នាំ ២០១៣ កន្លងទៅនេះ ក្មេងប្រុសអាយុ ៦ ឆ្នាំ ដែលជាករណីទី ១៧ រស់នៅ ខេត្តកណ្តាល ក្នុងភូមិព្រៃតាទុក ដោយខាងក្រសួងសុខាភិបាល និងគ្រូពេទ្យជំនាញបានបញ្ជាក់ថា មានជំងឺឆ្លងផ្តាសាយបក្សី៕
មតិយោបល់