ការនាំចេញតៃវ៉ាន់ បានកើនឡើង ៣,៦ភាគរយនៅក្នុងខែសីហា បើធៀបនឹងរយៈពេលដូចគ្នាកាលពីឆ្នាំកន្លងទៅ ដែលមានទឹកប្រាក់រហូតដល់ចំនួន ២៥,៦៤ពាន់លានដុល្លារអាមេរិក។យោងតាមរដ្ឋាភិបាលតៃវ៉ាន់ បានឲ្យដឹងកាលពីដើមសប្ដាហ៍ កំណើននេះទទួលបានដោយសារតម្រូវការគីមីឥន្ធនៈ និងផលិតផលអេឡិចត្រូនិកនៅប្រទេសចិនបានកើនឡើង។
ក្រសួងហិរញ្ញវត្ថុតៃវ៉ាន់ បានឲ្យដឹងក្នុងសេចក្តីថ្លែងការណ៍មួយថា ការនាំចេញទៅកាន់ប្រទេស ចិន ដែលជាទីផ្សារបរទេសធំរបស់តៃវ៉ាន់ រួមទាំងការនាំចេញទៅទីក្រុងហុងកុង ដែរនោះ មានទំហំជាទឹកប្រាក់សរុប ១០,៣ ពាន់លានដុល្លារដុល្លារអាមេរិ ពោលគឺកើនឡើង ២,៩ ភាគរយកាលពីខែសីហា ធៀបនឹងរយៈពេលដូចគ្នាកាលពីឆ្នាំមុន។
ក្រសួងហិរញ្ញវត្ថុ បានបន្តឲ្យដឹងទៀតថា ការនាំចេញគីមីឥន្ធនៈទៅកាន់ប្រទេសចិន បានកើនឡើង ២៨,១ ភាគរយនៅខែសីហា បើធៀបនឹងរយៈពេលដូចគ្នាកាលពីឆ្នាំមុន ចំណែកឯការលក់ផលិតផលអេឡិចត្រូនិកទៅឲ្យប្រទេសដែលមានសេដ្ឋកិច្ចធំ ទីពីរក្នុងពិភពលោកនេះបានកើនឡើង ៨,៦ ភាគរយ។
ការនាំចេញទៅ អាមេរិកបានកើនឡើង ០,៩ ភាគរយនៅខែសីហា បើធៀបនឹងរយៈពេលដូចគ្នាកាលពីឆ្នាំមុន ស្របពេលការនាំចេញទៅតំបន់អឺរ៉ុបបានកើនឡើង៤ភាគរយ ហើយការនាំចេញទៅកាន់តំបន់អាស៊ីអាគ្នេយ៍បានកើនឡើង២,៩ភាគរយ។
កាលពីខែមុននេះ រដ្ឋាភិបាលតៃវ៉ាន់ បានទម្លាក់ការព្យាករសេដ្ឋកិច្ចប្រចាំឆ្នាំ ២០១៣ របស់ខ្លួនមកនៅត្រឹម ២,៣១ភាគរយវិញ ដោយលើកឡើងពីចក្ខុវិស័យសេដ្ឋកិច្ចសកលទាប និងការធ្លាក់ចុះផ្នែកនាំចេញ និងការចំណាយអតិថិជននៅឆមាសទីពីរនេះ៕
មតិយោបល់