តួលេខសរុបនៃការនាំចូលរថយន្តក្នុងប្រទេសវៀតណាម បានបន្តធ្លាក់ចុះនៅក្នុងខែសីហា ដោយបានធ្លាក់ពី ២.៧០០គ្រឿងក្នុងខែកក្កដាមកនៅត្រឹម ២.០០០គ្រឿងក្នុងខែសីហា។ នេះបើយោងតាមស្ថិតិឲ្យដឹងនៅថ្ងៃព្រហស្បតិ៍ ពីក្រសួងឧស្សាហកម្ម និងពាណិជ្ជកម្មវៀតណាម។
ក្រសួងបានបន្តទៀតថា តួលេខនៃការនាំចូលរថយន្តនៅក្នុងប្រទេសវៀតណាមបានធ្លាក់ចុះខ្លាំងនៅក្នុងខែកក្កដា មានចំនួន ២.៧០០គ្រឿង បើធៀបទៅនឹងខែមិថុនាមានចំនួន ៤.០០០គ្រឿង។
ក្រសួងឧស្សាហកម្ម និងពាណិជ្ជកម្ម បានបង្ហាញថា ចន្លោះខែឧសភា-មិថុនា តួលេខនៃការនាំចូលកើនឡើង ប៉ុន្តែនៅចន្លោះខែកក្កដា-សីហាបែរជាធ្លាក់ចុះទៅវិញ។ កាលពីដើមខែមេសា-ឧសភា វៀតណាមបាននាំចូលរថយន្តប្រមាណជា ៣.០០០គ្រឿង និងកើនឡើងដល់ ៤.០០០គ្រឿងនៅចុងខែមិថុនា។
ក្រសួងឧស្សាហកម្ម និងពាណិជ្ជកម្ម បានព្យាករទុកថាទីផ្សាររថយន្តនៅក្នុងប្រទេសវៀតណាមនៅតែមិនស្ថិតស្ថេរនៅក្នុងរយៈពេលប៉ុន្មានខែខាងមុខនេះ។
យោងតាមសេចក្ដីសារចរពង្រាងរបស់ក្រសួងឧស្សាហកម្ម និងពាណិជ្ជកម្មវៀតណាមបានឲ្យដឹងថា តម្លៃនៃការនាំចូលរថយន្តនៅក្នុងតំបន់អាស៊ានអាចនឹងថយចុះ ព្រោះថាការបង់ពន្ធត្រូវបានកាត់បន្ថយពី ៦០ភាគរយ មកនៅត្រឹម ៥០ភាគរយ នៅក្នុងឆ្នាំ ២០១៤ ហើយនៅនៅត្រឹមសូន្យនាឆ្នាំ ២០១៨។ នេះត្រូវបានគេចាត់ទុកថាជាផ្នែកមួយនសចលនាធ្វើឲ្យប្រសើរឡើងនូវទស្សនវិស័យអួរអាប់នៃឧស្សាហកម្មយានយន្ត។
នៅក្នុងរយៈពេល ៨ខែដំបូងឆ្នាំ ២០១៣ វៀតណាមបាននាំចូលរថយន្តប្រមាណជា ២២.០០០គ្រឿង ដែលមានតម្លៃជាង ៤០៨លានដុល្លារអាមេរិក កើនឡើង ៥,៧ភាគរយ បើធៀបនឹងឆ្នាំ កន្លងទៅ៕
មតិយោបល់