អ្នកធ្លាប់សង្កេតដែរឬទេថា ពេលកើតជំងឺ យើងតែងតែឮមនុស្សចាស់ហាមឃាត់បរិភោគនេះ បរិភោគនោះជាប់ជានិច្ច ព្រោះថា អាហារដែលបរិភោគចូលទៅធ្វើឲ្យជំងឺលាប់ ហើយអាការកាន់តែធ្ងន់ធ្ងរឡើងថែមទៀត។
នេះគ្រាន់តែជាការហាមឃាត់មួយដែលយើងមិនទាន់បានដឹងមូលហេតុច្បាស់ លាស់ ប៉ុន្តែតទៅនេះអ្នកអាចដឹងច្បាស់លាស់ដោយមានការបញ្ជាក់ពីគ្រូពេទ្យជំនាញ។
គ្រុនផ្ដាសាយ ឬ គ្រុនក្ដៅ
គួរចៀសវាងបរិភោគអាហារដែលត្រជាក់ខ្លាំង អាហារចៀន និងអាហារខ្លាញ់។ ការហាមឃាត់មិនឲ្យបរិភោគអាហារទាំងនេះ ព្រោះថាអាហារទាំងនោះពិបាកក្នុងការរំលាយ និង ធ្វើឲ្យកម្ដៅក្នុងខ្លួនប្រមូលផ្ដុំកាន់តែខ្ពស់ ប្រៀបបីដូចជាជះប្រេងសាំងទៅលើគំនរភ្លើង ដែលធ្វើឲ្យរាងកាយទទួលកម្ដៅកាន់តែខ្ពស់ ហើយកម្ដៅកាន់តែកើនឡើង។
រោគបេះដូង និង រោគគ្រលៀន
គួរចៀសវាងបរិភោគអាហារដែលប្រៃខ្លាំង ពីព្រោះវានឹងបង្កឲ្យមានការប្រមូលផ្ដុំទឹកទុក ចលនាឈាមរត់យឺត បេះដូងធ្វើការងារធ្ងន់ និង គ្រលៀនធ្វើការបណ្ដេញសារជាតិរ៉ែកាន់តែខ្លាំងឡើង។ ចំណែកអាហារដែលមានរសជាតិប្រៃក៏គួរចៀសវាងដូចគ្នា។
រោគថ្លើម និង រោគថង់ទឹកប្រមាត់
ត្រូវចៀសវាងបរិភោគគ្រឿងភេសជ្ជៈដែលមានសារជាតិអាល់កុល អាហារខ្លាញ់ សាច់ជាប់ខ្លាញ់ គ្រឿងក្នុងសត្វ អាហារចៀន អាហារផ្អែមខ្លាំង ពីព្រោះថ្លើម និង ថង់ទឹកប្រមាត់មានទំនាក់ទំនងជាមួយប្រព័ន្ធរំលាយអាហារ។ ប្រសិនបើការបរិភោគ អាហារប្រភេទនេះច្រើនខ្លាំងពេក នឹងបង្កឲ្យប្រសិទ្ធភាពនៃការរំលាយអាហារទន់ខ្សោយ ហើយបន្ទាប់មកវាផ្ដល់ផលអាក្រក់ដល់ថ្លើម និង ថង់ទឹកប្រមាត់បន្តទៀត។
រោគឫសដូងបាត និង ទល់លាមក
ចៀសវាងបរិភោគអាហារប្រភេទខ្ទឹមបារាំង ខ្ទឹមក្រហម ខ្ទឹមស ខ្ញីស្រស់ ម្រេច និង ម្ទេស ព្រោះអាហារប្រភេទនេះ អាចបង្កឲ្យទល់លាមក បែកសរសៃឈាម និង អាការឫសដូងបាតកម្រើកឡើង៕
មតិយោបល់